ନୂଆଦିଲ୍ଲୀ: ଆଗାମୀ ନିର୍ବାଚନରେ ଆମ୍ ଆଦମୀ ପାର୍ଟି (ଆପ୍)ର ଭୋଟ୍ ଶେୟାର କଂଗ୍ରେସ ଖାଇଯାଉଛି ବୋଲି ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଦାବି କରିଛନ୍ତି । ଦିଲ୍ଲୀ ନିର୍ବାଚନକୁ ନେଇ ଇଣ୍ଡି ମେଣ୍ଟରେ ଫାଟ୍ ସୃଷ୍ଟି ହୋଇଥିବା ବେଳେ ଆପ୍ ଏବଂ କଂଗ୍ରେସ ଏକାକୀ ନିର୍ବାଚନ ଲଢ଼ୁଛନ୍ତି । ନିର୍ବାଚନରେ ଭୋଟ୍ ପାଇବାକୁ ଦୁଇ ଦଳ ମଧ୍ୟରେ ତୁତୁ ମେଁମେଁ ଲାଗି ରହିଛି । କଂଗ୍ରେସ କହୁଛି ଆପ୍ ଦୁର୍ନୀତି କରିଛି ଏବଂ ଆପ୍ ମଧ୍ୟ ସମାନ ଅଭିଯୋଗ ଆଣିଛି । କଂଗ୍ରେସ ସାଂସଦ ରାହୁଲ ଗାନ୍ଧୀ କହିଛନ୍ତି, କେଜ୍ରିଓ୍ବାଲ ମଦ ଦୁର୍ନୀତି କରିଛନ୍ତି । ଗୁରୁବାର କେଜ୍ରିଓ୍ବାଲ ଅଭିଯୋଗ କରିଛନ୍ତି, ଆପ୍ର ଭୋଟ୍ ଉପରେ ଭାଗ ବସାଉଛି କଂଗ୍ରେସ ।
କେଜ୍ରିଓ୍ବାଲ କହିଛନ୍ତି, ‘ଆଜି ମୋ ପାଖକୁ କିଛି ଲୋକ ଆସିଥିଲେ । ସେମାନେ କାହାକୁ ଭୋଟ ଦେବେ ବୋଲି ମୁଁ ପଚାରିଲି । ସେମାନେ କହିଲେ କଂଗ୍ରେସକୁ ଭୋଟ ଦେବେ । ମୁଁ ପଚାରିଲି ଦିଲ୍ଲୀରେ କଂଗ୍ରେସର କଣ ଅଛି, କାହିଁକି ହାତରେ ଭୋଟ ଦେବ ? କଂଗ୍ରେସ ସମର୍ଥକମାନେ ଦଳର ବିଜୟ କାମନା କରୁଥିବା ବେଳେ ଦଳୀୟ ନେତା କଂଗ୍ରେସକୁ ହରାଇବା ଲାଗି କାର୍ଯ୍ୟ କରୁଥିବା ସେମାନେ କହିଛନ୍ତି ।’
ଆପ୍ ସୁପ୍ରିମୋ କହିଛନ୍ତି, ‘ଆପ୍ କେମିତି ହାରିବ ସେନେଇ କଂଗ୍ରେସ ଚାହୁଁଛି ବୋଲି ସେମାନେ କହିଛନ୍ତି । ଏପରିକି କଂଗ୍ରେସ ଆପ୍କୁ ମାତ ଦେବାକୁ ବିଜେପି ସହ ମିଶି କାମ କରୁଛି । କଂଗ୍ରେସ ନେତା ବିଜେପି ବିରୋଧରେ କିଛି କହୁନାହାନ୍ତି ।’ କଂଗ୍ରେସକୁ ଭୋଟ ଦେଲେ ବିଜେପିର ଫାଇଦା ହେବ ବୋଲି ସେମାନଙ୍କୁ କହିଛି ବୋଲି ଦାବି କରିଛନ୍ତି କେଜ୍ରିଓ୍ବାଲ । ଏହା ପୂର୍ବରୁ କଂଗ୍ରେସ ସାଂସଦ ରାହୁଲ ଗାନ୍ଧୀ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ଏବଂ ଆପ୍ର ବରିଷ୍ଠ ନେତା ମନୀଷ ସିସୋଦିଆଙ୍କୁ ଟାର୍ଗେଟ କରିଥିଲେ । ସିସୋଦିଆ ଏବଂ କେଜ୍ରିଓ୍ବାଲ ମଦ ଦୁର୍ନୀତିର ସ୍ରଷ୍ଟା ବୋଲି କହିଥିଲେ ରାହୁଲ ।
ସେ କହିଥିଲେ, କେଜ୍ରିଓ୍ବାଲ ଗୋଟିଏ ଦୁର୍ନୀତିଗ୍ରସ୍ତ ସରକାର ଚଳାଉଛନ୍ତି । ପ୍ରଧାନମନ୍ତ୍ରୀ ମୋଦୀଙ୍କ ଭଳି ସେ ମଧ୍ୟ ମିଛ କହୁଛନ୍ତି । ୫ ବର୍ଷ ପୂର୍ବରୁ ସେ (କେଜ୍ରିଓ୍ବାଲ) କହିଥିଲେ, ଯମୁନାରେ ସ୍ନାନ କରିବେ ଏବ ଏହାର ପାଣି ପିଇବେ । ଏହାରି ମଧ୍ୟରେ ୫ ବର୍ଷ ବିତିଥିବା ବେଳେ ସେ ଏଭଳି କରିପାରିଲେ ନାହିଁ । ଦିଲ୍ଲୀର ଲୋକେ ବିଷାକ୍ତ ପାଣି ପିଇବେ କିନ୍ତୁ କେଜ୍ରିଓ୍ବାଲ ଶୀଶମହଲ୍ରେ ରହିବେ ବୋଲି କହିଥିଲେ ରାହୁଲ ଗାନ୍ଧୀ । ଏହାର ଜବାବରେ କେଜ୍ରିଓ୍ବାଲ ନ୍ୟାସନାଲ୍ ହେରାଲ୍ଡ ମାମଲା ଏବଂ ରବର୍ଟ ଭଦ୍ରାଙ୍କୁ କ୍ଲିନ୍ ଚିଟ୍ କେମିତି ମିଳିଲା ବୋଲି କଂଗ୍ରେସକୁ ପ୍ରଶ୍ନ କରିଛନ୍ତି । ଏକ୍ସରେ କେଜ୍ରିଓ୍ବାଲ କଂଗ୍ରେସକୁ ପ୍ରଶ୍ନ କରିଥିଲେ ଯେ, ‘ମୋଦୀଜୀ ମିଥ୍ୟା ମାମଲାରେ ଲୋକଙ୍କୁ ଜେଲରେ ପୂରାଉଛନ୍ତି । କିନ୍ତୁ ଆପଣଙ୍କ (ରାହୁଲ ଗାନ୍ଧୀ) ପରିବାରର କୌଣସି ସଦସ୍ୟ ଗିରଫ ହୋଇନାହାନ୍ତି । ନ୍ୟାସନାଲ୍ ହେରାଲ୍ଡ ମାମଲା ଭଳି ଆପଣ ସବୁ ମାମଲା ବନ୍ଦ କରିଦେଉଛନ୍ତି କି ? ଆପଣ ଭୟ ଓ ବୀରତା ଉପରେ ଉପଦେଶ ନଦେଲେ ଭଲ ହେବ । ଦେଶ ଜାଣିଛି କିଏ ଭୀରୁ ଏବଂ କିଏ ସାହସୀ ।’
