ବଲାଙ୍ଗୀର, ୧୦।୯ : ବଲାଙ୍ଗୀର ମାଲଗୋଦାମ ପଡାରେ  ଗୋଷ୍ଠୀ ସଂଘର୍ଷରେ ଜଣଙ୍କର ମୃତ୍ୟୁ ଘଟିଛି। ଏହି ଘଟଣା  ପରେ ମାଲଗୋଦାମପଡା  ଉତ୍ତେଜନା ଦେଖା ଦେଇଛି।  ଥାନାରେ ଅଟକ ଥିବା ଜଣଙ୍କ ଘର ଉପରକୁ ପଡାବାସୀ ଆକ୍ରମଣ କରିଥିଲେ।  ଫଳରେ ମାଲଗୋଦାମ ପଡାକୁ  ପୋଲିସ ଛାଉଣୀରେ ରଖାଯାଇଛି । ଘଟଣା ସ୍ଥଳରେ ଆଡିସିନାଲ ଏସପିଙ୍କ ନେତୃତ୍ୱରେ ୧ ପ୍ଲାଟୁନ ଫୋର୍ସ, ୪ ଜଣ ଆଇଆଇସି ଓ ଏସଡିପିଓ ଉପସ୍ଥିତ ଅଛନ୍ତି। 

ସୋମବାର  ରାତିରେ ବଲାଙ୍ଗୀର ସହର ମାଲଗୋଦାମ ପଡାରେ ପୂର୍ବ ଶତ୍ରୁତାକୁ ନେଇ  ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିଲା l ଏଥିରେ ମାଲଗୋଦାମ ପଡାର ନିରଜ ହରପାଳ ଓ  ଅନ୍ୟମାନେ  ଗୁରୁତର ହୋଇଥିଲେ। ସେମାନଙ୍କୁ ବଲାଙ୍ଗୀର ଭୀମଭୋଇ ମେଡ଼ିକାଲକୁ ଅଣାଯାଇଥିଲା । ସେଠାରେ ନିରଜଙ୍କୁ ମୃତ ଘୋଷଣା କରିଥିଲେ ଡାକ୍ତର।  ଖବରପାଇ ବଲାଙ୍ଗୀର ପୋଲିସ ଓ ଏସପି ଘଟଣା ସ୍ଥଳରେ ପହଞ୍ଚି ଥିଲେ । ଏହି ଘଟଣାରେ ୪ ଜଣଙ୍କୁ ଉଠାଇ ଆଣି ପୋଲିସ ଅଟକ ରଖିଛି । 

ଏହି ଘଟଣା ପରେ ମାଲଗୋଦାମ ପଡାରେ ଉତ୍ତେଜନା ଦେଖା ଦେଇଛି। ପଡାବାସୀ ଅଟକ ଥିବା ଜଣେ ବ୍ୟକ୍ତିଙ୍କ ଘର ଉପରକୁ ଆକ୍ରମଣ  କରିବାକୁ ଉଦ୍ୟମ କରିଥିଲେ। ଉକ୍ତ ବ୍ୟକ୍ତିଙ୍କ ଘରକୁ ପୋଲିସ ଛାଉଣୀରେ ରଖାଯାଇଛି। ପରିସ୍ଥିତିକୁ ଦୃଷ୍ଟିରେ ରଖି ମାଲଗୋଦାମ ପଡାରେ ପୋଲିସ ଫୋର୍ସ ମୃତୟନ କରାଯାଇଛି।