ବଣାଇ, ୧୯।୧: ବଣାଇ ଉପଖଣ୍ଡ ଗୁରୁଣ୍ଡିଆ ଥାନା ଅନ୍ତର୍ଗତ ପଙ୍କଡିହି ପଞ୍ଚାୟତର ଜଡ଼ା ଗ୍ରାମରେ ଦୁଇ ଦିନ ତଳେ ଜଣେ ୪ ବର୍ଷର ଶିଶୁକନ୍ୟା ନିଖୋଜ ଥିଲେ । ରବିବାର ଶିଶୁକନ୍ୟାଟିର ମୃତ୍ୟୁଦେହ ଉଦ୍ଧାର ପରେ ଏହା ଏକ ହତ୍ୟା କାଣ୍ଡ ବୋଲି ପରିବାର ଲୋକ ଅଭିଯୋଗ କରିଛନ୍ତି । ଯାହା ପରେ ପୋଲିସ ପଡ଼ୋଶୀ ଦମ୍ପତିକୁ ଅଟକ ରଖି ପଚାରଉଚରା କରୁଛି ।
ସୂଚନାନୁସାରେ, ଜଡ଼ା ଗ୍ରାମର ରାଜୁ ମୁଣ୍ଡାର ୪ ବର୍ଷର ଝିଅ ଦୀପାଳି ମୁଣ୍ଡା ଦୁଇ ଦିନ ତଳେ ଖେଳିବା ପାଇଁ ଘରୁ ବାହାରକୁ ଯାଇ ସନ୍ଧ୍ୟା ପର୍ଯ୍ୟନ୍ତ ଘରକୁ ଫେରିନଥିଲେ । ପରେ ଘର ଲୋକ ପାଖ ପଡ଼ୋଶୀ ସବୁଆଡ଼େ ଅନେକ ଖୋଜାଖୋଜି କରିଥିଲେ ମଧ୍ୟ ଝିଅକୁ ସେଦିନ ସନ୍ଧ୍ୟାରେ ଆଉ ପାଇନଥିଲେ । ୨ ଦିନ ପରେ ଘରଠାରୁ କିଛି ଦୂରରେ ଚାଷ ଜମିରେ ଥିବା ଏକ ଛୋଟ ନାଳରେ ଶିଶୁକନ୍ୟାର ଶବ ଭାସୁଥିବା ଦେଖିବାକୁ ପାଇଥିଲେ । ଏନେଇ ଗୁରୁଣ୍ଡିଆ ପୋଲିସକୁ ଖବର ଦେବାପରେ ପୋଲିସ ରବିବାର ସକାଳୁ ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ବଣାଇ ସରକାରୀ ଡାକ୍ତରଖାନାକୁ ପଠାଇବା ସହ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ କରୁଥିବା ବେଳେ ପଡ଼ୋଶୀ ଦମ୍ପତିକୁ ଅଟକ ରଖି ପଚାରଉଚୁରା କରୁଛି ।
