ହାଇଦ୍ରାବାଦ,୨୩/୦୩: ରବିବାର ଅପରାହ୍ଣରେ ସନରାଇଜର୍ସ ହାଇଦ୍ରାବାଦ ଓ ରାଜସ୍ଥାନ ରୟାଲ୍ସ ପରସ୍ପରକୁ ଭେଟିବେ । ସନରାଇଜର୍ସର ଘରୋଇ ଗ୍ରାଉଣ୍ଡ ଉପଲ ଷ୍ଟାଡ଼ିୟମ୍ରେ ଏହି ମ୍ୟାଚ୍ ଖେଳାଯିବ । ଏହି ମ୍ୟାଚ୍ଟି ଚଳିତ ବର୍ଷର ଅନ୍ୟ ଏକ ଚର୍ଚ୍ଚିତ ମୁକାବିଲା ।
ଗତ ସିଜନରେ ଉଭୟ ଦଳ ଦ୍ୱିତୀୟ କ୍ୱାଲିଫାୟରରେ ପରସ୍ପରକୁ ଭେଟିଥିଲେ ଓ ସନରାଇଜର୍ସ ଏହି ମ୍ୟାଚ୍ ଜିତି ଫାଇନାଲ୍ରେ ପ୍ରବେଶ କରିଥିଲା । ରାଜସ୍ଥାନ ରୟାଲ୍ସର ଫାଇନାଲ୍ ଆଶା ମଉଳି ଯାଇଥିଲା । ଏଥର ରାଜସ୍ଥାନ ରୟାଲ୍ସ ପ୍ରତିଶୋଧ ନେବାକୁ ଅପେକ୍ଷା କରିଛି । ଫଳରେ ମ୍ୟାଚଟି ତୀବ୍ର ସଂଘର୍ଷପୂର୍ଣ୍ଣ ରହିବ । ଦର୍ଶକ ରବିବାର ଧୂଆଁଧାର ବ୍ୟାଟିଂ ଦେଖିବା ପାଇଁ ଏହି ମ୍ୟାଚ୍କୁ ଉତ୍ସୁକତାର ସହ ଅପେକ୍ଷା କରିଛନ୍ତି ।
ଗତ ସିଜନରେ ସନରାଇଜର୍ସ ଦଳ ମୋଟ୍ ୧୭୮ଟି ଛକା ମାରିଥିଲା । ଏଥର ମଧ୍ୟ ବିସ୍ଫୋରକ ବ୍ୟାଟିଂ କରିବାକୁ ଦଳ ପ୍ରସ୍ତୁତ । ଦୁଇ ଓପନର ଟ୍ରେଭିସ ହେଡ୍ ଓ ଅଭିଷେକ ଶର୍ମା ଗତ ବର୍ଷ ସବୁ ଦଳର ନିଦ ହଜାଇ ଦେଇଥିଲେ । ଏମାନଙ୍କ ବ୍ୟତୀତ ହେନରିକ କ୍ଲାସେନ, ଇଶାନ କିଷନ, ନୀତିଶ କୁମାର ରେଡ୍ଡୀଙ୍କ ଭଳି ଧୂଆଁଧାର ବ୍ୟାଟର ମଧ୍ୟ ରହିଛନ୍ତି । ବୋଲିଂ ବିଭାଗ ମଧ୍ୟ ବେଶ୍ ସନ୍ତୁଳିତ । ପ୍ୟାଟ୍ କମିନ୍ସ ବୋଲିଂ ବିଭାଗ ସମ୍ଭାଳୁ ଥିବାବେଳେ ଏଥର ଦଳ ମହମ୍ମଦ ସାମି ଓ ହର୍ଷଲ ପଟେଲଙ୍କ ଭଳି ସଫଳ ବୋଲରଙ୍କୁ କିଣିଛି । ସେହିପରି ଆଡାମ ଜାମ୍ପା, ରାହୁଲ ଚହର ସ୍ପିନ ବିଭାଗ ସମ୍ଭାଳିବେ ।
ରାଜସ୍ଥାନ ରୟାଲ୍ସ ନୂଆ ଅଧିନାୟକ ରିୟାନ ପରାଗଙ୍କ ସହ ଗ୍ରାଉଣ୍ଡକୁ ଓହ୍ଲାଇବ । ସ୍ଥାୟୀ ଅଧିନାୟକ ସଞ୍ଜୁ ସାମସନ ରବିବାର କେବଳ ବ୍ୟାଟର ଭାବେ ଖେଳିବେ । ତେଣୁ ତାଙ୍କୁ ଇମ୍ପାକ୍ଟ ପ୍ଲେୟାର ଭାବେ ବ୍ୟବହାର କରାଯିବ। ଏଥର ଜୋସ ବଟଲର ଦଳରେ ନାହାନ୍ତି । ତଥାପି ବ୍ୟାଟିଂ ବିଭାଗ ଶକ୍ତିଶାଳୀ । ସନରାଇଜର୍ସର ଦୁର୍ଦ୍ଧର୍ଷ ବ୍ୟାଟରଙ୍କୁ ଅଟକାଇବା ପାଇଁ ରୟାଲ୍ସ ଏଥର ଜୋଫ୍ରା ଆର୍ଚରଙ୍କୁ କିଣିଛି । ୱାନିଣ୍ଡୁ ହସରଙ୍ଗା ଏକମାତ୍ର ସ୍ପିନର ଭାବେ ଖେଳିବା ଆଶା କରାଯାଉଛି ।
ଅପରାହ୍ଣରେ ମ୍ୟାଚ୍ ରହିଥିବାରୁ ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ଗତ ବର୍ଷ ଏହି ଗ୍ରାଉଣ୍ଡ୍ରେ ଓଭର ପିଛା ୧୦.୫୪ ହାରରେ ରନ ସଂଗୃହୀତ ହୋଇଥିଲା । ଏଥର ମଧ୍ୟ ବିଶାଳ ସ୍କୋର ସଂଗୃହୀତ ହେବ । ଟସ୍ କିଛି ଗୁରୁତ୍ୱ ରଖିବ ନାହିଁ । ଟସ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ସନରାଇଜର୍ସ: ଟ୍ରେଭିସ ହେଡ୍, ଅଭିଷେକ ଶର୍ମା, ଇଶାନ କିଷନ, ନୀତିଶ କୁମାର ରେଡ୍ଡୀ, ହେନରିକ କ୍ଲାସେନ, ଅନିକେତ ବର୍ମା, ଅଭିନବ ମନୋହର, ପ୍ୟାଟ୍ କମିନ୍ସ (ଅଧିନାୟକ), ହର୍ଷଲ ପଟେଲ, ରାହୁଲ ଚହର, ମହମ୍ମଦ ସାମି, ଆଡାମ ଜାମ୍ପା ।
ରାଜସ୍ଥାନ ରୟାଲ୍ସ: ଯଶସ୍ୱୀ ଜୈସ୍ୱାଲ, ସଞ୍ଜୁ ସାମସନ, ନୀତିଶ ରାଣା, ରିୟାନ ପରାଗ (ଅଧିନାୟକ), ଧ୍ରୁବ ଜୁରେଲ, ସିମରନ ହେତମାୟର, ୱାନିଣ୍ଡୁ ହସରଙ୍ଗା, ଶୁଭମ ଦୁବେ/ଆକାଶ ମଧୱାଲ, ଜୋଫ୍ରା ଆର୍ଚର, ମହୀଶ ତୀକ୍ଷଣା/ଫଜଲହକ୍ ଫାରୁକି, ସନ୍ଦିପ ଶର୍ମା, ତୁଷାର ଦେଶପାଣ୍ଡେ
