ନୂଆଦିଲ୍ଲୀ,୩୧/୦୧: ଆଜିଠୁ ସଂସଦର ବଜେଟ୍ ଅଧିବେଶନ ଆରମ୍ଭ ହେବ । ଏହା ଫେବ୍ରୁଆରୀ ୧୩ ପର୍ଯ୍ୟନ୍ତ ଚାଲିବ । ଏହାପରେ ଅଧିବେଶନର ଦ୍ୱିତୀୟ ପର୍ଯ୍ୟାୟ ମାର୍ଚ୍ଚ ୧୦ରୁ ଆରମ୍ଭ ହୋଇ ଏପ୍ରିଲ ୪ରେ ଶେଷ ହେବ । ଶୁକ୍ରବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଭୟ ଗୃହକୁ ସମ୍ବୋଧନ କରି ଭାଷଣ ଦେବା ପରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଅର୍ଥନୈତିକ ସର୍ଭେ ରିପୋର୍ଟ ୨୦୨୫ ଆଗତ କରିବେ । ଫେବ୍ରୁଆରୀ ୧ ବା ଶନିବାର ଅର୍ଥମନ୍ତ୍ରୀ ସାଧାରଣ ବଜେଟ୍ ୨୦୨୫-୨୬ ଉପସ୍ଥାପନ କରିବେ ।
ଅର୍ଥନୈତିକ ସର୍ଭେ ରିପୋର୍ଟରେ ଚଳିତ ଆର୍ଥିକବର୍ଷ (୨୦୨୪-୨୫)ରେ ଘରୋଇ ଅର୍ଥ ବ୍ୟବସ୍ଥା କିଭଳି ଥିଲ। ତାହା ନେଇ ଏକ ମୂଲ୍ୟାୟନ ତଥ୍ୟ ସ୍ଥାନ ପାଇବ । ବଜେଟ୍ ଅଧିବେଶନ ପୂର୍ବରୁ ଗୁରୁବାର କେନ୍ଦ୍ର ସରକାର ସର୍ବଦଳୀୟ ବୈଠକ ଡାକିଥିଲେ । ପ୍ରତିରକ୍ଷା ମନ୍ତ୍ରୀ ରାଜନାଥସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ୩୬ ଦଳର ୫୨ ନେତା ଯୋଗଦେଇଥିଲେ । ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଜେ ପି ନଡ୍ଡା, ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ଓ ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଡ. ଏଲ୍ ମୁରୁଗାନଙ୍କ ବ୍ୟତୀତ ବରିଷ୍ଠ କଂଗ୍ରେସ ନେତା ଜୟରାମ ରମେଶ, ଦଳୀୟ ସାଂସଦ ଗୌରବ ଗୋଗୋଇ, ସପା ସାଂସଦ ରାମଗୋପାଳ ଯାଦବ ପ୍ରମୁଖ ସାମିଲ ହୋଇଥିଲେ ।
ଗୁରୁବାର ସଂସଦ ଅଧିବେଶନ କିଭଳି ସୁଚାରୁ ରୂପେ ଚାଲିବ,ସେଥିପାଇଁ ସଂସଦୀୟ ମନ୍ତ୍ରୀ ରିଜିଜୁ ସର୍ବଦଳୀୟ ବୈଠକ ଡାକିଥିଲେ ।ବୈଠକରେ ଆଲୋଚନା ସଫଳ ହୋଇଥିବା ରିଜିଜୁ କହିଛନ୍ତି । ତାଙ୍କ ମୁତାବକ, ବିରୋଧୀ ପକ୍ଷ ନେତାମାନେ କିଛି ପ୍ରସଙ୍ଗ ଉଠାଇ ତାହା ଉପରେ ଚର୍ଚ୍ଚା ପାଇଁ ଦାବି କରିଥିଲେ । ତେବେ କେଉଁ ପ୍ରସଙ୍ଗ ଉପରେ ଆଲୋଚନା ହେବ, ତାହା କମିଟି ସ୍ଥିର କରିବ । ବଜେଟ୍ ଅଧିବେଶନରେ ସର୍ବମୋଟ ୨୭ଟି ବୈଠକ ରହିବ । ପ୍ରଥମ ଭାଗରେ ୯ଟି ଓ ଦ୍ୱିତୀୟ ଭାଗରେ ୧୮ଟି ରହିବ ।
ବଜେଟ୍ ଅଧିବେଶନରେ କେନ୍ଦ୍ର ସରକାର ୧୬ଟି ବିଲ୍ ଆଣିପାରନ୍ତି । ସେଥିମଧ୍ୟରୁ ୱାକଫ୍ ସଂଶୋଧନ ବିଲ୍ ସମେତ ୧୨ଟି ବିଲ୍କୁ ଗତବର୍ଷ ମୌସୁମୀ ଓ ଶୀତ ଅଧିବେଶନରେ ଅଣାଯାଇଥିଲା । ୪ଟି ନୂଆ ବିଲ୍ ମଧ୍ୟରେ ଫାଇନାନ୍ସ ବିଲ୍, ୨୦୨୫ ବ୍ୟତୀତ ପ୍ରୋଟେକ୍ସନ୍ ଅଫ୍ ଇଣ୍ଟରେଷ୍ଟ ଇନ୍ ଏୟାରକ୍ରାଫ୍ଟ ଅବଜେକ୍ଟସ, ତ୍ରିଭୁବନ ସହକାରୀ ୟୁନିଭର୍ସିଟି ଓ ଇମିଗ୍ରେସନ୍ ଆଣ୍ଡ ଫରେନର୍ସ ବିଲ୍ ଅନ୍ତର୍ଭୁକ୍ତ । ପୁରୁଣା ବିଲ୍ ମଧ୍ୟରୁ ୱାକଫ୍ ସଂଶୋଧନ ବିଲ୍ ସବୁଠୁ ଗୁରୁତ୍ୱପୂର୍ଣ୍ଣ । ଏହାକୁ ଗତ ବର୍ଷ ଅଗଷ୍ଟ ୮ରେ ସଂସଦରେ ଉପସ୍ଥାପନ କରାଯାଇଥିଲା ।
