ନୂଆଦିଲ୍ଲୀ, ୩୧/୦୧: ଉତ୍ତରପ୍ରଦେଶର ପ୍ରୟାଗରାଜରେ ମହାକୁମ୍ଭ ଦଳାଚକଟା ଘଟଣା ପରେ ବର୍ତ୍ତମାନ ଧିରେ ଧିରେ ସୁଧୁରୁଛି ସ୍ଥିତି । ଏନେଇ ପ୍ରଶାସନ ମଧ୍ୟ ଭିଡ଼କୁ ନିୟନ୍ତ୍ରଣ କରିବା ପାଇଁ ଅନେକ ନିୟମରେ ପରିବର୍ତ୍ତନ କରିଛି। ଯାହାଦ୍ବାରା ଶ୍ରଦ୍ଧାଳୁମାନେ ସହଜରେ ଆସି ଏହି ପବିତ୍ର ସ୍ନାନ କରିପାରିବେ । ତେବେ ବର୍ତ୍ତମାନ ମହାକୁମ୍ଭର ୧୮ ଦିନରେ ବର୍ତ୍ତମାନ ୨୭ କୋଟି ୫୮ ଲକ୍ଷରୁ ଅଧିକ ଶ୍ରଦ୍ଧାଳୁ ସ୍ନାନ କରିସାରିଲେଣି। ତେବେ ଏହାରି ମଧ୍ୟରେ ମୌନି ଅମାବାସ୍ୟାରେ ହୋଇଥିବା ଦଳଚକଟା ଘଟଣାର ତଦନ୍ତ କରିବାକୁ ପ୍ରୟାଗରାଜ ଯିବେ ଗଠିତ ନ୍ୟାୟିକ ଆୟୋଗ ।
ଏହା ମଧ୍ୟ ପଢନ୍ତୁ-ଆସ୍ଥାର କେନ୍ଦ୍ରବିନ୍ଦୁ ‘ସଙ୍ଗମ ନୋଜ୍’, ଜାଣନ୍ତୁ କାହିଁକି ତଟରେ ଲାଗେ ଶ୍ରଦ୍ଧାଳୁଙ୍କ ଭିଡ
ତିନି ଜଣ ସଦସ୍ୟ ବିଶିଷ୍ଟ ତଦନ୍ତକାରୀ ଟିମ୍ ଦଳାଚକଟା ଘଟଣାର କାରଣ ଓ କିପରି ହେଲା ଏନେଇ ତଦନ୍ତ କରିବେ । ନ୍ୟାୟିକ ଆୟୋଗର ନେତୃତ୍ବ ପୂର୍ବ ନ୍ୟାୟଧିଶ ହର୍ଷ କୁମାର କରୁଛନ୍ତି। ଏହି ଆୟୋଗର ସଦସ୍ୟରେ ପୂର୍ବ ଆଇଏସ ଡି.କେ ସିଂହ ଓ ପୂର୍ବ ଆଇପିଏସ ବିକି ଗୁପ୍ତା ମଧ୍ୟ ସାମିଲ ଅଛନ୍ତି । ଘଟଣାର ପୂରା ତଦନ୍ତ କରି ଆୟୋଗ ଏକ ମାସ ଭିତରେ ଘଟଣାର ରିପୋର୍ଟ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ହସ୍ତାନ୍ତର କରିବେ । ଏହାରି ମଧ୍ୟରେ ମୁଖ୍ୟ ସଚିବ ମନୋଜ କୁମାର ସିଂହ ଓ ଡ଼ିଜିପି ପ୍ରଶାନ୍ତ କୁମାର ଗୁରୁବାର ଦିନ ମେଳା କ୍ଷେତ୍ରକୁ ପରିଦର୍ଶନ କରିବା ସହ ନୂଆ ସୁରକ୍ଷା ବ୍ୟବସ୍ଥାର ନିର୍ଦ୍ଦେଶ ଦେଇଛନ୍ତି ।
ସେହିପରି ଆଗକୁ ବସନ୍ତ ପଞ୍ଚମୀ ଆସୁଥିବା ବେଳେ ଏଭଳି ଘଟଣା ପୁଣି ଥରେ ନ ହେବା ପାଇଁ ପ୍ରଶାସନ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ପ୍ରକାଶ ଥାଉକି, ମହାକୁମ୍ଭରେ ଲକ୍ଷାଧିକ ଶ୍ରଦ୍ଧାଳୁ ସଙ୍ଗମରେ ବୁଡ଼ ପକାଇବାକୁ ଆସୁଛନ୍ତି । କିନ୍ତୁ ଚଳିତଥର ପ୍ରଶାସନର ସୁରକ୍ଷା ବ୍ୟବସ୍ଥା କଡ଼ାକଡ଼ି ରହିଛି। ଯାହାଫଳରେ ଶ୍ରଦ୍ଧାଳୁମାନେ ବିନା କୌଣସି ଅସୁବିଧାରେ ବୁଡ଼ ପକାଇପାରିବେ । ସେହିପରି କୁମ୍ଭ ପାଇଁ ସ୍ପେଶାଲ ଟ୍ରେନ ସଂଖ୍ୟା ମଧ୍ୟ ବଢିପାରେ ବୋଲି ସୂଚନା ମିଳିଛି।
