ଭୁବନେଶ୍ୱର ୧୪/୦୨: ଲାଞ୍ଚ ନେଉଥିଲେ ମହିଳା କନିଷ୍ଠ କିରାଣି। ମାଡ଼ିବସିଲା ଦେବଗଡ଼ ଭିଜିଲାନ୍ସ ଟିମ୍। ମହିଳା କନିଷ୍ଠ କିରାଣି ମଞ୍ଜୁଳା ପ୍ରଧାନଙ୍କ ଠାରୁ ଜବତ ହେଲା ୧୦ ହଜାର ଲାଞ୍ଚ ଟଙ୍କା। ଦେବଗଡ଼ କେଲଜର ଅଫିସ ସହ ଦୁଇଟି ସ୍ଥାନରେ ଭିଜିଲାନ୍ସ ଟିମ ପକ୍ଷରୁ ରେଡ୍ କରାଯାଇଥିବା ସୂଚନା ମିଳିଛି।
ଦେବଗଡ଼ କଲେଜର ଜଣେ ପୂର୍ବତନ ଛାତ୍ରଙ୍କ ଅଭିଯୋଗ ଅନୁଯାଇ, ଛାତ୍ର ଜଣଙ୍କ ଯୁକ୍ତ ଦୁଇ ସାର୍ଟିଫିକେଟ୍ କୌଣସି କାରଣରୁ ନଷ୍ଟ ହୋଇଯାଇଥିଲା। ସେ ଯୁକ୍ତ ଦୁଇ ଡୁପ୍ଲିକେଟ ସାର୍ଟିଫିକେଟ ପାଇଁ ଦେବଗଡ଼ କଲେଜରେ ଆବେଦନ କରିଥିଲେ। ହେଲେ ସାର୍ଟିଫିକେଟ୍ କରାଇଦେବା ପାଇଁ ମହିଳା କନିଷ୍ଠ କିରାଣି ମଞ୍ଜୁଳା ପ୍ରଧାନ ୧୦ ହଜାର ଟଙ୍କା ଦାବି କରିଥିଲେ। ଏନେଇ ଛାତ୍ର ଜଣ ଭିଜିଲାନ୍ସରେ ଅଭିଯୋଗ କରିଥିଲେ। ଏହାପରେ ଆକ୍ସକୁ ଆସିଥିଲା ଦେବଗଡ଼ ଭିଜିଲାନ୍ସ ଟିମ। ପୂର୍ବ ଯୋଜନା ମୁତାବିକ ଛାତ୍ର ଜଣ କନିଷ୍ଠ କିରାଣିଙ୍କୁ ଟଙ୍କା ଦେଉଥିବା ବେଳେ ଚଢ଼ାଉ କରିଥିଲା ଭିଜିଲାନ୍ସ। ତାଙ୍କ ନିକଟରୁ ୨୦ଟି ୫୦୦ଶହ ଟଙ୍କିଆ ନୋଟ୍ ଜବତ କରାଯାଇଥିଲା। ପରେ ଦୁଇଟି ସ୍ଥାନରେ ଚଢ଼ାଉ କରଯାଇଛି। ଆଗକୁ ତାଙ୍କୁ ଗିରଫ କରାଯିବ ବୋଲି ସୂଚନା ମିଳିଛି।
