ଟିଟିଲାଗଡ,୨୦।୮: ଟ୍ରେନ ସମ୍ମୁଖକୁ ଡେଇଁ ପ୍ରେମୀ ଯୁଗଳଙ୍କ ଆତ୍ମହତ୍ୟା ଉଦ୍ୟମ। ଘଟଣାସ୍ଥଳରେ ନାବାଳିକା ପ୍ରେମିକାର ମୁତ୍ୟୁ ହୋଇଥିବା ବେଳେ ପ୍ରେମିକ ଜଣକୁ ଗୁରୁତର ଅବସ୍ଥାରେ ଟିଟିଲାଗଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପ୍ରେମିକର ଅବସ୍ଥା ସଂକଟାପନ୍ନ ହେବାରୁ ବଲାଙ୍ଗୀର ଭୀମଭୋଇ ମେଡିକାଲକୁ ସ୍ଥାନାନ୍ତରିତ କରାଯାଇଛି। ଗୁରୁତର ଯୁବକ ଜଣକ ହେଉଛନ୍ତି କଳାହାଣ୍ଡି ଜିଲ୍ଲା କେସିଙ୍ଗା ଥାନା ଅନ୍ତର୍ଗତ ବିନେକେଲା ଗାଁର ଘନଶ୍ୟାମ ବାଗ ।  

କଳାହାଣ୍ଡି ଜିଲ୍ଲା କେସିଙ୍ଗା ଥାନା ଅନ୍ତର୍ଗତ ବିନେକେଲା ଗାଁର  ଘନଶ୍ୟାମ ବାଗ  ଜଣେ ନାବାଳିକାକୁ ପ୍ରେମ କରୁଥିଲେ। ପ୍ରେମ ବିବାହକୁ ସ୍ବୀକୃତି ନମିଳିବାରୁ ଉଭୟ ଆତ୍ମହତ୍ୟା କରିବାକୁ  ନିଷ୍ପତ୍ତି ନେଇଥିଲେ।  ଟିଟିଲାଗଡ଼ରୁ କେସିଙ୍ଗା ଯାଇଥିବା ଟ୍ରେନ ଲାଇନ ଲୁଥୁରବନ୍ଧ ନିକଟ ତେଲ ନଦୀ ରେଲଓ୍ବେ ବ୍ରିଜ ଉପରେ  ଥିବା ୨୧୪ ନଂ ଖୁଣ୍ଟ ନିକଟରେ ଉଭୟ ଏକ ମାଲବାହୀ ଟ୍ରେନ ଆଗକୁ ଡେଇଁ ପଡିଥିଲେ । ନାବାଳିକା ଜଣକ ଟ୍ରେନ ସମ୍ମୁଖରେ ପଡିଯିବାରୁ ଘଟଣାସ୍ଥଳରେ ହିଁ ମୁତ୍ୟୁ  ହୋଇଥିଲା । ଘନଶ୍ୟାମ  ଟ୍ରେନ ଧକ୍କାରେ ଛିଟିକି  ପଡି ରେଲଓ୍ବେ ଟ୍ରାକ ପାଖରେ ଗୁରତର ଅବସ୍ଥାରେ ପଡିଥିଲେ ।  ମାଲବାହୀ ଟ୍ରେନର ଡ୍ରାଇଭର ଗାଡି ଅଟକାଇ ଗୁରୁତର ଯୁବକଙ୍କୁ ମାଲବାହୀ ଟ୍ରେନରେ ଟିଟିଲାଗଡ଼ ଷ୍ଟେସନକୁ ଆଣି ରେଲବାଇ ପୋଲିସକୁ ହସ୍ତାନ୍ତର କରିଥିଲେ ।  ଯୁବକଙ୍କୁ ତୁରନ୍ତ ଟିଟିଲାଗଡ଼ ଡାକ୍ତରଖାନାକୁ ଅଣାଯାଇଥିଲା। ରେଲବାଇ ପୋଲିସ ଏହାର ଅଧିକ  ତଦନ୍ତ ଜାରି ରଖିଛି ।