ଚାନ୍ଦବାଲି,୨୪/୧୦: ବାତ୍ୟା ପାଇଁ ରାଜ୍ୟ ସରକାର ସବୁ ଦିଗ ପ୍ରତି ତତ୍ପରତା ଦେଖାଇଛନ୍ତି । ପ୍ରଶାସନର ସାହାଯ୍ୟ କ୍ରମେ ଗର୍ଭବତୀ ମହିଳାଙ୍କୁ କରାଯାଇଛି ସ୍ଥାନାନ୍ତର । ଆଜି ମଧ୍ୟରାତ୍ରରେ ଲ୍ୟାଣ୍ଡଫଲ୍ କରିବ ବାତ୍ୟା ଦାନା । ଭୀଷଣ ବାତ୍ୟାର ରୂପ ନେଲା ବାତ୍ୟା ଦାନା । ଧାମରା-ଭିତରକନିକା ନିକଟରେ ଲ୍ୟାଣ୍ଡଫଲ୍ କରିବ। ଲ୍ୟାଣ୍ଡଫଲ୍ ବେଳେ ଘଣ୍ଟାପ୍ରତି ୧୦୦ରୁ ୧୨୦ କିମି ପବନ । ଏହାକୁ ଦୃଷ୍ଟିରେ ରଖି ବ୍ଲକ ପ୍ରାଶାସନିକ ସ୍ତରରେ କୌଣସି ପ୍ରତିବନ୍ଧକ ନ ହେବା ପାଇଁ ଚୂଡାନ୍ତ ପ୍ରସ୍ତୁତି ହୋଇ ସାରିଛି।  ଭଦ୍ରକ ଜିଲ୍ଲାରେ ଉପକୂଳବର୍ତ୍ତୀ ଅଞ୍ଚଳ ତଥା ଗ୍ରାମାଞ୍ଚଳ ଭଳି ଜନ ସାଧାରଣଙ୍କ ପାଇଁ ପ୍ରଶାସନ ସଜାଗ ରହିଛି । ଚାନ୍ଦବାଲି ବ୍ଲକରେ ୩୮ ଟି ବାତ୍ୟା ଆଶ୍ରୟସ୍ଥଳୀ, ୧୫୨ଟି ସ୍କୁଲ ଏବଂ ସରକାରୀ ଘର ଆଦିକୁ ବାତ୍ୟା ଆଶ୍ରୟ ସ୍ଥଳୀ ଭାବେ ବ୍ୟବହାର ହେବା ପାଇଁ ପ୍ରସ୍ତୁତ କରାଯାଇଛି ।

ସେହିପରି ଚାନ୍ଦବାଲି ବ୍ଲକର ବିଭିନ୍ନ ତଳିଆ ଅଞ୍ଚଳରୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଛି । ଓଡ୍ରାଫ ଓ ଏନ୍ ଡି ଆର୍ ଏଫ୍ ଟିମ୍ ମଧ୍ୟ ପ୍ରସ୍ତୁତି ରହିଛନ୍ତି। ସେହିପରି ଗର୍ଭବତୀ ମହିଳାମାନଙ୍କୁ  ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆମ୍ବୁଲାନ୍ସ ଯୋଗେ ସ୍ଥାନାନ୍ତର କରାଯାଇଛି । ବାତ୍ୟା ପ୍ରଭାବରେ  ଗମନା ଗମନ ଅସୁବିଧାକୁ ଦୃଷ୍ଟିରେ ରଖି ଗର୍ଭବତୀ ମହିଳାମାନଙ୍କୁ ଚାନ୍ଦବାଲି ଡାକ୍ତରଖାନାକୁ  ଆଗୁଆ ଅଣା ଯାଇଛି। ଏହା ବ୍ୟତୀତ ବାତ୍ୟା ଆଶ୍ରୟସ୍ଥଳୀରେ ମହଜୁଦ ଭାବେ ଖାଦ୍ୟ ତଥା ପାନୀୟ ସୁବ୍ୟବସ୍ଥା କରାଯାଉଛି । ସେହିପରି ମତ୍ସ୍ୟଜୀବୀମାନଙ୍କୁ  ନଦୀ କୂଳକୁ ଯିବାକୁ ମନା କରାଯାଇଛି। ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ଡାକ ବାଜି ଯନ୍ତ୍ର ଦ୍ଵାର ସତର୍କ ସୂଚନା ଜାରି କରାଯାଇଛି।