ନୂଆଦିଲ୍ଲୀ: ଲମ୍ବା ସମୟ ଧରି ଚୀନ୍ ସମୁଦ୍ରରେ ଏହାର ପ୍ରଭାବ ବିସ୍ତାର କରିବାରେ ଲାଗିଛି । ଆଉ ଏବେ ଏହାର ତିନୋଟି ଯୁଦ୍ଧ ଜାହାଜକୁ ସମୁଦ୍ରରେ ଚକ୍କର କାଟିବାକୁ ପଠାଇଛି । ଚୀନ୍ର ଏପରି ହରକତ୍ ପାଇଁ ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡ ସତର୍କତା ଅବଲମ୍ବନ କରିଛନ୍ତି। ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡ ଏହାର ପୂର୍ବତଟ ପାଖରେ ଅନ୍ତରାଷ୍ଟ୍ରୀୟ ଜଳକ୍ଷେତ୍ରରେ ଦେଖାଯାଉଥିବା ଚୀନ୍ ନୌସେନାର ତିନୋଟି ଯୁଦ୍ଧଜାହାଜର ଅସାମାନ୍ୟ ବ୍ୟବହାର ଉପରେ କଡା ନଜର ରଖିଛନ୍ତି। ଉଭୟ ଦେଶର ରକ୍ଷାମନ୍ତ୍ରୀ ଏହି ଘଟଣା ଉପରେ ବୟାନ ଜାରି ରଖିଛନ୍ତି ।
ଗତ ସପ୍ତାହରେ ଅଷ୍ଟ୍ରେଲିଆର ମୁଖ୍ୟଭୁମି ଉପକୁଳରେ ଗୋଟିଏ ଫ୍ରିଗେଟ, ଗୋଟିଏ କ୍ରୁଜର ଏବଂ ଗୋଟିଏ ଯୋଗାଣ ଟ୍ୟାଙ୍କରକୁ ଦେଖିବାକୁ ମିଳିଥିଲା। ଏହି ଯୁଦ୍ଧ ଜାହାଜ ଗୁଡିକ ଏବେ ପୂର୍ବ ଉପକୂଳ ସହ ଭିତର ଆଡକୁ ଗତି କରୁଛି ଏବଂ ରିପୋର୍ଟ ଅନୁସାରେ ଏହା ସିଡନୀ ଠାରୁ ୧୫୦ ସମୁଦ୍ର ମାଇଲ୍ (୨୭୮ କିମି) ପୂର୍ବରେ ରହିଛି।
ଅଷ୍ଟ୍ରେଲିଆର ରକ୍ଷାମନ୍ତ୍ରୀ ରିଚର୍ଡ ମାର୍ଲସ କହିଛନ୍ତି ଯେ, ଆମେ ଏହା ଉପରେ କଡା ନଜର ରଖିଛୁ ଏବଂ ଏହାର ପ୍ରତିଟି ଗତିବିଧି ଉପରେ ତଦାରଖ କରୁଛୁ । ସେ ଏହା ବି ସ୍ପଷ୍ଟ କରିଛନ୍ତି ଯେ,ଏହି ଯୁଦ୍ଧ ଜାହାଜ ଗୁଡିକ କୌଣସି ପ୍ରକାରେ ବିପଦପୂର୍ଣ୍ଣ ନୁହଁନ୍ତି ଏବଂ ଅନ୍ତର୍ଜାତୀୟ ଆଇନ୍ ଆଧାରରେ ଜଳକ୍ଷେତ୍ରରେ ଗତିବିଧି ଜାରି ରଖିଛି।
ସେହିପରି ନ୍ୟୁଜିଲ୍ୟାଣ୍ଡର ରକ୍ଷାମନ୍ତ୍ରୀ ଜୁଡିଥ୍ କୋଲିନ୍ସ କହିଛନ୍ତି ଯେ, ତାଙ୍କ ଦେଶର ସେନା ଏହି ଯୁଦ୍ଧ ଜାହାଜ ଗୁଡିକ ଉପରେ କଡା ନଜର ରଖିଛନ୍ତି । ତେବେ ଚୀନ୍ ସରକାର ଆମକୁ ଏହା ଉପରେ କୌଣସି ସୂଚନା ଦେଇ ନାହାନ୍ତି।
