ପୁରୀ,୨୪/୧୦: ଭୂ-ଭାଗ ଆଡ଼କୁ ମାଡ଼ିଆସୁଥିବା ବାତ୍ୟା ‘ଦାନା’ର ପ୍ରଭାବ ପୁରୀ ଜିଲ୍ଲା ଉପରେ ପଡ଼ିବ । ପ୍ରାୟ ୬୦ରୁ ୯୦ କିଲୋମିଟର ବେଗର ପବନ ଝଟକା ସାଙ୍ଗକୁ ପ୍ରବଳ ବର୍ଷିବ । ତଳିଆ ଅଞ୍ଚଳରେ ପାଣି ଭରିଯିବା ସହ କଚ୍ଚା ଘର କ୍ଷତି ହେବା ଆଶଙ୍କା ସୃଷ୍ଟି ହୋଇଛି । ଆସନ୍ତା ଦୁଇଦିନ ପୁରୀ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ପ୍ରବଳ ବର୍ଷାରେ ତଳିଆ ଅଞ୍ଚଳ ବୁଡ଼ିବା ଆଶଙ୍କା ରହିଛି । ଏହାକୁ ନଜରରେ ରଖି ପୁରୀ ଜିଲ୍ଲା ପ୍ରଶାସନ ପକ୍ଷରୁ ଅସୁରକ୍ଷିତ ଘରେ ଓ ତଳିଆ ଅଞ୍ଚଳରେ ଥିବା ଲୋକମାନଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ଆଣିବାକୁ ପଦକ୍ଷେପ ଆରମ୍ଭ ହୋଇଯାଇଛି । ଏନେଇ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ବୁଧବାର ଗଣମାଧ୍ୟମକୁ ସୂଚନା ଦେଇଛନ୍ତି ।
ଜିଲ୍ଲାପାଳ କହିଛନ୍ତି, ଲୋକଙ୍କ ଅସୁରକ୍ଷିତ ସ୍ଥାନରୁ ଉଦ୍ଧାର କରି ବାତ୍ୟା ଓ ବନ୍ୟା ଆଶ୍ରୟସ୍ଥଳକୁ ଅଣାଯିବ । ଏଥିନିମନ୍ତେ ଜିଲ୍ଲାରେ ଥିବା ସମସ୍ତ ୧୭୯ ବାତ୍ୟା ଓ ବନ୍ୟା ଆଶ୍ରୟ ସ୍ଥଳକୁ ପ୍ରସ୍ତୁତ କରାଯାଇଛି । ଏହାବାଦ୍ ଅସ୍ଥାୟୀ ୩୭୦ ଆଶ୍ରୟସ୍ଥଳ(ସ୍କୁଲ ଓ କଲେଜ କୋଠା) ଗୁଡ଼ିକୁ ପ୍ରସ୍ତୁତ କରି ରଖାଯାଇଛି । ଏଠାରେ ଲୋକେ ସୁରକ୍ଷିତ ଭାବେ ରହିପାରିବେ ।
ସରକାରଙ୍କ ପକ୍ଷରୁ ଦୁଇଟି ଲେଖାଏଁ ଓଡ୍ରାଫ୍ ଓ ଏନ୍ଡିଆର୍ଏଫ୍ ଟିମ୍ ପୁରୀରେ ପହଞ୍ଚିଛନ୍ତି । ଓଡ୍ରାଫ୍ ଟିମ୍କୁ ୬ ଭାଗରେ ବିଭକ୍ତ କରି ଗୋଟାଏ ଲେଖାଏଁ ଦଳକୁ ୫ ସ୍ଥାନ ପିପିଲି, କୋଣାର୍କ, ଅସ୍ତରଙ୍ଗ, କାକଟପୁର, କୃଷ୍ଣପ୍ରସାଦରେ ମୁତୟନ ନିମନ୍ତେ ପଠାଇ ଦିଆଯାଇଛି । ଦୁଇଟି ଦଳ ହେଡ୍ କ୍ୱାର୍ଟର୍ସରେ ପ୍ରସ୍ତୁତ ଅଛି । ଏନ୍ଡିଆର୍ଏଫ ଗୋଟିଏ ଟିମ୍ କୃଷ୍ଣପ୍ରସାଦରେ ମୁତୟନ କରାଯାଇଛି । ଆଉ ଗୋଟିଏ ଟିମ୍ ହେଡ୍ କ୍ୱାର୍ଟର୍ସରେ ଅଛି । ପାଗକୁ ଦେଖି ସେମାନଙ୍କୁ ଆବଶ୍ୟକ ସ୍ଥଳକୁ ପଠାଯିବ । ଆପଦମିତ୍ରମାନେ ଉଦ୍ଧାର କାର୍ଯ୍ୟ ନିମନ୍ତେ ପ୍ରସ୍ତୁତ ରହିଛନ୍ତି । ବାତ୍ୟା ଓ ଏହା ପରବର୍ତ୍ତୀ କ୍ଷୟକ୍ଷତି ନେଇ ଅସନ୍ତୋଷ ଦେଖାଦେଲେ ପୁଲିସ ଅଭ୍ୟନ୍ତରୀଣ ଆଇନ ଶୃଙ୍ଖଳା ରକ୍ଷା ଉପରେ ଦୃଷ୍ଟି ରଖିଛି । ମେରାଇନ୍ ପୁଲିସ, ଲାଇଫ୍ ଗାର୍ଡ ଓ କୋଷ୍ଟଗାର୍ଡ ସୀମା ସୁରକ୍ଷା ଉପରେ ନଜର ରଖିଛନ୍ତି ।
ପୁରୀ ଜିଲ୍ଲାର ସମସ୍ତ ଦମକଳ କେନ୍ଦ୍ର ଓ ଅଗ୍ନିଶମ ବାହିନୀ ମହଜୁଦ୍ ଥିବା ଯନ୍ତ୍ରପାତି ସହ ଉଦ୍ଧାର କାର୍ଯ୍ୟ ନିମନ୍ତେ ସଜାଗ ରହିଛନ୍ତି । ଏହାବାଦ୍ ରାଜ୍ୟର ଅନ୍ୟସ୍ଥାନରୁ ୬ ଅତିରିକ୍ତ ଅଗ୍ନିଶମ ଟିମ୍ ଅତ୍ୟାଧୁନିକ ଯନ୍ତ୍ରପାତି ସହ ପୁରୀରେ ଗୁରୁବାର ସୁଦ୍ଧା ପହଞ୍ଚିବେ । ସେମାନଙ୍କୁ ଆବଶ୍ୟକ ସ୍ଥଳେ ଉଦ୍ଧାର କାର୍ଯ୍ୟ ନିମନ୍ତେ ମୁତୟନ କରାଯିବ । ସମୁଦ୍ରରୁ ମାଛ ଧରୁଥିବା ୩୭୧୭ ବୋଟ୍ ସହ ସମସ୍ତ ମତ୍ସ୍ୟଜୀବୀ କୂଳକୁ ଫେରିଛନ୍ତି । ପୁରୀର ୨ଟି ବୋଟ ପାରଦୀପରେ ପହଞ୍ଚି ସୁରକ୍ଷିତ ସ୍ଥାନରେ ରହିଛି ।
ଚଳିତ ସପ୍ତାହରେ ପ୍ରସବ କରିବାକୁ ଥିବା ୮୫୬ ଗର୍ଭବତୀଙ୍କ ମଧ୍ୟରୁ କେତେ ଜଣଙ୍କୁ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ସ୍ୱତନ୍ତ୍ର ମେଡିକାଲ ଟିମ୍କୁ ମଧ୍ୟ ଆବଶ୍ୟକ ଜରୁରୀ ଚିକିତ୍ସା ନିମନ୍ତେ ପ୍ରସ୍ତୁତ ରଖାଯାଇଛି । ଆସନ୍ତା ୨ ଦିନ ସମସ୍ତ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର, ସଦର ମୁଖ୍ୟ ଚିକିତ୍ସାଳୟ ୨୪ ଘଣ୍ଟା ଖୋଲା ରହିବା ସହ ଆବଶ୍ୟକ ଚିକିତ୍ସା ଯୋଗାଇ ଦେବାକୁ ନିର୍ଦ୍ଦେଶ ଦିଆଯାଇଛି । ଏହି ସ୍ୱାସ୍ଥ୍ୟକେନ୍ଦ୍ରମାନଙ୍କରେ ପ୍ରଚୁର ପରିମାଣର ଅତ୍ୟାବଶ୍ୟକ ମେଡିସିନ୍ ସହ ସାପକାମୁଡ଼ା ଇଞ୍ଜେକ୍ସନ ମହଜୁଦ୍ ରଖିବାକୁ ନିର୍ଦ୍ଦେଶ ଦିଆଯାଇଛି।
ଜିଲ୍ଲା ପ୍ରଶାସନ ପକ୍ଷରୁ ବିପର୍ଯ୍ୟୟ ପରିଚାଳନା ବୈଠକ କରାଯାଇ ସମସ୍ତ ବିଭାଗର ଅଧିକାରୀ ଓ କର୍ମଚାରୀଙ୍କୁ ବାତ୍ୟା ମୁକାବିଲା ନିମନ୍ତେ ସେମାନଙ୍କ ଦାୟିତ୍ୱ ବୁଝାଇ ଦିଆଯାଇଛି । ସମସ୍ତେ ସମନ୍ୱୟ ରଖି ତତ୍ପରତାର ସହ କାମ କରିବେ । ମଣିଷ ହୁଅନ୍ତୁ ଅବା ଗୃହ ପାଳିତ ପଶୁପକ୍ଷୀ କାହାରି ଯେପରି ଏହି ବିପର୍ଯ୍ୟୟରେ ମୃତ୍ୟୁ ନହୁଏ ତାହା ଉପରେ ପ୍ରଶାସନ ଗୁରୁତ୍ୱ ଦେଇ କାମ କରୁଛି ।