କଣ୍ଟାବାଞ୍ଜି,୦୭/୦୯: ସାଙ୍ଗମାନଙ୍କ ସହ ନଦୀକୁ ଗାଧୋଇବାକୁ ଯାଇଥିବା ବେଳେ ପାଣିରେ ବୁଡି ଛାତ୍ର ମୃତ । ମୃତକ ଜଣକ ପିତାମ୍ବର ବେହେରାଙ୍କ ପୁଅ ମୁକେଶ ବେହେରା (୧୫) ବୋଲି ଜଣାପଡ଼ିଛି । ଶନିବାର ବଙ୍ଗୋମୁଣ୍ଡା ବ୍ଲକ ତୁରେକେଲା ଗାଁରେ ଏଭଳି ଅଭାବନୀୟ ଘଟଣା ଘଟିଛି । 

ସୂଚନା ମୁତାବକ, ମୁକେଶ ତାଙ୍କ  ସାଙ୍ଗସାଥୀ ମାନଙ୍କ ସହ ଗାଁ ପାଖ ପାଖ ନଦୀକୁ ଗାଧୋଇବାକୁ ଯାଇଥିଲେ ।  ନଦୀ ପାଖରେ ଥିବା ଏକ ବଡ଼ ପଥର ଉପରକୁ ଚଢ଼ି  ଗଭୀର ପାଣିକୁ ଡେଇଁଥିଲେ । ଏହି ସମୟରେ ସେ ପାଣିରେ ବୁଡ଼ିଯାଇଥିଲେ । ଏହା ଦେଖି ମୁକେଶଙ୍କ ସାଙ୍ଗମାନେ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ । ସେଥିରେ ଅସଫଳ ହେବାରୁ ସ୍ଥାନୀୟଲୋକଙ୍କୁ ସାହାଯ୍ୟ ପାଇଁ ଡାକି ଆଣିଥିଲେ । ପରେ ସ୍ଥାନୀୟଲୋକେ ସେଠାରେ ଖୋଜାଖୋଜି କରି ମୁକେଶଙ୍କୁ ନଦୀରୁ ଉଦ୍ଧାର କରିଥିଲେ । ସେଠାରୁ ତାଙ୍କୁ ତୁରନ୍ତ ଖରିଆର ମିଶନ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ମୁକେଶ ପ୍ରାଣ ହରାଇଥିବା ଡାକ୍ତର ଘୋଷଣା କରିଥିଲେ । ଏହି ଘଟଣା ସମ୍ପର୍କରେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି  ମୃତଦେହ ଜବତ କରିଥିଲା ।  ଏହା ପରେ  ଏକ ଅପମୃତ୍ୟୁ ମାମଲା ରୁଜୁ କରି  ପୋଲିସ ତଦନ୍ତ ଆରମ୍ଭ କରିଛି । ଏଥି ସହିତ ମୃତକଙ୍କ ପରିବାରକୁ ଶବ ସତ୍କାର  କରିବାକୁ ଦେଇଥିଲା । ପିତାମ୍ବର ବେହେରାଙ୍କ ତିନୋଟି ଝିଅ ଆଉ ଗୋଟିଏ ପୁଅ ରହିଥିବା ବେଳେ ପୁଅର ଏଭଳି ଭାବରେ ମୃତ୍ୟୁ ହୋଇଥିବାରୁ ଭାଙ୍ଗି ପଡ଼ିଛନ୍ତି ପରିବାର ଲୋକେ।