କଟକ ୨୦/୦୫: କଟକ ପୁଲିସକୁ ସଫଳତା । ଅପହରଣ ହୋଇଥିବା ଯୁବକ ହେଲେ ଉଦ୍ଧାର, ଅପହରଣକାରୀ ଗିରଫ। ସାମ୍ୱାଦିକ ସମ୍ମିଳନୀରେ ସୂଚନା ଦେଲେ କଟକ ଡିସିପି ।
କଟକ ବୈୟାଳିଶ ମୌଜା ଥାନା ଅଞ୍ଚଳରୁ ଜଣେ ଯୁବକଙ୍କୁ ଅପହରଣ କରିନେବା ଘଟଣାରେ କଟକ ପୁଲିସକୁ ସଫଳତା ମିଳିଛି । ଅପହରଣ ହୋଇଥିବା ଯୁବକକୁ ଉଦ୍ଧାର କରିବା ସହିତ ଅପହରଣକାରୀଙ୍କୁ ଗିରଫ କରାଯାଇଛି । ଏନେଇ କଟକ ଡିସିପି ଖିଲାରୀ ଋଷିକେଶ ସାମ୍ୱାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ମିଳିଥିବା ସୂଚନା ଅନୁସାରେ, ବୈୟାଳିଶ ମୌଜା ଥାନା ବଉଳକୁଡ଼ା ଗାଁର ସୌମ୍ୟରଞ୍ଜନ ବେହେରା ଅନଲାଇନ ଟ୍ରେଡିଂ କରୁଥିଲେ । ସେ ୨୦୧୯ରୁ ୨୦୨୨ ମଧ୍ୟରେ କିଛି ଲୋକଙ୍କ ଠାରୁ ଟଙ୍କା ନେଇ ସେୟାର ବଜାରରେ ନିବେଶ କରିଥିଲା । ପ୍ରାୟ ୩ରୁ ୪ କୋଟି ଟଙ୍କା ପୁଞ୍ଜି ବଜାରରେ ଲଗାଇଥିଲେ ସୌମ୍ୟରଞ୍ଜନ । ହେଲେ ମାନ୍ଦାବସ୍ଥା ଯୋଗୁଁ ସେ ବ୍ୟାପକ କ୍ଷତି ସହିଥିଲେ । ଏମିତି କି ନିବେଶକଙ୍କ ମୂଳଧନ ପରିଶୋଧ କରିପାରିନଥିଲେ । ସେପଟେ ସୌମ୍ୟଙ୍କ ନିକଟରେ ୭୦ଲକ୍ଷ ଟଙ୍କା ନିବେଶ କରିଥିବା କେନ୍ଦ୍ରପଡ଼ାର ରାଜେଶ ଦାସ ଏବଂ ତାଙ୍କ ସହଯୋଗୀ ଦିବ୍ୟଜ୍ୟୋତି ଟଙ୍କା ପାଇଁ ବାରମ୍ବାର ଫୋନ୍ କରୁଥିଲେ । ମାତ୍ର ସୌମ୍ୟଙ୍କ ଠାରୁ କିଛି ଜବାବ ନମିଳିବାରୁ ହତାଶ ହୋଇ ତାଙ୍କୁ ଅପହରଣ କରିବାକୁ ଷଡ଼ଯନ୍ତ୍ର କରିଥିଲେ । ୧୮ ତାରିଖ ଦିନ ରାଜେଶ ଦାସ ଓ ଦିବ୍ୟଜ୍ୟୋତି ସ୍ଥାନୀୟ ଯୁବକଙ୍କ ସହିତ ମିଶି ସୌମ୍ୟଙ୍କୁ ବଉଳକୁଡ଼ାରୁ ଏକ ଧଳା ମାରୁତି ସ୍ବିଫ୍ଟ କାର୍ରେ (OD33AG8051) ଅପରହଣ କରି ନେଇଥିଲେ । ଏନେଇ ସୌମ୍ୟଙ୍କ ମା’ ରୀନା ବେହେରା ଥାନାରେ ଏତଲା ଦେବା ପରେ ସ୍ଥାନୀୟ ଥାନା ଓ ସ୍ପେଶାଲ୍ ସ୍କ୍ୱାଡ୍ ତଦନ୍ତ ଆରମ୍ଭ କରିଥିଲା । ଏକ ଟିମ୍ କେନ୍ଦ୍ରପଡା ଯାଇ ଯୁବକଙ୍କୁ ଉଦ୍ଧାର କରିବା ସହିତ ଅପହରଣକାରୀଙ୍କୁ ଗିରଫ କରିଛି । ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।
