ପାଟଣାଗଡ଼,୦୫/୦୯: ଲାଠୋର ପୋଲିସର ବଡ଼ ସଫଳତା । ବନ୍ଧୁକ ଦେଖାଇ ଲୁଟ କରିଥିବା ତିନିଜଣ ଲୁଟେରାଙ୍କୁ ଗିରଫ କରି କୋର୍ଟ ଚାଲାଣ କରିଲା ଲାଠୋର ପୋଲିସ । ଗିରଫ ଅଭିଯୁକ୍ତ ହେଉଛନ୍ତି  ଟଙ୍କପାଣି ଗ୍ରାମର ପୃଥ୍ୱୀରାଜ ବାଗ, ରାକେଶ ଓରଫ ଗୋରେଖ କରିଆଁ ଏବଂ ଜଣେ ନାବାଳକ । ସେମାନଙ୍କ ନିକଟରୁ ଦୁଇଟି ଦେଶୀ ବନ୍ଧୁକ, ଗୋଟିଏ ମୋବାଇଲ ଏବଂ ତିନି ହଜାର ଟଙ୍କା ଜବତ କରାଯାଇଛି । ବଲାଙ୍ଗୀର ଜିଲ୍ଲା ପାଟଣଗଡ଼ ବ୍ଲକ୍‌ ଅନ୍ତର୍ଗତ ଲାଠୋର ଥାନା ଅଞ୍ଚଳର ବୁଢାଛାପର ଗାଁର ଗୋପାଳ ବିଶ୍ୱାଳଙ୍କ ଠାରୁ ଏହି ଲୁଟ୍‌ ହୋଇଥିଲା । 

ସୂଚନା ମୁତାବକ, ଚଳିତ ମାସ ୨ତାରିଖରେ ଲାଠୋର ଥାନା ବୁଢାଛାପର ଗାଁର ଗୋପାଳ ବିଶ୍ଵାଳ ଲାଠୋର ରୁ ନିଜ ଗାଁକୁ ଫେରୁଥିଲେ । ଏହି ସମୟରେ ଟଙ୍କପାଣି ଗ୍ରାମପଞ୍ଚାୟତ ନିକଟରେ ତିନିଜଣ ଦୁର୍ବୃତ୍ତ ଗୋପାଳଙ୍କୁ  ବନ୍ଧୁକ ଦେଖାଇ ମାଡ଼ ମାରିବା ସହ ୬ହଜାର ଟଙ୍କା ଲୁଟି ନେଇଥିଲେ । ପରେ ଏନେଇ ଗୋପାଳ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ତଦନ୍ତ କରି ଟଙ୍କପାଣି ଗ୍ରାମର ପୃଥ୍ୱୀରାଜ ବାଗ, ରାକେଶ ଓରଫ ଗୋରେଖ କରିଆଁଙ୍କ ସହ ଜଣେ ନାବାଳକକୁ ଗିରଫ କରି କୋର୍ଟ ଚାଲାଣ କରିଛି ଲାଠୋର ପୋଲିସ । ସେମାନଙ୍କ ନିକଟରୁ ଦୁଇଟି ଦେଶୀ ବନ୍ଧୁକ, ଗୋଟିଏ ମୋବାଇଲ ଏବଂ ତିନି ହଜାର ଟଙ୍କା ଜବତ ହୋଇଥିବା ସୂଚନା ଦେଇଛନ୍ତି ପାଟଣାଗଡ଼ ଏସ୍‌ଡିପିଓ ସଦାନନ୍ଦ ପୂଜାରୀ l