କାଶୀପୁର, ୧୫।୬ : କାଶୀପୁର ବ୍ଲକ ହାଡ଼ିଗୁଡ଼ା ପଞ୍ଚାୟତ ଶିରିଗୁଡ଼ା ଗ୍ରାମ ନିକଟରେ ଶୁକ୍ରବାର ରାତିରେ ଏକ ଟ୍ରାକ୍ଟର ଭାରସାମ୍ୟ ହରାଇ ଓଲଟି ପଡିବାରୁ ଚାଳକର ମୃତ୍ୟୁ ହୋଇଛି । ମୃତ ଗାଡ଼ି ଚାଳକ ଜଣକ ଗୋରଖପୁର ପଞ୍ଚାୟତ କାହ୍ନୁଗୁଡ଼ା ଗ୍ରାମର ଭରତ ମାଝୀ ।
ଭରତ ମାଝୀ କାହ୍ନୁଗୁଡ଼ା ବ୍ରିଜରେ କାମ କରୁଥିବା ଠିକାଦାର ଟୁକୁନା ଚୌଧୁରୀଙ୍କ ଟ୍ରାକ୍ଟରରେ ଡ୍ରାଇଭର ଭାବେ କାମ କରୁଥିଲେ ।ଗତକାଲି ରାତିରେ ଭରତ କୌଣସି କାମରେ ଟ୍ରାକ୍ଟର ଧରି ନିକଟସ୍ଥ ଶିରିଗୁଡ଼ା ଗ୍ରାମକୁ ଯାଇ ଥିଲେ । ରାତିରେ ଫେରୁ ଥିବା ସମୟରେ ଦୁର୍ଘଟଣାରୁ ତାଙ୍କ ମୃତ୍ୟୁ ହୋଇଥିଲା ।ହଠାତ ଟ୍ରାକ୍ଟର ଇଞ୍ଜିନ ଓଲଟି ପଡିବାରୁ ତଳେ ଚାପି ହୋଇ ପ୍ରାଣ ହରାଇଥିଲେ । ଦୁର୍ଘଟଣାର ସୂଚନା ପାଇ ଆଜି ସକାଳେ ଦୋରାଗୁଡ଼ା ଥାନା ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ । କ୍ଷତିପୂରଣ ଦାବିରେ ପରିବାର ଲୋକଙ୍କ ସହ ଗ୍ରାମବାସୀ ମାନେ ଶବ ଉଠାଇ ବାକୁ ମନା କରି ଥିଲେ। ଦୋରାଗୁଡ଼ା ଥାନା ଅଧିକାରୀ କିରଣ ବାଳାସାମଲ, ଆଦିବାସୀ ସମାଜର ମୁଖିଆ ମାନେ ଲୋକଙ୍କୁ ବୁଝାସୁଝା କରିଥିଲେ।