ରାଉରକେଲା,୨୩/୦୯:ଚପଲ କିଣିବାକୁ ଯାଇଥିବା ବେଳେ ଗଣଦୁଷ୍କର୍ମ ଶିକାର ହୋଇଛନ୍ତି ମା’ବାପା ଛେଉଣ୍ଡ ଜଣେ ନାବାଳିକା । ଘରେ ଛାଡ଼ି ଦେବାକୁ କହି ୩ ଅଭିଯୁକ୍ତ ତାଙ୍କୁ ଅପହରଣ କରି ନେଇ ପ୍ରାୟ ୨ ଘଣ୍ଟା ଧରି ପାଶବିକ ଅତ୍ୟାଚାର କରିଥିବା ଅଭିଯୋଗ ହୋଇଛି । ପୀଡ଼ିତାଙ୍କ ସହ ଥିବା ଅନ୍ୟ ଜଣେ ବାନ୍ଧବୀ ମଧ୍ୟ ଯୌନରାକ୍ଷସଙ୍କ କବଳରୁ ବର୍ତ୍ତିନାହାନ୍ତି । ତାଙ୍କୁ ଅସଦାଚରଣ କରିବା ସହ ଗଭୀର ମାନସିକ ନିର୍ଯାତନା ଦିଆଯାଇଛି । ମାନବିକତାକୁ ଲଜ୍ଜିତ କରିବା ତଥା ଛାତିକୁ ଦୋହଲାଇ ଦେବା ଭଳି ଘଟଣା ଘଟିଛି ରାଉରକେଲା ସେକ୍ଟର ଅଞ୍ଚଳରେ । ଏଥିରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ପୁଲିସ୍ ମୋବାଇଲ୍ ଟ୍ରାକିଂ କରି ଗିରଫ କରିଛି ।
ପୁଲିସ୍ ସୂଚନା ଅନୁଯାୟୀ, ଝାଡ଼ଖଣ୍ଡର ରାଞ୍ଚିର ସମ୍ପୃକ୍ତ ମା’ ବାପା ଛେଉଣ୍ଡ ନାବାଳିକା (୧୫)ଙ୍କ ଜଣେ ସମ୍ପର୍କୀୟ ରାଉରକେଲାର ସେକ୍ଟର ଅଞ୍ଚଳରେ ରହୁଛନ୍ତି । ରାଞ୍ଚିର ନିକଟ ସମ୍ପର୍କୀୟ ତଥା ବାନ୍ଧବୀ (୧୪) ଙ୍କ ସହ ସେ କୌଣସି କାର୍ଯ୍ୟରେ ରାଉରକେଲା ଆସିଥିଲେ । ଉଭୟେ ସମ୍ପର୍କୀୟଙ୍କ ଘରେ ରହୁଥିଲେ । ଦୁଇ ବାନ୍ଧବୀ ଗତ ଶନିବାର ସନ୍ଧ୍ୟା ପ୍ରାୟ ସାଢ଼େ ୬ଟାରେ ରାଉରକେଲା ମେନ୍ ରୋଡ୍ ମାର୍କେଟ୍କୁ ଚପଲ କିଣିବାକୁ ଯାଇଥିଲେ । ବିର୍ସା ମୁଣ୍ଡା ଛକରେ ଓହ୍ଲାଇ ଚାଲି ଚାଲି ମାର୍କେଟ୍କୁ ଯାଇଥିଲେ । ଚପଲ କିଣି ସାରିବା ପରେ ପୁଣି ବିର୍ସା ମୁଣ୍ଡା ଛକକୁ ଆସିଥିଲେ ।
ଘରକୁ ଫେରିବା ଲାଗି ବସ୍ କିମ୍ବା ଅଟୋରିକ୍ସାକୁ ଅପେକ୍ଷା କରିଥିବାବେଳେ ଗୋପବନ୍ଧୁପାଲି ଅଞ୍ଚଳର ସାଜନ ସିଂ, ରାଜେନ୍ଦ୍ର ସିଂ ଏବଂ ଗାନ୍ଧୀରୋଡ୍ ଅଞ୍ଚଳର ଭୋଲୁ ମୁଣ୍ଡା ଅଟୋରିକ୍ସାରେ ଆସି ସେମାନଙ୍କୁ ଘରେ ଛାଡ଼ି ଦେବାକୁ କହି କୌଶଳକ୍ରମେ ଅପହରଣ କରି ନେଇଥିଲେ । ବିର୍ସା ମୁଣ୍ଡା ଆଥଲେଟିକ୍ ଷ୍ଟାଡିୟମ୍ ଓ ରାଉରକେଲା ବସ୍ଷ୍ଟାଣ୍ଡ ମଧ୍ୟରେ ଥିବା ଏକ ନିଛାଟିଆ ଜାଗାରେ ଛେଉଣ୍ଡ ନାବାଳିକାଙ୍କୁ ଜଣକ ପରେ ଜଣେ ଦୁଷ୍କର୍ମ କରିଥିଲେ । ସାଙ୍ଗରେ ଥିବା ବାନ୍ଧବୀଙ୍କୁ ଅସଦାଚରଣ କରିବା ସହ ଅକଥନୀୟ ଶାରୀରିକ ଓ ମାନସିକ ନିର୍ଯାତନା ଦେଇଥିଲେ । ପ୍ରାୟ ୨ ଘଣ୍ଟା ଧରି ୩ ଅପହରଣକାରୀଙ୍କ କବ୍ଜାରେ ନାବାଳିକା ଦୁଇଜଣ ରହିଥିଲେ । ସେମାନେ ଭୟଭୀତ କରାଇ ଦୁଇ ନାବାଳିକାଙ୍କ ମୋବାଇଲ୍ ନମ୍ବର ସଂଗ୍ରହ କରି ନେଇଥିଲେ । ଘଟଣା ପ୍ରଘଟ କଲେ ଜୀବନରୁ ମାରି ଦେବାକୁ ଧମକ ମଧ୍ୟ ଦେଇଥିଲେ । ଏତିକିରେ ସେମାନେ ଅଟକି ନ ଥିଲେ । ରାତିସାରା ନାବାଳିକାଙ୍କୁ ଦୁଷ୍କର୍ମ କରିବାକୁ ଯୋଜନା କରି ଅପହରଣକାରୀମାନେ ସେମାନଙ୍କ ଅନ୍ୟ ୪ ଜଣ ସାଙ୍ଗକୁ ଡକାଇଥିଲେ । ହେଲେ ସେମାନେ ଆସି ନ ଥିଲେ । ଇତିମଧ୍ୟରେ ଅଭିଯୁକ୍ତମାନେ ଦୁଇ ନାବାଳିକାଙ୍କୁ ଭୟଭୀତ କରାଇ ନିଶାସେବନ କରିବାକୁ ପଳାଇଥିଲେ । ଏହାର ସୁଯୋଗରେ ଦୁଇ ପୀଡ଼ିତା ଖସି ଆସିଥିଲେ ।
ସୂଚନା ପାଇ ସମ୍ପର୍କୀୟମାନେ ପହଞ୍ଚି ସେମାନଙ୍କୁ ଉଦ୍ଧାର କରି ଘରକୁ ଆଣିଥିଲେ । କୌଣସି ସୂତ୍ରରୁ ସୂଚନା ପାଇ ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟା ପ୍ରମିଳା ଦାଶ ପୀଡ଼ିତାଙ୍କ ଘରେ ପହଞ୍ଚିଥିଲେ । ପରେ ପ୍ଲାଣ୍ଟସାଇଟ୍ ଥାନାକୁ ନେଇଥିଲେ । ସେଠାରେ ଲିଖିତ ଅଭିଯୋଗ ପରେ ପୁଲିସ୍ ଦଫା ୭(୨)/୩୫୧(୪) ବିଏନ୍ଏସ୍ ବଳରେ ଏକ ମାମଲା (କେସ୍ ନଂ. ୭୪୨/୨୨ା୯ା୨୦୨୪) ରୁଜୁ କରିଥିଲା । ଅଭିଯୁକ୍ତମାନେ ଧରାପଡ଼ିବା ଭୟରେ ରବିବାର ସକାଳେ ମଧ୍ୟ ପୀଡ଼ିତାଙ୍କୁ ଫୋନ୍ କରି ଧମକାଇଥିଲେ । ଉକ୍ତ ମୋବାଇଲ୍ ନମ୍ବରକୁ ଟ୍ରାକିଂ କରି ପୁଲିସ୍ ଅଭିଯୁକ୍ତଙ୍କ ନିକଟରେ ପହଞ୍ଚିଥିଲା । ସୋମବାର ସମସ୍ତଙ୍କୁ କୋର୍ଟଚାଲାଣ କରାଯିବ ବୋଲି ଡିଏସ୍ପି ନିର୍ମଳ ମହାପାତ୍ର ସୂଚନା ଦେଇଛନ୍ତି । ଏଭଳି ଜଘନ୍ୟ କାଣ୍ଡ ଘଟାଇଥିବା ଅଭିଯୁକ୍ତଙ୍କୁ ଫାଶୀ ଦେବା ଲାଗି ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟା ଶ୍ରୀମତୀ ଦାଶ ଦାବି କରିଛନ୍ତି ।
ସୂଚନାଯୋଗ୍ୟ, ପ୍ରାୟ ସପ୍ତାହକ ତଳେ କୁତ୍ରା ଅଞ୍ଚଳର ଜଣେ ଯୁବତୀ କର୍ମା ପୂଜା ଦେଖିବାକୁ ଯାଇଥିବାବେଳେ ଅନୁରୂପ ଭାବେ ଗଣଦୁଷ୍କର୍ମ ଶିକାର ହୋଇଥିଲେ । ଏହି ଘଟଣାରେ ତାଙ୍କର ଦୁଇ ନିକଟ ସମ୍ପର୍କୀୟଙ୍କ ସମେତ ୩ଜଣ ସାମିଲ ଥିଲେ । ଅଭିଯୁକ୍ତଙ୍କ ମଧ୍ୟରୁ ୨ଜଣ ନାବାଳକ ବୋଲି ପୁଲିସ୍ ତଦନ୍ତରୁ ଜଣାପଡ଼ିଥିଲା । ଏହି ଘଟଣାକୁ ନେଇ ଚର୍ଚ୍ଚା ନ ଥମୁଣୁ ରାଉରକେଲା ସେକ୍ଟର ଅଞ୍ଚଳର ଘଟଣା ମହିଳା ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି ।
