ବାଙ୍ଗିରିପୋଷି,୨୪/୧୦ : ବାଙ୍ଗିରିପୋଷି ଥାନା ଅନ୍ତର୍ଗତ ଦିଘି ଗ୍ରାମ ପଞ୍ଚାୟତ ଦୋରକଣ୍ଟିଆ ଗ୍ରାମରେ ସୃଷ୍ଟି ହେଇଛି ଅଭାବନୀୟ ପରିସ୍ଥିତି । ଜନୈକ ପରିବାର ପୂର୍ବରୁ ଗ୍ରାମରେ କରାଯାଇଥିବା ୨୫୦୦୦ଟଙ୍କା ଜରିମାନା ଦେଇ ନ ଥିବାରୁ ଶବ ସଂସ୍କାର ଲାଗି ଗ୍ରାମବାସୀମାନେ ମୃତଦେହ ନ ଛାଡି ଶବକୁ ୨୪ ଘଣ୍ଟାରୁ ଊର୍ଦ୍ଧ୍ବ ସମୟ ଧରି ଅଟକ ରଖିଥିଲେ ।
ସୂଚନା ଅନୁସାରେ, ଗାଁର ସୁନ୍ଦର ମୋହନ ମାର୍ଣ୍ଡିଙ୍କ ସ୍ତ୍ରୀ ସାକ୍ରମଣି ମାର୍ଣ୍ଡିଙ୍କ ଗତ ୨୩ତାରିଖ ସନ୍ଧ୍ୟା ୬ ଟା ସମୟରେ ମୃତ୍ୟୁ ହୋଇଥିଲା । ତେବେ ପୂର୍ବରୁ ଶ୍ରୀ ମାର୍ଣ୍ଡିଙ୍କୁ ଆଦିବାସୀ ସମାଜ ନିୟମ ଅନୁସାରେ ଜରିମାନା କରିଥିବା ୨୫ ହଜାର ଟଙ୍କା ଦେଇ ନ ଥିବା ଦର୍ଶାଇ ଗ୍ରାମବାସୀମାନେ ଠେଙ୍ଗା, ବାଡି ଧରି ଶବକୁ ଅଟକ ରଖି ଶବ ସତ୍କାର ପାଇଁ ଛାଡି ନ ଥିଲେ।
ଖବରପାଇ ବାଙ୍ଗିରିପୋଷି ଥାନା ଅଧିକାରୀ ରୋଜାଲିନ ବେହେରା ଏବଂ ଅତିରିକ୍ତ ତହସିଲଦାର ଦାମୋଦର ପ୍ରଧାନ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ଶେଷ ଖବର ସୁଦ୍ଧା ଗ୍ରାମବାସୀମାନେ ନିଜ ଜିଦରେ ଅଟଳ ଥିବା ବେଳେ ମୃତକଙ୍କ ଶବ ସତ୍କାର ହୋଇ ନ ପାରି ଅଧା ରାସ୍ତାର ଶବ ପଡ଼ି ରହିଥିଲା । ଅନ୍ୟପକ୍ଷେ ମୃତକଙ୍କ ପରିବାର ଲୋକଙ୍କୁ ଜାଣିଶୁଣି ଜରିମାନା କରିବା ସହ ସାମାଜିକ ବାସନ୍ଦର ଭୟ ଦେଖାଇ ହଇରାଣ କରାଯାଉଛି ବୋଲି ବାଙ୍ଗିରିପୋଷି ସେଙ୍ଗେଲ୍ ଅଭିଯାନ ତରଫରୁ ଅଭିଯୋଗ ହୋଇଛି।