ନୂଆଦିଲ୍ଲୀ,୨୨/୦୩: ବାରବାଟିରେ ପୁଣି ଚଳିତ ବର୍ଷ ଡିସେମ୍ବରରେ ଟି-୨୦ ଅନ୍ତର୍ଜାତୀୟ ମ୍ୟାଚ୍ ହୋଇପାରେ। ଭାରତ ଓ  ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବାକୁ ଥିବା ୫ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜର ପ୍ରଥମ ମ୍ୟାଚ୍ ବାରବାଟିରେ ଖେଳାଯାଇ ପାରେ ବୋଲି ସୂଚନା ମିଳିଛି।  ଏନେଇ ଏକ ୱେବ୍ ସାଇଟ୍ ରେ ସମ୍ଭାବ୍ୟ ମ୍ୟାଚ୍ ସୂଚୀ ପ୍ରକାଶ ପାଇବା ପରେ କ୍ରିକେଟ ପ୍ରେମୀ ମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ତେବେ ଏନେଇ ଯଦିଓ ବି ସି ସି ଆଇ ପକ୍ଷରୁ କୌଣସି ଔପଚାରିକ ଭାବେ କୌଣସି ଘୋଷଣା କରାଯାଇ ନାହିଁ କିନ୍ତୁ ବାରବାଟି ରେ ମ୍ୟାଚ୍ କରିବା ପାଇଁ ଓ ସି ଏ ପକ୍ଷରୁ ବି ସି ସି ଆଇ କୁ ଅଧିକ ମ୍ୟାଚ ଦେବା ପାଇଁ ନିବେଦନ କରାଯାଇଥିଲା। ଏବେ ଯାଏଁ ବିସିସିଆଇ ପକ୍ଷ ରୁ କୌଣସି ସୂଚନା ଆସିନାହିଁ। ଯଦି ମ୍ୟାଚ୍ ଆସିବ ତେବେ ଆସନ୍ତା ସୋମବାର ଆମ ପାଖକୁ ଅଫିସିଆଲ୍ ଖବର ଆସିବ ବୋଲି ସୂଚନା ଦେଲେ ଓ ସି ଏ ସଭାପତି ପଙ୍କଜ ଲୋଚନ ମହାନ୍ତି। ଗଣମାଧ୍ୟମ ରିପୋର୍ଟ ଅନୁସାରେ ଟି-୨୦ ସିରିଜ୍‌ର ପ୍ରଥମ ମ୍ୟାଚ୍‌ ବାରବାଟିରେ ଖେଳାଯିବାକୁ ଥିବା ବେଳେ ଅବିଶିଷ୍ଟ ମ୍ୟାଚ୍‌ ନାଗପୁର, ଧର୍ମଶାଳା, ଲକ୍ଷ୍ନୌ, ଅହମ୍ମଦାବାଦରେ ଖେଳାଯିବ।