ନୂଆଦିଲ୍ଲୀ: ଝାଡ଼ଖଣ୍ଡରେ ବିଧାନସଭା ନିର୍ବାଚନ ତାରିଖ ସାମ୍ନାକୁ ଆସିବା ପରେ ଏବେ ରାଜନୈତିକ ଦଳ ଗୁଡିକ ମଧ୍ୟରେ ବୟାନବାଜୀ ଆରମ୍ଭ ହୋଇଗଲାଣି । ଏହି ସମୟରେ ଗୁରୁବାର କେନ୍ଦ୍ର ମନ୍ତ୍ରୀ ତଥା ବରିଷ୍ଠ ବିଜେପି ନେତା ଶିବରାଜ ସିଂ ଚୌହାନ ହେମନ୍ତ ସୋରେନଙ୍କ ସରକାର ଉପରେ ତୀବ୍ର ସମାଲୋଚନା କରିଛନ୍ତି। ଶିବରାଜ କହିଛନ୍ତି ଯେ ଘୂର୍ଣ୍ଣିଝଡ 'ଦାନା' ଅପେକ୍ଷା ହେମନ୍ତ ସୋରେନ୍ ସରକାର ଅଧିକ ମାରାତ୍ମକ । ଏବେ ଆସନ୍ତୁ ଜାଣିବା ଶିବରାଜ କାହିଁକି ଏଭଳି କହି ଟାର୍ଗେଟ କରିଛନ୍ତି।
ସୂଚନା ମୁତାବକ କେନ୍ଦ୍ର ମନ୍ତ୍ରୀ ଶିବରାଜ ସିଂ ଚୌହାନ ଗୁରୁବାର ହେମନ୍ତ ସୋରେନଙ୍କ ଜେଏମଏମ ନେତୃତ୍ୱାଧୀନ ମିଳିତ ସରକାର ଉପରେ ଏକ ବଡ଼ ଆକ୍ରମଣ କରିଛନ୍ତି। ଶିବରାଜ କହିଛନ୍ତି ଯେ, ଭୟଙ୍କର ଘୂର୍ଣ୍ଣିଝଡ 'ଦାନା' ଅପେକ୍ଷା ହେମନ୍ତ ସୋରେନଙ୍କ ସରକାର ଅଧିକ ମାରାତ୍ମକ । ଶିବରାଜ ଚେତାବନୀ ଦେଇଛନ୍ତି ଯେ ଯଦି ଜେଏମଏମ ନେତୃତ୍ୱାଧୀନ ସରକାର କ୍ଷମତାକୁ ଆସନ୍ତି ତେବେ ଏହା ରାଜ୍ୟରେ ହଇଚଇ ସୃଷ୍ଟି କରିବ । ଶିବରାଜ ଆହୁରି କହିଛନ୍ତି ଯେ, ଭୟଙ୍କର ଘୂର୍ଣ୍ଣିଝଡ ଦାନା ଦୁଇ ଦିନ ମଧ୍ୟରେ ଲୋପ ପାଇବ, କିନ୍ତୁ ଯଦି ହେମନ୍ତ ସୋରେନ୍ ସରକାର ପୁନର୍ବାର କ୍ଷମତାକୁ ଆସନ୍ତି, ତେବେ ଏହା ବିପଦ ସୃଷ୍ଟି କରିବ।
ରାଞ୍ଚିରେ ଏକ ରାଲିରେ ଯୋଗ ଦେଇ କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂ ଚୌହାନ ଜେଏମଏମ ସରକାରଙ୍କ ପାଞ୍ଚ ବର୍ଷ ଶାସନ କାଳରେ ହୋଇଥିବା ବିଭିନ୍ନ ଦୁର୍ନୀତି ଉପରେ ଅଭିଯୋଗ ଉଠାଇଛନ୍ତି । ରାଲିରେ ଆସିଥିବା ଲୋକଙ୍କୁ ଶିବରାଜ କହିଛନ୍ତି ଯେ ହେମନ୍ତ ସୋରେନଙ୍କ ମିଳିତ ସରକାରକୁ ହଟାଇବାର ସମୟ ଆସିଛି।
ସୂଚନାଥାଉକି, ନିର୍ବାଚନ ଆୟୋଗ ଝାଡଖଣ୍ଡରେ ବିଧାନସଭା ନିର୍ବାଚନ ତାରିଖ ଘୋଷଣା କରିସାରିଛନ୍ତି । ଝାଡଖଣ୍ଡରେ ମୋଟ ୮୧ ବିଧାନସଭା ଆସନ ପାଇଁ ୨ ଟି ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହେବ। ନଭେମ୍ବର ୧୩ ଏବଂ ୨୦ ରେ ରାଜ୍ୟରେ ମତଦାନ ଅନୁଷ୍ଠିତ ହେବ ଏବଂ ଫଳାଫଳ ନଭେମ୍ବର ୨୩ରେ ଘୋଷଣା କରାଯିବ।