ନୂଆଦିଲ୍ଲୀ, ୧୪/୯ :  ସାଉଥ ଅଭିନେତା ଥଲାପତି ବିଜୟ ପୁଣି ଥରେ ନୂଆ ରେକର୍ଡ଼ ସୃଷ୍ଟି କରିଛନ୍ତି।  ତାଙ୍କ ଆଗାମୀ ଫିଲ୍ମ ‘ଥଲାପତି ୬୯’ ଲାଗି ସେ ବହୁ ଟଙ୍କା ଫି’ ନେଇଛନ୍ତି । ଏହି ଫିଲ୍ମ ଲାଗି ତାଙ୍କୁ ଯେତିକି ଟଙ୍କା ଦିଆଯାଇଛି ପୂର୍ବରୁ କୌଣସି ଭାରତୀୟ ଅଭିନେତା ଏତେମାତ୍ରାରେ ଫିସ୍ ନେଇ ନାହାନ୍ତି । 

ଫିଲ୍ମିବିଟ ଅନୁସାରେ ଥଲାପତି ବିଜୟ ‘ଥଲାପତି ୬୯’ ଲାଗି ୨୭୫କୋଟିର ଫିସ୍ ନେଇଛନ୍ତି । ଥଲାପତି ବିଜୟଙ୍କ ପୂର୍ବ ଫିଲ୍ମ ବକ୍ସ ଅଫିସରେ କମାଲ କରିଛି । ସୂଚନା ଅନୁସାରେ ୨୦୨୩ରେ ଆସିଥିବା ଫିଲ୍ମ ‘ଲିଓ’ ଓ୍ବାର୍ଲ୍ଡଓ୍ବାଇଡ ୬୦୫କୋଟି ଟଙ୍କାରୁ ଅଧିକ ବ୍ୟବସାୟ କରିଥିଲା । ଏହା ବ୍ୟତୀତ ତାଙ୍କ ନିକଟରେ ରିଲିଜ ହୋଇଥିବା ଫିଲ୍ମ ‘GOAT’ ଥିଏଟର୍ସରେ ଚାଲୁ ରହିଛି । 

ପ୍ରକାଶ ଯେ, ନିକଟରେ ରିଲିଜ ହୋଇଥିବା ଫିଲ୍ମ ‘GOAT’ ଲାଗି ୨୦୦କୋଟି ଟଙ୍କା ନେଇଥିଲେ । ଏହାପରେ ସେ ଭାରତୀୟ ଫିଲ୍ମ ଇଣ୍ଡଷ୍ଟ୍ରିରେ ସବୁଠାରୁ ଅଧିକ ଆୟ କରୁଥିବା ଅଭିନେତାଙ୍କ ଲିଷ୍ଟରେ ସାମିଲ ହୋଇଯାଇଥିଲେ । ଏବେ ତାଙ୍କର ଆଗାମୀ ଫିଲ୍ମରେ ଏହାଠାରୁ ଅଧିକ ୭୫କୋଟି ଟଙ୍କା ଅଧିକ ଫି’ ଚାର୍ଜ କରି ସେ ନିଜ ରେକର୍ଡ଼ ହିଁ ଭାଙ୍ଗି ଦେଇଛନ୍ତି । ଏଭଳି କରି ଥଲାପତି ଶାହରୁଖ ଖାନ ଏବଂ ରଜନୀକାନ୍ତଙ୍କ ଭଳି ଅଭିନେତାଙ୍କୁ ବି ଟକ୍କର ଦେଇଛନ୍ତି । ପ୍ରକାଶ ଯେ, ଶାହରୁଖ ଖାନ ଏକ ଫିଲ୍ମ ଲାଗି ୧୫୦ରୁ ୨୫୦କୋଟି ତ ରଜନୀକାନ୍ତ ୧୫୦ରୁ ୨୦୦କୋଟି ଚାର୍ଜ କରିଥାନ୍ତି ।

ନିକଟରେ ବିଜୟ ଘୋଷଣା କରିଛନ୍ତି କି ଏହି ଫିଲ୍ମ ପରେ ସେ ଫିଲ୍ମ ଇଣ୍ଡଷ୍ଟ୍ରିରୁ ସନ୍ନ୍ୟାସ ନେବେ । ତାଙ୍କ ପ୍ରଡ଼କ୍ସନ ହାଉସ ତରଫରୁ ଏକ ଭିଡ଼ିଓ ଜାରି କରି ତାଙ୍କ ସନ୍ନ୍ୟାସର ଘୋଷଣା କରାଯାଇଛି । ଏହି ଭିଡ଼ିଓରେ ବିଜୟଙ୍କ ଜର୍ଣ୍ଣି ଦେଖାଯାଇଛି।  ପ୍ରକାଶ ଯେ ‘ଥଲାପତି ୬୯’ ରେ ବିଜୟ ନିର୍ଦେଶକ ଏଚ ବିନୋଦଙ୍କ ସହ ପ୍ରଥମ ଥର କାମ କରିବାକୁ ଯାଉଛନ୍ତି ।