ଶ୍ରୀନଗର,୨୪/୧୦: ଜମ୍ମୁ କାଶ୍ମୀରରେ ଏଲ୍ଓସି ପାଖରେ ଆତଙ୍କୀ ଆକ୍ରମଣର ଏକ ଖବର ସାମ୍ନାକୁ ଆସିଛି। ଆତଙ୍କବାଦୀମାନେ ସେନା ଗାଡ଼ି ଉପରକୁ ଆକ୍ରମଣ କରିଛନ୍ତି। ଏହି ଆକ୍ରମଣରେ କିଛି ସେନା ଆହତ ହୋଇଥିବା ଜଣାପଡ଼ିଛି। କୁହାଯାଉଛି ଯେ, ଏଲ୍ଓସି ପାଖରେ ବୋଟାପଥର ଗୁଲମର୍ଗ ନିକଟସ୍ଥ ନାଗିନ ପୋଷ୍ଟ ଅଞ୍ଚଳ ପାଖରେ ସେନା ଗାଡ଼ି ଉପରକୁ ଆକ୍ରମଣ କରାଯାଇଛି। ସ୍ଥାନୀୟ ପୁଲିସ୍ ଏନେଇ ସୂଚନା ଦେଇଛି। ଅବଶ୍ୟ ବର୍ତ୍ତମାନ ସୁଦ୍ଧା ସେନା ପକ୍ଷରୁ ଏନେଇ କୌଣସି ସୂଚନା ଦିଆଯାଇନାହିଁ। ବିଶେଷ ସୂତ୍ରରୁ ମିଳିଥିବା ଖବର ଅନୁସାରେ ଏହା ଅନୁପ୍ରବେଶ ପାଇଁ ଏକ ଉଦ୍ୟମ ହୋଇପାରେ।
ସୂଚନାଥାଉକି, କିଛି ଘଣ୍ଟା ପୂର୍ବରୁ ଆତଙ୍କବାଦୀମାନେ ଜମ୍ମୁ କାଶ୍ମୀରର ଗନ୍ଦରଓ୍ବାଲ ଜିଲ୍ଲାରେ ଜଣେ ଶ୍ରମିକଙ୍କ ଉପରକୁ ଗୁଳିମାଡ଼ କରିଥିଲେ। ତେବେ ଆହତ ଶ୍ରମିକ ଜଣକ ହେଉଛନ୍ତି ଉତ୍ତରପ୍ରଦେଶର ପ୍ରିତମ। ତମାମ ଘଟଣାର କିଛି ଘଣ୍ଟା ପରେ ଆତଙ୍କବାଦୀମାନେ ସେନାଗାଡ଼ି ଉପରକୁ ଆକ୍ରମଣ କରିଛନ୍ତି। ଆଜକୁ ତିନିଦିନ ପୂର୍ବେ ଆତଙ୍କବାଦୀମାନେ ଗନ୍ଦରଓ୍ବାଲରେ ଟନେନ୍ କାମରେ ନିୟୋଜିତ ଥିବା ଶ୍ରମିକମାନଙ୍କ କ୍ୟାମ୍ପ ଉପରକୁ ଆକ୍ରମଣ କରିଥିଲେ। ଏହି ଆକ୍ରମଣରେ ୬ଜଣ ଶ୍ରମିକ ଏବଂ ଜଣେ ଡାକ୍ତରଙ୍କର ମୃତ୍ୟୁ ହୋଇଥିଲା।
