ନୂଆଦିଲ୍ଲୀ: ଆମେରିକାରେ ରହୁଥିବା ୧୫ ବର୍ଷୀୟା ଝିଅକୁ ଗୁଳି କରି ମାରିଦେଲେ ବାପା-ଦାଦା । ଟିକଟକ୍ରେ ଭିଡିଓ ପୋଷ୍ଟ କରିବାରୁ ନାବାଳିକାଙ୍କୁ ହତ୍ୟା କରାଯାଇଥିବା ଜଣାପଡ଼ିଛି । ଝିଅକୁ ଟିକଟକ୍ରେ ଭିଡିଓ ପୋଷ୍ଟ କରିବାକୁ ବାରଣ କରିଆସିଥିଲେ ତାଙ୍କ ବାପା । କିନ୍ତୁ ସେ ବାପାଙ୍କ ଚେତାବନୀକୁ ଖାତିର ନକରି ଟିକଟକ୍ରେ ସକ୍ରିୟ ରହୁଥିଲେ । ଏହା ପରେ ଜାନୁଆରୀ ୧୫ରେ ଆମେରିକାରେ ଜନ୍ମ ଗ୍ରହଣ କରିଥିବା ଏବଂ ସେଠାରେ ବଡ଼ ହୋଇଥିବା ଝିଅକୁ ବାପା ବଲୋଚିସ୍ତାନରେ ଥିବା ଘରକୁ ନେଇ ଆସୁଥିଲେ । ପରିବାର ସହ ଘରକୁ ଫେରୁଥିବା ବେଳେ ଝିଅର ବାପା ଏବଂ ଦାଦା ତାଙ୍କୁ ଗୁଳି କରି ହତ୍ୟା କରିଥିଲେ ।
ଦୁଇ ଅଭିଯୁକ୍ତଙ୍କୁ ପୋଲିସ ୧୦ ଦିନିଆ ରିମାଣ୍ଡରେ ନେଇଥିବା ବେଳେ ମୃତ ନାବାଳିକାଙ୍କ ଭାଇକୁ ଘଟଣା ସଂପର୍କରେ ପଚରା ଉଚରା କରିଛି । ଘର ବାହାରେ ହୋଇଥିବା ଫାୟାରିଂ ରେ ଝିଅର ମୃତ୍ୟୁ ହୋଇଥିଲା ବୋଲି ତାଙ୍କ ବାପା-ଦାଦା ପୋଲିସ ଆଗରେ କହିଥିଲେ । ତେବେ ଝିଅକୁ ହତ୍ୟା କରିବାକୁ ତାଙ୍କ ବାପା ଓ ଦାଦା ତାଙ୍କୁ ଘରକୁ ଡାକି ଆଣିଥିଲେ କି ବୋଲି ପୋଲିସ ତଦନ୍ତ କରୁଛି । ପାକିସ୍ତାନର ବିଭିନ୍ନ ଅଞ୍ଚଳରେ ଏବେ ବି ଅନର କିଲିଂ ଭଳି ସଂଘାତିକ କାଣ୍ଡ ଘଟୁଛି । ଏହା ପୂର୍ବରୁ ଅକ୍ଟୋବରରେ କରାଚିରେ ଜଣେ ବ୍ୟକ୍ତି ଟିକଟକ୍ ଭିଡିଓ ତିଆରି କରୁଥିବାରୁ ତା ମା’, ଭଉଣୀ , ଶାଳୀ ଏବଂ ଝିଆରୀକୁ ହତ୍ୟା କରିଥିଲା । ସେମାନଙ୍କ ଗଳା କାଟି ହତ୍ୟା କରିଥିଲା ରାକ୍ଷସ।
ଅନ୍ୟ ଏକ ମାମଲାରେ, ଜଣେ ବ୍ୟକ୍ତି ତା ସ୍ତ୍ରୀର ଗଳା କାଟି ହତ୍ୟା କରିବା ସହ ଏହାର ଭିଡିଓ ସୁଟ୍ କରିଥିଲା । ଏହି ଭିଡିଓ ସୋସିଆଲ ମିଡିଆରେ ଭାଇରାଲ୍ ହେବା ପରେ ଅଭିଯୁକ୍ତ ଏବଂ ତାର ପରିବାର ସଦସ୍ୟଙ୍କୁ ପୋଲିସ ଗିରଫ କରିବା ସହ ତଦନ୍ତ କରୁଛି । ସେପଟେ ପାକିସ୍ତାନରେ ଅନର କିଲିଂ ଭଳି କୁପ୍ରଥା ଚାଲିଆସିଛି । ରିପୋର୍ଟ ଅନୁସାରେ, ୨୦୨୪ରେ ପାକିସ୍ତାନରେ ୩୪୬ ମହିଳା ଏବଂ ୧୮୫ ପୁରୁଷ ଅନର କିଲିଂର ଶିକାର ହୋଇ ଜୀବନ ହରାଇଥିଲେ । ସେହିଭଳି ୨୦୨୩ରେ ୩୧୪ ମହିଳା ଏବଂ ୧୭୬ ପୁରୁଷଙ୍କ ଜୀବନ ଯାଇଥିଲା ।
