ପାରାଦୀପ,୨୪/୧୦: ବାତ୍ୟା ଦାନା ପାଇଁ ଜଗତସିଂହପୁର ଜିଲ୍ଲାର ବିଭିନ୍ନ ହସ୍ପିଟାଲ୍ ଗୁଡ଼ିକରେ ସମସ୍ତ ପ୍ରକାର ବ୍ୟବସ୍ଥା କରାଯାଇଛି । ଆବଶ୍ୟକତାଠାରୁ ଅଧିକ ପରିମାଣରେ ସାପ କାମୁଡ଼ା ଇଞ୍ଜେକସନ୍, ହାଲୋଜିନ୍ ବଟିକା, ବ୍ଲିଚିଂ, ଝାଡ଼ା ବାନ୍ତି, ଔଷଧ ଆଦି ପର୍ଯ୍ୟପ୍ତ ପରିମାଣରେ ରଖାଯାଇଛି । ଡାକ୍ତର ମାନଙ୍କ ଛୁଟି ବାତିଲ୍ କରାଯାଇଛି । ପ୍ରାଥମିକ ସ୍ୱାସ୍ଥ୍ୟ ସେବା ଯୋଗାଇ ଦେବା ପାଇଁ ଆଶାକର୍ମୀ ଓ ଅଙ୍ଗନବାଡ଼ି କର୍ମୀଙ୍କୁ ନିୟୋଜିତ କରାଯାଇଥିବା ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ. ଶତ୍ରୁଘ୍ନ ଦାଶ ସୂଚନା ଦେଇଛନ୍ତି ।
ସେହିପରି ଆଶ୍ରୟସ୍ଥଳୀରେ ୧୫ ହଜାର ପାଣି ବୋତଲ୍ ବ୍ୟବସ୍ଥା ରହିଛି । ୧ଟି ମୋବାଇଲ୍ ଟ୍ରିଟ୍ମେଣ୍ଟ ୟୁନିଟ୍, ୨୯ଟି ପାଣି ଟ୍ୟାଙ୍କ, ପ୍ରତ୍ୟେକ ବ୍ଲକ ନିକଟରେ ଗୋଟିଏ ଜେସିବି ରହିଛି ବୋଲି ଜିଲ୍ଲାପାଳ ସୂଚନା ଦେଇଥିଲେ । ଏରସମା ବ୍ଲକଠାରେ ଯୋଡ଼ି ହୋଇ ବରିଷ୍ଠ ପ୍ରଶାସନିକ ଅଧିକାରୀ ଯାମିନୀ ଷଡଙ୍ଗୀ ଜିଲ୍ଲାର ସମସ୍ତ ପ୍ରସ୍ତୁତି ସଠିକ୍ ସମୟ ଅନୁସାରେ ରହିଛି ବୋଲି ମତ ଦେଇଥିଲେ । କୁଜଙ୍ଗରେ ବିଭିନ୍ନ ବାତ୍ୟା ଆଶ୍ରୟସ୍ଥଳୀକୁ ପ୍ରାୟ ୧୫ ଶହ ଲୋକଙ୍କୁ ଥାଇଥାନ କରାଯାଇଥିବା କୁଜଙ୍ଗ ବିଡିଓ ସୂଚନା ଦେଇଛନ୍ତି । ସେମାନଙ୍କୁ ବୁଧବାର ଶୁଖିଲା ଖାଦ୍ୟ ଦିଆଯାଇଛି । ଏରସମାରେ ଗୁରୁବାର ଲୋକଙ୍କୁ ବାତ୍ୟା ଆଶ୍ରୟସ୍ଥଳୀକୁ ସୁବିଧା ଅନୁସାରେ ପଠା ଯିବ ବୋଲି ପ୍ରଶାସନ ପକ୍ଷରୁ ସୂଚନା ମିଳିଛି ।
କୁଜଙ୍ଗ, ପାରାଦୀପ ଏବଂ ଏରସମାକୁ ୩ଟି ଓଡ୍ରାଫ୍ ଟିମ୍ ପଠା ଯାଇଛି । ଶୁଖିଲା ଖାଦ୍ୟ ପ୍ୟାକେଟ୍ ମଧ୍ୟ ପ୍ରସ୍ତୁତ ହୋଇ ସାରିଛି । ଆବଶ୍ୟକୀୟ ପରିମାଣର ଗୁଡ, ବିସ୍କୁଟ, ଦିଆସିଲ, ମହମବତୀ ମଧ୍ୟ ଗଛିତ ରଖାଯାଇଛି । ଶିବିରକୁ ଆସିଥିବା ଲୋକଙ୍କୁ ରନ୍ଧା ଖାଦ୍ୟ ଯୋଗାଇ ଦେବାକୁ ପ୍ରଶାସନ ବ୍ୟବସ୍ଥା କରିଛି । ରିଲିଫ ସାମଗ୍ରୀ, ପାନୀୟ ଜଳ, ଔଷଧ ଏବଂ ଅନ୍ୟାନ୍ୟ ଆବଶ୍ୟକୀୟ ସାମଗ୍ରୀକୁ ମହଜୁଦ୍ ରଖିବା ସହ ଭୟଭୀତ ନହୋଇ ବାତ୍ୟା ମୁକାବିଲା ପାଇଁ ଉଚିତ ପଦକ୍ଷେପ ଗ୍ରହଣ କରିବାକୁ ପ୍ରଶାସନ ନିର୍ଦ୍ଦେଶ ଦେଇଛି । ଜ୍ୱର, ଝାଡ଼ା, ବାନ୍ତି ଏବଂ ସାପ କାମୁଡ଼ା ପାଇଁ ଯଥେଷ୍ଟ ପରିମାଣରେ ଔଷଧ ମହଜୁଦ ରହିଛି । ବୟସ୍କ, ଦିବ୍ୟାଙ୍ଗ, ଶିଶୁ, ଗର୍ଭବତୀ, ନବ ପ୍ରସୂତି, ନବଜାତ ଶିଶୁଙ୍କୁ ସୁରକ୍ଷିତ ସ୍ଥାନକୁ ଅଣାଯିବା ପାଇଁ ପ୍ରଶାସନ ଦିନରାତି ଏକ କରି ଦେଇଛି । ଜିଲ୍ଲାର ୧୧୭ ଗର୍ଭବତୀ ମହିଳାଙ୍କୁ ବିଭିନ୍ନ ହସ୍ପିଟାଲ୍କୁ ଅଣାଯାଇ ସାରିଛି ।
