ୱାଶିଂଟନ,୩୦/୦୧: ଆମେରିକାର ନୂଆ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମହାକାଶରେ ଫସିଥିବା ସୁନୀତା ୱିଲିୟମ୍ସ ଓ ତାଙ୍କ ସହଯୋଗୀ ବୁଚ୍ ୱିଲମୋରଙ୍କୁ ଫେରାଇ ଆଣିବା ପାଇଁ ସ୍ପେସ୍ଏକ୍ସର ସିଇଓ ଏଲନ୍ ମସ୍କଙ୍କୁ ଦାୟିତ୍ୱ ଦେଇଛନ୍ତି । ଉଭୟ ମହାକାଶ ବୈଜ୍ଞାନିକ ଗତବର୍ଷ ଜୁନ୍ରୁ ମହାକାଶରେ ଫସିରହିଛନ୍ତି ।
ଟ୍ରମ୍ପ୍ ଏ ବାବଦରେ ସୋସିଆଲ ମିଡିଆରେ ଲେଖିଛନ୍ତି, ଆମ ସାହସୀ ମହାକାଶ ଯାତ୍ରୀଙ୍କୁ ଫେରାଇ ଆଣିବା ଲାଗି ମୁଁ ମସ୍କଙ୍କୁ କହିଛି । ସେମାନଙ୍କୁ ବାଇଡେନ୍ ପ୍ରଶାସନ ମହାକାଶରେ ଛାଡ଼ି ଦେଇଥିଲା । ସେମାନେ ମହାକାଶ ଷ୍ଟେସନରେ ଅନେକ ମାସ ହେଲା ଉଦ୍ଧାର ଅପେକ୍ଷାରେ ରହିଛନ୍ତି । ସମସ୍ତେ ସେଠାରେ ସୁରକ୍ଷିତ ଥିବା ଆଶା କରୁଛି ।
I have just asked Elon Musk and @SpaceX to “go get” the 2 brave astronauts who have been virtually abandoned in space by the Biden Administration. They have been waiting for many months on Space Station. Elon will soon be on his way. Hopefully, all will be safe. Good luck…
— Donald J. Trump Posts From His Truth Social (@TrumpDailyPosts) January 29, 2025
ସେହିଭଳି ମସ୍କ କହିଛନ୍ତି, ଆମେ ମହାକାଶ ଯାତ୍ରୀଙ୍କୁ ସୁରକ୍ଷିତ ଭାବେ ଫେରାଇ ଆଣିବୁ । ସେମାନେ ଏତେଦିନ ଧରି ସେଠାରେ ରହିବା ଏକ ଭୟାନକ ଘଟଣା । ଉଲ୍ଲେଖଯୋଗ୍ୟ, ୮ ମାସ ହେଲା ସୁନୀତା ମହାକାଶରେ ଅଛନ୍ତି । ଗତବର୍ଷ ଜୁନ୍ ୫ରେ ସେ ଯାତ୍ରା କରିଥିଲେ । ସପ୍ତାହକ ପରେ ସେ ଫେରିବାର ଥିଲା । ଉଭୟ ଯାତ୍ରୀ ବୋଇଙ୍ଗ୍ର ନୂଆ ଷ୍ଟାରଲାଇନର କ୍ୟାପ୍ସୁଲର ପରୀକ୍ଷା ଲାଗି ଯାଇଥିଲେ । କିନ୍ତୁ କ୍ୟାପ୍ସୁଲରେ ବୈଷୟିକ ତ୍ରୁଟି ଦେଖାଦେବା ପରେ ଉଭୟ ଆଇଏସ୍ଏସ୍ରେ ଅଟକି ଯାଇଛନ୍ତି ।
