ନୂଆଦିଲ୍ଲୀ: ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧ ବିରତି ନେଇ ଚୁକ୍ତି ହେବା ପରେ ମଧ୍ୟପ୍ରାଚ୍ୟରେ ଏକପ୍ରକାର ଅଶାନ୍ତି ଥମିଥିଲା । କିନ୍ତୁ ଏବେ ହମାସର ଗୋଟିଏ ଭୁଲ ପାଇଁ ପୁଣି ଥରେ ଯୁଦ୍ଧର ତୀବ୍ରତା ବଢ଼ିପାରେ ବୋଲି ଆଶଙ୍କା ପ୍ରକାଶ ପାଇଛି । ଗୁରୁବାର ହମାସ ଯେଉଁ ୩ ପଣବନ୍ଦୀଙ୍କ ମୃତଦେହ ହସ୍ତାନ୍ତର କରିଥିଲା ସେଥିମଧ୍ୟରେ ଜଣେ ଗାଜା ମହିଳାଙ୍କ ମରଶରୀର ଥିବା ନେଇ ଦାବି ହୋଇଛି ।
ଇସ୍ରାଏଲୀ ବନ୍ଧକ ଏବଂ ଦୁଇ ପିଲାର ମା’ ଶିରି ବିବାସଙ୍କର ମୃତଦେହ ବଦଳରେ ହମାସ ଆତଙ୍କବାଦୀ ଗାଜାର ଜଣେ ମହିଳାଙ୍କ ମୃତଦେହ ଦେଇଛନ୍ତି ବୋଲି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଦାବି କରିଛନ୍ତି । ଏହାର ଭୟଙ୍କର ପରିଣାମ ହମାସକୁ ଭୋଗିବାକୁ ପଡ଼ିବ ବୋଲି ସେ ଚେତାବନୀ ମଧ୍ୟ ଦେଇଛନ୍ତି ।
ହମାସର ଭୁଲ ହସ୍ତାନ୍ତରକୁ ଅସ୍ତ୍ରବିରତି ଚୁକ୍ତିନାମାର ଉଲ୍ଲଂଘନ ଭାବରେ ସମାଲୋଚନା କରି ନେତାନ୍ୟାହୁ ଚେତାବନୀ ଦେଇଛନ୍ତି ଯେ, ହମାସ ଏହି କାର୍ଯ୍ୟର ସମ୍ପୂର୍ଣ୍ଣ ମୂଲ୍ୟ ଦେବ । ଆମେ ଆମର ସମସ୍ତ ବନ୍ଧକଙ୍କୁ (ଜୀବିତ ଏବଂ ମୃତ) ଘରକୁ ଆଣିବା ପାଇଁ ଦୃଢ଼ ସଂକଳ୍ପ ସହିତ କାର୍ଯ୍ୟ କରିବୁ ।
ଗୁରୁବାର ହମାସ ୩ଟି ମୃତଦେହ ଫେରାଇ ଦେଇଥିବା ଦାବି କରିଛି । ଯେଉଁଥିରେ ଜଣେ ମା ଏବଂ ତାଙ୍କ ଦୁଇ ପିଲା ସାମିଲ ଥିଲେ । ଉଲ୍ଲେଖଯୋଗ୍ୟ, ଇସ୍ରାଏଲୀ ପ୍ରତିରକ୍ଷା ବାହିନୀ ଅନୁସାରେ, ଦୁଇ ପୁଅ ଏରିଏଲ୍ ଏବଂ କଫିର୍ ବିବାସଙ୍କ ମୃତଦେହକୁ ଚିହ୍ନଟ କରାଯାଇଛି । କିନ୍ତୁ ତୃତୀୟ ମୃତଦେହ ସେମାନଙ୍କ ମା’ କିମ୍ବା ଅନ୍ୟ କୌଣସି ବନ୍ଧକଙ୍କର ନୁହେଁ ।
ସେପଟେ ମୃତ ବନ୍ଧକଙ୍କ ବଳିଦାନକୁ ମନେପକାଇ ନେତାନ୍ୟାହୁ କହିଛନ୍ତି, ‘ଏରିଏଲ୍ ଏବଂ କଫିର୍ ବିବାସଙ୍କ ପବିତ୍ର ସ୍ମୃତି ସବୁଦିନ ପାଇଁ ଜାତିର ହୃଦୟରେ ଲିପିବଦ୍ଧ ହୋଇ ରହିବ । ଇଶ୍ବର ସେମାନଙ୍କ ହତ୍ୟାର ପ୍ରତିଶୋଧ ନିଅନ୍ତୁ। ଆମେ ମଧ୍ୟ ପ୍ରତିଶୋଧ ନେବୁ ।’
