କଣ୍ଟାବାଞ୍ଜି,୨୩/୦୯: ଘରୋଇ ସ୍କୁଲର ମହିଳା ଆକାଉଣ୍ଟାଣ୍ଟଙ୍କୁ ହତ୍ୟା! ନିଜ ସ୍ୱାମୀ ହତ୍ୟା କରି ଆତ୍ମହତ୍ୟାର ରୂପ ଦେଇଥିବା ଅଭିଯୋଗ ଆଣିଲେ ମହିଳାଙ୍କ ବାପଘରଲୋକେ । ମୃତ ମହିଳା ଜଣକ ଇତିଶ୍ରୀ ବେହେରା ଏବଂ ତାଙ୍କ ସ୍ୱାମୀ ଦେବଦ୍ବୀପ ବେହେରା ବୋଲି ଜଣାପଡ଼ିଛି । ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ଥାନା ଅଞ୍ଚଳରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ଇତିଶ୍ରୀ ଏବଂ ତାଙ୍କ ସ୍ୱାମୀ ଦେବଦ୍ବୀପଙ୍କ ମଧ୍ୟରେ ଅନେକ ସମୟରେ ବ୍ୟକ୍ତିଗତ କାରଣରୁ କଳହ ସୃଷ୍ଟି ହେଉଥିଲା । ତେବେ ସୋମବାରରେ ଇତିଶ୍ରୀଙ୍କ ମୃତଦେହ ଉଦ୍ଧାର କରାଯାଇଛି । ଏନଇ ଇତିଶ୍ରୀଙ୍କ ବାପଘରଲୋକେ କଣ୍ଟାବାଞ୍ଜି ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ସେମାନେ ନିଜ ଜ୍ୱାଇଁଙ୍କ ନାଁରେ ହତ୍ୟା ଅଭିଯୋଗ ଆଣିଛନ୍ତି । ଦେବଦ୍ବୀପ ତାଙ୍କ ସ୍ତ୍ରୀ ଇତିଶ୍ରୀଙ୍କୁ ହତ୍ୟା କରି ଆତ୍ମହତ୍ୟାର ରୂପ ଦେଇଥିବା ଅଭିଯୋଗ କରିଛନ୍ତି ମହିଳାଙ୍କ ବାପଘରଲୋକେ । 

ଅନ୍ୟପଟେ ଏହି ଅଭିଯୋଗ ଆଧାରରେ ଘଟଣାସ୍ଥଳରେ କଣ୍ଟାବାଞ୍ଜି ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ସ୍ବାମୀ ଦେବଦ୍ବୀପ ବେହେରାକୁ ମଧ୍ୟ ଅଟକ ରଖିଛି । ଏହି ଘଟଣା ସମ୍ପର୍କରେ ତାଙ୍କୁ ପଚରାଉଚରା କରି ଚଦନ୍ତ ଆରମ୍ଭ କରିଛି ପୋଲିସ ।