ଦେବଗଡ଼, ୨୯/୩: ଦେବଗଡ଼ ଜିଲ୍ଲା ବାରକୋଟ ରେଞ୍ଜ୍ ପେଟପୁରା ବିଟ୍ ଅନ୍ତର୍ଗତ ବନବୀରା ସଂରକ୍ଷିତ ଜଙ୍ଗଲରେ ଶୁକ୍ରବାର ଦନ୍ତା ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି । ମୃତକ ବୁଢାଖମଣ ଗାଁର ପାର୍ଥ ନାଏକଙ୍କ ପୁଅ ଧବଳ (୪୮) । ଧବଳ ଭୋର୍ରୁ ବନବୀରା ସଂରକ୍ଷିତ ଜଙ୍ଗଲକୁ ମହୁଲ ଗୋଟାଇବାକୁ ଯାଇଥିବାବେଳେ ଦନ୍ତା ହାବୁଡ଼ରେ ପଡ଼ି ଯାଇଥିଲେ ।ଅପରାହ୍ନରେ ଜଙ୍ଗଲକୁ ଯାଇଥିବା କେତେଜଣ ଗ୍ରାମବାସୀ ତାଙ୍କ କ୍ଷତବିକ୍ଷତ ମୃତଦେହ ପଡ଼ିଥିବା ଦେଖି ପୁଲିସ ଓ ବନ ବିଭାଗକୁ ସୂଚନା ଦେଇଥିଲେ । ପୁଲିସ୍ ଧବଳଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ମୃତକଙ୍କ ପରିବାରକୁ ଉଚିତ କ୍ଷତିପୂରଣ ଦେବାକୁ ଦାବି ହୋଇଛି । ଭୋର୍ ସକାଳୁ ଘଟଣା ଘଟିଥିଲେ ହେଁ ଅପରାହ୍ନ ୩ଟା ପର୍ଯ୍ୟନ୍ତ ବନ ବିଭାଗ ପାଖରେ ଖବର ନ ଥିବା ବିଭାଗୀୟ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ବାରକୋଟ ରେଞ୍ଜ ଅଫିସର ଚିତ୍ତରଞ୍ଜନ ପୁରୋହିତ ବିଳମ୍ବରେ ସୂଚନା ପାଇବା ଘଟଣାକୁ ସ୍ୱୀକାର କରିଛନ୍ତି । ବନାଗ୍ନି ରୋକିବାରେ କର୍ମଚାରୀ ବ୍ୟସ୍ତ ଥିବାରୁ ସୂଚନା ମିଳି ନ ଥିବା ସଫେଇ ଦେଇଛନ୍ତି । ଘଟଣା ସମ୍ପର୍କରେ ଜାଣିବା ପରେ କର୍ମଚାରୀ ଓ ରାପିଡ୍ ରେସପନ୍ସ ଟିମ୍ ପହଞ୍ଚି ଦନ୍ତାକୁ ଘଉଡ଼ାଇବାକୁ ଉଦ୍ୟମ କରୁଥିବା କହିଛନ୍ତି ।
ସୂଚନାଯୋଗ୍ୟ, ଗତ ମାସ କୁଣ୍ଢେଇଗୋଳା ସେକ୍ସନ ତୁଙ୍ଗାମାଳ ଗ୍ରାମରେ ଜଣେ ଚାଷୀଙ୍କ ହାତୀ ଆକ୍ରମଣରେ ମୃତ୍ୟୁ ଘଟିଥିଲା । ଅନୁରୂପ ଭାବେ ଚଳିତ ମାସ ୧୩ ତାରିଖରେ ଲଇମୁରା ସେକ୍ସନ ପାଣିଭଣ୍ଡାର ଗାଁ ଝରାଡିହି ପଡ଼ାରେ ବାର୍ହା ଆକ୍ରମଣରେ ଜଣେ ଯୁବକଙ୍କ ମୃତ୍ୟୁ ଘଟିଥିଲା । ବନ୍ୟପ୍ରାଣୀଙ୍କ ଉପଦ୍ରବରେ ଅଞ୍ଚଳରେ ବ୍ୟାପକ ଧନଜୀବନ ହାନି ହେଉଛି । ଏହାର ପ୍ରତିକାର କରିବାକୁ ସାଧାରଣରେ ଦାବି ହେଉଛି ।
