ଭୁବନେଶ୍ୱର, ୨୬/୦୨: ଦୃଢ଼ ଇଚ୍ଛାଶକ୍ତି ଓ ନିରନ୍ତର ସାଧନା ଦ୍ବାରା ନିଜ ସ୍ବପ୍ନକୁ ସାକାର କରିହେବ । ଆନ୍ତର୍ଜାତିକ ଖ୍ୟାତି ସମ୍ପନ୍ନ ଓଡ଼ିଶୀ ନୃତ୍ୟଶିଳ୍ପୀ ଓ ଗୁରୁ ପଦ୍ମଶ୍ରୀ କୁମକୁମ୍ ମହାନ୍ତି ଉତ୍କଳ ବିଶ୍ବବିଦ୍ୟାଳୟରେ ଅନୁଷ୍ଠିତ ମିଟ ଦି ଆଲୁମିନି କାର୍ଯ୍ୟକ୍ରମରେ ଯୋଗ ଦେଇ ଏହି ମତ ଦେଇଛନ୍ତି।
ଉତ୍କଳ ବିଶ୍ୱବିଦ୍ୟାଳୟ ପୁରାତନ ଛାତ୍ରସଂଘ ଓ ଆଲୁମ୍ନି କନେକ୍ଟର ଯୌଥ ପ୍ରୟାସରେ ଅଷ୍ଟାଦଶ " ମିଟ ଦି ଆଲୁମ୍ନି କାର୍ଯ୍ୟକ୍ରମ ସ୍ନାତକୋତ୍ତର ପରିଷଦ ହଲରେ ଆୟୋଜିତ ହୋଇଥିଲା। ଏଥିରେ ଆନ୍ତର୍ଜାତିକ ଖ୍ୟାତିସମ୍ପନ୍ନ ଓଡିଶୀ ନୃତ୍ୟଶିଳ୍ପୀ ତଥା ଗୁରୁ ପଦ୍ମଶ୍ରୀ କୁମକୁମ ମହାନ୍ତି ଯୋଗ ଦେଇ ବିଶ୍ୱବିଦ୍ୟାଳୟର ଛାତ୍ରଛାତ୍ରୀମାନଙ୍କୁ ନିଜ ଜୀବନର ବହୁ ମହାର୍ଘ ଅଭିଜ୍ଞତା ବାଣ୍ଟିଥିଲେ। ଓଡିଶୀ ନୃତ୍ୟ କ୍ଷେତ୍ରରେ ସଫଳତା ପଛରେ ତାଙ୍କର ନୃତ୍ୟକୁ ଭଲ ପାଇବା,ନିଷ୍ଠା ଓ ସାଧନା ଥିଲା ବୋଲି ସେ କହିଥିଲେ।
ଜଣେ ବିବାହିତା ମହିଳା ତଥା ସର୍ବଭାରତୀୟ ଡାକ ସେବାର ଉଚ୍ଚ ଅଧିକାରୀ ହେବା ସତ୍ତ୍ୱେ ସେ କିପରି ସବୁଗୁଡିକରେ ସମନ୍ୱୟ ରଖି ଓଡିଶୀ ନୃତ୍ୟ ସାଧନା, ଅଭିନୟ ସହିତ ଗୁରୁ ପଦ୍ମଭୂଷଣ କେଳୁଚରଣ ମହାପାତ୍ରଙ୍କ ସହିତ ଜାତୀୟ ତଥା ଆନ୍ତର୍ଜାତିକ ସ୍ତରରେ ଏହାର ପ୍ରଚାର ପ୍ରସାର କରୁଥିଲେ ସେ ବିଷୟରେ ସମ୍ୟକ ସୂଚନା ଦେଇଥିଲେ। ଦୃଢ ଇଛାଶକ୍ତି ଓ ନିରନ୍ତର ସାଧନା ଦ୍ୱାରା ନିଜ ସ୍ୱପ୍ନକୁ ସାକାର କରିହେବ ବୋଲି ଶ୍ରୀମତୀ ମହାନ୍ତି ପିଲାମାନଙ୍କୁ ଅନୁପ୍ରାଣିତ କରିଥିଲେ।
ପ୍ରାରମ୍ଭରେ ପୁରାତନ ଛାତ୍ରସଂଘର ସଭାପତି ତଥା ଓଡିଶା ଲୋକସେବା ଆୟୋଗର ପୂର୍ବତନ ଅଧ୍ୟକ୍ଷ ଡକ୍ଟର ସତ୍ୟଜିତ ମହାନ୍ତି ସ୍ୱାଗତ ଭାଷଣ ଦେଇଥିଲେ। ଛାତ୍ରସଂଘର ସାଧାରଣ ସମ୍ପାଦକ ଦେବେନ୍ଦ୍ର ପ୍ରସାଦ ଦାସ ଅତିଥି ପରିଚୟ ପ୍ରଦାନ କରିଥିବାବେଳେ ଆଲୁମ୍ନି କନେକ୍ଟ ସଂଯୋଜକ ଡକ୍ଟର ଆଶିଷ ଚନ୍ଦ୍ର ପାଠୀ ଧନ୍ୟବାଦ ଅର୍ପଣ କରିଥିଲେ। ସଂଘର ଉପସଭାପତି ରଘୁନାଥ ପୃଷ୍ଟି କାର୍ଯ୍ୟକ୍ରମଟିକୁ ପରିଚାଳନା କରିଥିଲେ।
ଉକ୍ତ କାର୍ଯ୍ୟକ୍ରମଟିରେ ଓଡିଶୀ ସଂଗୀତ କଣ୍ଠଶିଳ୍ପୀ ତଥା ବିଶ୍ୱବିଦ୍ୟାଳୟର ଅର୍ଥନୀତି ପ୍ରଫେସର ମିତାଲି ଚିନାରା ଓ ପୁରାତନ ଛାତ୍ରସଂଘର ସହ ସମ୍ପାଦକ ଡକ୍ଟର ବୀରକିଶୋର ଦାଶ, କାର୍ଯ୍ୟନିର୍ବାହୀ ସଦସ୍ୟବୃନ୍ଦ ତପନ କୁମାର ଜେନା, ଡକ୍ଟର ମନୋରଞ୍ଜନ ଭୂୟାଁ, ଡକ୍ଟର ନାରାୟଣ ତ୍ରିପାଠୀ, ଲକ୍ଷ୍ମୀଧର ଚାନ୍ଦ ଓ ବିଶ୍ୱଜିତ ନାୟକ,ଅନାଦି ଦାସ, ପ୍ରଦୋଷ ରଞ୍ଜନ ଦାସ, ଜୟପ୍ରକାଶ ପଟ୍ଟନାୟକ ଓ ମନୋଜ କୁମାର ରାୟ ପ୍ରମୁଖ ଉପସ୍ଥିତ ଥିଲେ।
