ଭୁବନେଶ୍ୱର(ବ୍ୟୁରୋ) ୨୦/୦୫: ପଛୁଆ ବର୍ଗଙ୍କ ପାଇଁ ସଂରକ୍ଷଣ ନିଶ୍ଚୟ ଲାଗୁ କରିବୁ । ସୁପ୍ରିମକୋର୍ଟଙ୍କ ରାୟ ଅନୁସାରେ ସଂରକ୍ଷଣ ୫୦% ଟପିବନି । ଏଥିପାଇଁ ୧୧.୨୫% ସଂରକ୍ଷଣ ଦେଇ ହେବ । ସୁପ୍ରିମକୋର୍ଟଙ୍କ ସିଲିଂ ଉଠିଲେ ପଛୁଆ ବର୍ଗଙ୍କ ସଂରକ୍ଷଣ ବଢ଼ାଇବୁ । ସଂକଳ୍ପପତ୍ରରେ ଦେଇଥିବା ୨୧ ପ୍ରତିଶ୍ରୁତିରୁ ୧୧ ପୂରଣ କରିସାରିଛୁ । ଖୁବଶୀଘ୍ର ଆଉ ୨ଟି ପୂରଣ କରାଯିବ ବୋଲି ବିଜେପି ରାଜ୍ୟ ସଭାପତି ମନମୋହନ ସାମଲ ସାମ୍ବାଦିକ ସମ୍ମିଳନୀରେ କହିଛନ୍ତି ।
ବିରୋଧୀଙ୍କୁ ଟାର୍ଗେଟ କରି ମନମୋହନ କହିଛନ୍ତି, କଂଗ୍ରେସ ଓ ବିଜେଡି ନେତାମାନେ ନିଜର ଇତିହାସକୁ ପଢ଼ନ୍ତୁ । ସଂରକ୍ଷଣ ନେଇ ବିରୋଧୀ ଲୋକଙ୍କୁ ବିଭ୍ରାନ୍ତ କରୁଛନ୍ତି । ବିଜେପି ସଂକଳ୍ପପତ୍ରରେ ଯାହା ଲେଖିଥିଲା, ତାହା ଧୀରେ ଧୀରେ ପୂରଣ କରୁଛି । ପୂର୍ବ ସରକାର ଛୋଟ ଛୋଟ ଘଟଣାକୁ ନେଇ ମାମଲା ଲଢ଼ୁଥିଲେ । କିନ୍ତୁ ପଛୁଆ ବର୍ଗ ପାଇଁ ଚିନ୍ତା ନଥିଲା । ବିଜେଡି ଓ କଂଗ୍ରେସର ତଥାକଥିତ ନେତାମାନେ ଭୁଲ ତଥ୍ୟ ଦେଉଛନ୍ତି । ବିଜେପି ପ୍ରତାରଣା ରାଜନୀତି କରୁନାହିଁ, ସ୍ୱଚ୍ଛ ରାଜନୀତି କରୁଛୁ ବୋଲି ରାଜ୍ୟ ସଭାପତି ମନମୋହନ ସାମଲ୍ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, କଂଗ୍ରେସର ଏବେବି କ୍ଷମତା ନିଶା ଯାଇନି । ଅହଙ୍କାର ପାଇଁ ବିଜେଡି ହାରିଲା । ଆମେ କୌଣସି ପ୍ରଲୋଭନ ରାଜନୀତି କରିବୁନି । ଯାହା କରୁଛୁ ସେମାନେ ବିରୋଧ କରୁଛନ୍ତି । ପଛୁଆ ବର୍ଗଙ୍କ ସାମାଜିକ ଓ ଅର୍ଥନୈତିକ ବିକାଶ ପାଇଁ ପ୍ରୟାସ ଜାରି ରହିବ । କେବଳ ସଂକଳ୍ପପତ୍ରରେ ସୀମିତ ରହିବୁନି, ଲୋକଙ୍କର ଆବଶ୍ୟକତା ପୂରଣ କରାଯିବ । ପଛୁଆ ବର୍ଗଙ୍କ ବିରୋଧରେ ବିଜୁ ବାବୁ ସୁପ୍ରିମକୋର୍ଟ ଯାଇଥିଲେ । ତେଣୁ ବିଜେଡିକୁ ଲୋକ ଗ୍ରହଣ କରିବା ସ୍ଥିତିରେ ଆଉ ନାହାନ୍ତି ବୋଲି ମନମୋହନ ସାମଲ କହିଛନ୍ତି । ଏହାଛଡ଼ା ସେ ଚିଟଫଣ୍ଡ କଥା ମଧ୍ୟ ଉଠାଇଛନ୍ତି । କାଗଜ ପତ୍ର ଖୋଜୁଛୁ, ଚିଟଫଣ୍ଡ କ୍ଷତିଗ୍ରସ୍ତଙ୍କୁ ଟଙ୍କା ଫେରସ୍ତ ପାଇଁ ପ୍ରକ୍ରିୟା ଚାଲିଛି ବୋଲି ମନମୋହନ କହିଛନ୍ତି ।
