ଭୁବନେଶ୍ୱର,୨୩/୦୯: ପ୍ରସଙ୍ଗ ମାଳମାଳ । କିନ୍ତୁ, ତଗଡ଼ା ସ୍ୱର ଉଠାଇ ପାରୁନି ବିରୋଧୀ ଦଳ । ଭୁବନେଶ୍ୱରରେ କାଁ ଭାଁ ବିକ୍ଷୋଭ, ଧାରଣା ଆଉ ଟିଭି ଆଗରେ ବୟାନବାଜିରେ ଅଟକିଯାଇଛନ୍ତି ବିରୋଧୀ । ମୂଳ କଥା ହେଲା, ଏଯାଏଁ ଅସଜଡ଼ା ଘର ସଜାଡ଼ି ପାରିନାହିଁ ବିରୋଧୀ ଦଳ ।
ନିର୍ବାଚନ ଫଳକୁ ସାଢ଼େ ୩ ମାସ ହୋଇଗଲା । ବିଜେପି ସରକାର ଶହେ ଦିନ ପୂରଣ କରିବା ସହ ସଫଳତାର ଲମ୍ବା ତାଲିକା ଗଣାଇଲାଣି। ଏପଟେ ରାଜ୍ୟ ବିଜେପି ତା’ର ସଭ୍ୟ ସଂଗ୍ରହ ଅଭିଯାନ ଜୋରଦାର କଲାଣି । ମାତ୍ର ପରାଜୟ ଭଉଁରୀରୁ ଆଗକୁ ବଢ଼ିପାରୁନାହାନ୍ତି ବିରୋଧୀ ଦଳ । ଉଭୟ ଦଳର ନେତା, କର୍ମୀ ଅପେକ୍ଷା କରିଛନ୍ତି କେବେ ସରିବ ଘର ସଜଡ଼ା ।
ବିଜେଡିକୁ ପୁଣି ଥରେ ଛିଡ଼ା କରିବାକୁ ଦଳର ମୁଖିଆ ନବୀନ ପଟ୍ଟନାୟକ ପ୍ରୟାସ ଆରମ୍ଭ କରିଛନ୍ତି । ବୈଠକ କରୁଛନ୍ତି, ଭାଷଣ ଦେଉଛନ୍ତି, ବୟାନବାଜି ବି ରଖୁଛନ୍ତି । ହେଲେ ଏଯାଏଁ ଦଳ ନୂଆ କମିଟି ଗଢ଼ିପାରିନି । ଦଳ ନା ରାସ୍ତାକୁ ଓହ୍ଲାଇପାରିଛି ନା ରାଜ୍ୟ କିମ୍ବା ଜିଲ୍ଲାସ୍ତରରେ କିଛି ସାଂଗଠନିକ କାର୍ଯ୍ୟକ୍ରମ ହାତକୁ ନେଇପାରୁଛି ।
କଂଗ୍ରେସ ସ୍ଥିତି ଆହୁରି ଚିନ୍ତାଜନକ । କଂଗ୍ରେସ ରାଜ୍ୟରୁ ଜିଲ୍ଲା ଯାଏଁ ମୁଖିଆ ହୀନ ହୋଇପଡ଼ିଛି । ପିସିସି ସଭାପତି ଚୟନ ସରୁନି । ନା ରାଜ୍ୟସ୍ତରୀୟ କମିଟି ଅଛି ନା ଜିଲ୍ଲାସ୍ତରୀୟ । ଛାମୁଆ ସଂଗଠନ ବି ନାହିଁ ।
ଗତ ଜୁଲାଇ ୮ରୁ ନବୀନ ବିଜେଡିର ରାଜ୍ୟସ୍ତରୀୟ କମିଟି ଭାଙ୍ଗି ଦେଇଛନ୍ତି । ଏହାପରଠାରୁ ବିଜେଡିର ପରିଚାଳନା ଭାର ୧୫ଜଣିଆ ସମନ୍ୱୟ କମିଟି ହାତରେ ଦିଆଯାଇଛି । ଏହି କମିଟି ହିଁ ସବୁ କିଛି କାର୍ଯ୍ୟକ୍ରମର ତଦାରଖ କରୁଛି । ମାତ୍ର ଏହା ସେତେ ପ୍ରଭାବୀ ହୋଇପାରୁନି । ଦଳ ଭିତରେ ଏବେ ଗୋଟିଏ ଚିନ୍ତା-ବିଜେଡିର ଟିକିନିଖି କଥାକୁ କିଏ ବୁଝିବ? ସାଂଗଠନିକ ସମ୍ପାଦକ ପଦବି ରହିବ କି ନାହିଁ? କାହା ହାତରେ ସଂଗଠନ ଭାର ଦେବେ ନବୀନ? ପୂର୍ବ ପ୍ରଭାବଶାଳୀ ଗୋଷ୍ଠୀର ଦବ୍ଦବା ରହିବ ନା କାଟ୍ ଖାଇବ? ବିଜେଡିର ଭବିଷ୍ୟତ ଯୋଜନା ଓ ରୂପରେଖ କେମିତି ରହିବ? ଏମିତି ଅନେକ ପ୍ରଶ୍ନ ଓ ଦ୍ୱନ୍ଦ୍ୱ ବିଜେଡି ନେତା ଓ କର୍ମୀଙ୍କ ମନରେ ।
ଏଭଳି ସ୍ଥିତି ତୃଣମୂଳରେ ଦଳର ସଂଗଠନକୁ ଦୁର୍ବଳ କରୁଛି । ଟିକଟ ବଣ୍ଟନକୁ ନେଇ ଦଳ ଭିତରେ ଥିବା ବିବାଦରୁ ବିଭିନ୍ନ ନିର୍ବାଚନମଣ୍ଡଳୀରେ ଦେଖା ଦେଇଥିବା ଫାଟ ମେଲି ଚାଲିଛି । ଭୁବନେଶ୍ୱର ମଧ୍ୟ ଓ ଏକାମ୍ର ନିର୍ବାଚନମଣ୍ଡଳୀରେ ବିଜେଡିରେ ସୃଷ୍ଟି ହୋଇଥିବା ଫାଟ ଆଉ ଯୋଡ଼ି ହେଲା ଭଳି ସ୍ଥିତିରେ ନାହିଁ । ଛାମୁଆ ସଂଗଠନ ରାଜ୍ୟସ୍ତରୀୟ ସମ୍ମିଳନୀ କରି ପୁଣି ଥରେ ସକ୍ରିୟ ହେବାକୁ ଅଣ୍ଟା ଭିଡ଼ିଛନ୍ତି । ଭୁବନେଶ୍ୱରରେ କାଁ ଭାଁ କାର୍ଯ୍ୟକ୍ରମକୁ ଛାଡ଼ିଦେଲେ, ଦଳର ଆଉ କିଛି କାର୍ଯ୍ୟକଳାପ ଆଖିକୁ ଦେଖାଯାଉନି । ସମସ୍ତେ ଯେମିତି ଅପେକ୍ଷା କରି ରହିଛନ୍ତି, କେବେ ନୂଆ ଟିମ୍ ଗଢ଼ିବେ ନବୀନ । ନବୀନ କାହାକୁ ଭରସିବେ, ତାହା ଉପରେ ପୂରା ଦଳର ନଜର ।
ଗତ ଜୁଲାଇ ୨୧ରୁ ଓଡ଼ିଶାରେ କଂଗ୍ରେସ ତା’ର ସବୁ କମିଟି ଭାଙ୍ଗି ଦେଇଛି । ଏବେ ଦଳରେ ପିସିସି ସଭାପତି ପାଇଁ ଦୌଡ଼ ଚାଲିଛି । ଦେଶରେ କଂଗ୍ରେସର ଉତ୍ଥାନ ଦେଖି ଅନେକ ନେତାଙ୍କ ମନରେ ପିସିସି ସଭାପତି ଲଡ଼ୁ ପାଇଁ ଆଶା ବଢ଼ିଛି । କିଛି ବରିଷ୍ଠ ଏବେ ବି ବାଟ ଛାଡ଼ିବାକୁ ନାରାଜ । ନିଜେ କିମ୍ବା ନିଜ ଗୋଷ୍ଠୀର କାହାକୁ ପିସିସି ସଭାପତି କରିବାକୁ ବରିଷ୍ଠ ନେତାଏ ଏକାଠି ହୋଇଛନ୍ତି । ପିସିସି ସଭାପତି ଦୌଡ଼ରେ ମହମ୍ମଦ ମୋକିମ, ଶ୍ରୀକାନ୍ତ ଜେନା, ଭକ୍ତଚରଣ ଦାସଙ୍କ ନାମକୁ ନେଇ ସର୍ବାଧିକ ଚର୍ଚ୍ଚା ଚାଲିଛି । ସାଂସଦ ସପ୍ତଗିରି ଉଲାକାଙ୍କୁ ଝାଡ଼ଖଣ୍ଡର ସହପ୍ରଭାରୀ ଦାୟିତ୍ୱ ମିଳିଥିବାବେଳେ ସେ ଦୌଡ଼ରେ ନଥିବା କୁହାଯାଉଛି । ମାତ୍ର ଦିଲ୍ଲୀରେ ତାଙ୍କ ଦବ୍ଦବା ସବୁଠାରୁ ବେଶି ।
ଏଭଳି ସ୍ଥିତିରେ ସପ୍ତିଗିରିଙ୍କ ସମର୍ଥନ ଯାହାକୁ ରହିବ, ତାଙ୍କ ସମ୍ଭାବନା ଅଧିକ ବୋଲି କୁହାଯାଉଛି । ବିଧାୟକ ଦଳ ନେତା ଚୟନରେ ସପ୍ତଗିରି ନିଜ ଦବ୍ଦବା ଜାହିର କରିଥିଲେ । କଂଗ୍ରେସର ରାଜ୍ୟ, ଜିଲ୍ଲା ଓ ଛାମୁଆ ସଂଗଠନ ନଥିବାବେଳେ ୧୪ଜଣିଆ ଷ୍ଟିୟରିଂ କମିଟି ହାତରେ ପୂରା ଦଳର ସଂଗଠନ ଭାର ଦେଇଛି ଏଆଇସିସି । ବଡ଼ ସମାବେଶ କିମ୍ବା ବିକ୍ଷୋଭ ହେଲେ ମୋକିମଙ୍କ କାନ୍ଧରେ ଦଳ ଭାର ଦେଉଛି । ହେଲେ ଭୁବନେଶ୍ୱର ବାହାରେ ଦଳ ସେଭଳି କିଛି ବଡ଼ କାର୍ଯ୍ୟକ୍ରମ ଏଯାଏଁ ହାତକୁ ନେଇପାରିନି । ଅନେକ ନିର୍ବାଚନମଣ୍ଡଳୀ ଯେମିତି ନେତା ଶୂନ୍ୟ ଅବସ୍ଥାରେ ରହିଛି । ସମସ୍ତେ ଅପେକ୍ଷା କରି ରହିଛନ୍ତି, କିଏ ଧରିବ ମଙ୍ଗ ।