ନୂଆଦିଲ୍ଲୀ: ଇଭିଏମ ଯାଞ୍ଚ ସମ୍ପର୍କିତ ଏକ ଆବେଦନ ଉପରେ ନିର୍ବାଚନ କମିଶନଙ୍କୁ ଜବାବ ଦାଖଲ କରିବାକୁ କହିଛନ୍ତି ସୁପ୍ରିମକୋର୍ଟ। ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ଏଡିଆର୍)ର ଏହି ଆବେଦନରେ ଦାବି କରାଯାଇଛି ଯେ ସୁପ୍ରିମକୋର୍ଟ ନିର୍ବାଚନ କମିଶନଙ୍କୁ ଇଭିଏମ୍ର ଡିଲିଟ୍ କରାଯାଇଥିବା ମେମୋରୀ ଯାଞ୍ଚ କରିବା ପାଇଁ ଏକ ସ୍ପଷ୍ଟ ପ୍ରୋଟୋକଲ୍ ପ୍ରସ୍ତୁତ କରିବାକୁ କହିଛନ୍ତି । ସୁପ୍ରିମକୋର୍ଟର ମୁଖ୍ୟ ବିଚାରପତି ସଞ୍ଜିବ ଖାନ୍ନା ଏବଂ ବିଚାରପତି ଦୀପଙ୍କର ଦତ୍ତଙ୍କ ଖଣ୍ଡପୀଠ କହିଛନ୍ତି ଯେ, ଶୁଣାଣି ମାର୍ଚ୍ଚ ପ୍ରଥମ ସପ୍ତାହରେ ହେବ । କୋର୍ଟ ଏହା ମଧ୍ୟ କହିଛନ୍ତି ଯେ ନିର୍ବାଚନ କମିଶନ ସମ୍ପ୍ରତି ନିର୍ବାଚନ ହୋଇଥିବା ସ୍ଥାନ ଗୁଡ଼ିକର EVM ତଥ୍ୟ ଡିଲିଟ୍ କରିବା ଉଚିତ୍ ନୁହେଁ କିମ୍ବା ଏଥିରେ ନୂତନ ତଥ୍ୟ ଲୋଡ୍ କରିବା ଉଚିତ୍ ନୁହେଁ।
ଆବେଦନରେ ଗତ ବର୍ଷ ସୁପ୍ରିମକୋର୍ଟ ଦେଇଥିବା ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଉଲ୍ଲେଖ କରାଯାଇଛି। ଏହି ନିଷ୍ପତ୍ତିରେ, ସୁପ୍ରିମକୋର୍ଟ ବାଲଟ୍ ପେପର ମାଧ୍ୟମରେ ପୁରୁଣା ନିର୍ବାଚନ ବ୍ୟବସ୍ଥାକୁ ପୁନଃସ୍ଥାପିତ କରିବାକୁ ମନା କରିଦେଇଥିଲେ। ଏହା ସହିତ, ସମସ୍ତ VVPAT ସ୍ଲିପ ଗଣନା କରିବାର ଦାବିକୁ ମଧ୍ୟ ପ୍ରତ୍ୟାଖ୍ୟାନ କରାଯାଇଥିଲା। କିନ୍ତୁ ସ୍ୱଚ୍ଛତା ଆଣିବା ପାଇଁ ନିର୍ବାଚନ ଫଳାଫଳ ଘୋଷଣାର ଗୋଟିଏ ସପ୍ତାହ ମଧ୍ୟରେ ଇଭିଏମର ଡିଲିଟ୍ କରାଯାଇଥିବା ମେମୋରୀ ଯାଞ୍ଚ କରିବାକୁ କୋର୍ଟ ଅନୁମତି ଦେଇଥିଲେ।
୨୬ ମାର୍ଚ୍ଚ ୨୦୨୪ରେ ଦିଆଯାଇଥିବା ଏହି ନିଷ୍ପତ୍ତିରେ, ସୁପ୍ରିମକୋର୍ଟ କହିଥିଲେ ଯେ ଫଳାଫଳ ପ୍ରକାଶିତ ହେବାର ଏକ ସପ୍ତାହ ମଧ୍ୟରେ, ଦ୍ୱିତୀୟ କିମ୍ବା ତୃତୀୟ ସ୍ଥାନ ଅଧିକାର କରିଥିବା ପ୍ରାର୍ଥୀ ପୁନଃପରୀକ୍ଷା ଦାବି କରିପାରିବେ। ଏପରି ପରିସ୍ଥିତିରେ, ଇଞ୍ଜିନିୟର ମାନଙ୍କ ଦଳ ଯେକୌଣସି ୫ ଟି ମାଇକ୍ରୋ କଣ୍ଟ୍ରୋଲରର ଡିଲିଟ୍ ମେମୋରୀ ଯାଞ୍ଚ କରିବେ। ପ୍ରାର୍ଥୀଙ୍କୁ ଏହି ପରୀକ୍ଷାର ଖର୍ଚ୍ଚ ବହନ କରିବାକୁ ପଡିବ। ଯଦି କୌଣସି ଅନିୟମିତତା ପ୍ରମାଣିତ ହୁଏ, ତେବେ ପ୍ରାର୍ଥୀ ତାଙ୍କର ଟଙ୍କା ଫେରସ୍ତ ପାଇବେ।
