ରିଆମାଳ,୨୬/୦୨: ଭାଲୁ ଆକ୍ରମଣରେ ବୃଦ୍ଧ ଗୁରୁତର। ଜଙ୍ଗଲକୁ ଯିବା ବେଳେ ବୃଦ୍ଧଙ୍କୁ ଭାଲୁ ଆକ୍ରମଣ କରିଛି। ଦେବଗଡ଼ ଜିଲ୍ଲା ରିଆମାଳ ରେଞ୍ଜ କୁଣ୍ଢେଇଗୋଳା ସେକ୍ସନ କାଞ୍ଜିଆମ ଗ୍ରାମରେ ଏଭଳି ଘଟଣା ଘଟିଛି। ଗୁରୁତର ବୃଦ୍ଧ ଜଣକ କାଞ୍ଜିଆମ ଗ୍ରାମର ସାମ୍ବାରୁ ସାହୁ (୬୦ ବର୍ଷ) ବୋଲି ଜଣାପଡ଼ିଛି ।
ସୂଚନା ଅନୁଯାୟୀ, କାଞ୍ଜିଆମ ଗ୍ରାମର ସାମ୍ବାରୁ ସାହୁ ବୁଧବାର ସକାଳୁ ନିଜ ଗାଁ ପାଖ କାଞ୍ଜିଆମ ଜଙ୍ଗଲକୁ ଯାଇଥିଲେ । ଏହି ସମୟରେ ଏକ ମାଈ ଭାଲୁ ତା ଛୁଆମାନଙ୍କ ସହିତ ମିଶି ବୃଦ୍ଧଙ୍କୁ ଆକ୍ରମଣ କରିଥିଲେ । ଫଳରେ ସେ ଗୁରୁତର ହୋଇଥିଲେ । ସାମ୍ବାରୁଙ୍କ ପାଟି ଶୁଣି ଗାଁ ଲୋକେ ତାଙ୍କୁ ଉଦ୍ଧାର କରି ନିକଟସ୍ଥ ଛେଣ୍ଡିପଦା ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ଏନେଇ ଖବର ପାଇବା ପରେ ବନ ବିଭାଗର ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରୁଥିବା ରେଞ୍ଜର ନିରଞ୍ଜନ ଧରୁଆ କହିଛନ୍ତି।
