କଣ୍ଟାବାଞ୍ଜି,୧୭/୦୮: ନିର୍ମାଣଧୀନ ସ୍କୁଲ କୋଠା ପଛରେ ଥିବା ୧୪ ଫୁଟିଆ ପାଣି ଭର୍ତ୍ତି ଖାଲରୁ ନିଖୋଜ ଯୁବକଙ୍କ ମୃତ ଦେହ ଉଦ୍ଧାର ।ମୃତକ ଯୁବକ ଜଣକ ବଡ଼ବାଙ୍କି ଗାଁର ଜଳନ୍ଧର ମାଝୀ ବୋଲି ଜଣାପଡ଼ିଛି । କଣ୍ଟାବାଞ୍ଜିର ତୁରେକେଲା ଥାନା ବଡ଼ବାଙ୍କି ଗାଁରେ ଏଭଳି ଅମାନୁସିକ ଦୃଶ୍ୟ ଦେଖିବାକୁ ମିଳିଛି । 

ସୂଚନା ଅନୁଯାୟୀ, ଜଳନ୍ଧର ଶୁକ୍ରବାର ସନ୍ଧ୍ୟାରୁ ନିଖୋଜ ଥିଲେ । ତେବେ ଶନିବାର ନିର୍ମାଣଧୀନ ସ୍କୁଲ କୋଠା ପଛରେ ଥିବା ୧୪ ଫୁଟିଆ ପାଣି ଭର୍ତ୍ତି ଖାଲରୁ ଯୁବକଙ୍କ ମୃତ ଦେହ ଉଦ୍ଧାର କରାଯାଇଛି । ଏହି ସ୍କୁଲ କୋଠା ନିର୍ମାଣ କାମରେ କିଛି ବାହାର ରାଜ୍ୟର ଶ୍ରମିକ ନିୟୋଜିତ ହୋଇଥିଲେ । ତେବେ ସେମାନେ ମଧ୍ୟ ସେଠାରେ ନଥିବା ଯୋଗୁଁ ଯୁବକଙ୍କ ହତ୍ୟା ହୋଇଥିବା ସନ୍ଦେହ କରାଯାଉଛି । ତେବେ ଶନିବାର ଗାଁର ଜଣେ ଲୋକ ପାଣି ଭିତରେ ମୃତ ଦେହ ପଡ଼ିଥିବା ଦେଖିବାକୁ ପାଇଥିଲେ । ଏହା ଦେଖି ସେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ତୁରେକେଲା ପୋଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ଅଗ୍ନିଶମ ବାହିନୀଙ୍କ ସାହାଯ୍ୟରେ ପାଣି ଭର୍ତ୍ତି ଖାଲରୁ ମୃତ ଦେହ ଉଦ୍ଧାର କରାଯାଇଛି । ତେବେ ଏହା ଏକ ହତ୍ୟା ନା ଆତ୍ମହତ୍ୟା ତାହା ତଦନ୍ତ ପରେ ଜଣା ପଡିବ ବୋଲି ପୋଲିସ ଏସଡିପିଓ କହିଛନ୍ତି ।