କୋଲକାତା, ୨୦।୯: କୋଲକାତା ଟ୍ରେନି ଡାକ୍ତର ଦୁଷ୍କର୍ମ-ହତ୍ୟା ଘଟଣା । ଦୀର୍ଘ ୪୧ ଦିନର ଆନ୍ଦୋଳନରେ ଲାଗିବ ବିରାମ । ନ୍ୟାୟ ଦାବିରେ ଜୁନିୟର ଡାକ୍ତର ଓ ପଶ୍ଚିମବଙ୍ଗ ସରକାରଙ୍କ ମଧ୍ୟରେ ଚାଲିଥିବା ଆଲୋଚନା ସଫଳ ହେଲା । ଏବେ ଡ୍ୟୁଟିକୁ ଫେରିବେ ଡାକ୍ତର । ଶନିବାରଠାରୁ ଜରୁରିକାଳୀନ ସେବା ପ୍ରଦାନ କରିବେ ଆନ୍ଦେଳନରତ ଡାକ୍ତର । 

କୋଲକାତାର ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାରେ ନ୍ୟାୟ ଦାବିରେ ଜୁନିୟର ଡାକ୍ତର ଓ ପଶ୍ଚିମବଙ୍ଗ ସରକାରଙ୍କ ମଧ୍ୟରେ ଚାଲିଥିବା ଆଲୋଚନା ସଫଳ ହୋଇଛି । ପଶ୍ଚିମବଙ୍ଗ କନିଷ୍ଠ ଡାକ୍ତର ମୋର୍ଚ୍ଚା ଆସନ୍ତାକାଲି ଧର୍ମଘଟ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛି । ଆନ୍ଦୋଳନରତ କନିଷ୍ଠ ଡାକ୍ତରମାନେ ସେପ୍ଟେମ୍ବର ୨୧ ଅର୍ଥାତ୍ ଶନିବାରଠାରୁ ଠାରୁ କାର୍ଯ୍ୟରେ ଯୋଗ ଦେବେ । ଏହି ସମୟ ମଧ୍ୟରେ ଜରୁରୀକାଳୀନ ସେବା ପୁନର୍ବାର ଆରମ୍ଭ ହେବ, କିନ୍ତୁ ଓପିଡି ସେବା ବନ୍ଦ ରହିବ । ଦୀର୍ଘ ୪୧ ଦିନର ବିରୋଧ ପରେ ସେମାନେ ଧର୍ମଘଟ ବନ୍ଦ କରିବାକୁ ଯାଉଛନ୍ତି । 

ଶୁକ୍ରବାର ଅପରାହ୍ନ ୩ଟାରେ କନିଷ୍ଠ ଡାକ୍ତରମାନେ ସ୍ୱାସ୍ଥ୍ୟ ଭବନରୁ ସିବିଆଇ କାର୍ଯ୍ୟାଳୟ ସିଜିଓ କମ୍ପ୍ଲେକ୍ସ ପର୍ଯ୍ୟନ୍ତ ଏକ ପ୍ରତିବାଦ ଶୋଭାଯାତ୍ରା କରିବେ । ଗୁରୁବାର ଦିନ ସେମାନେ ମୁଖ୍ୟ ଶାସନ ସଚିବ ମନୋଜ ପନ୍ତଙ୍କ ନିକଟକୁ ପଶ୍ଚିମବଙ୍ଗ ସରକାରଙ୍କ ସହ ହୋଇଥିବା ଆଲୋଚନାରୁ ମୁଖ୍ୟ ବିଷୟଗୁଡ଼ିକୁ ଦର୍ଶାଇ ଏକ ଡ୍ରାଫ୍ଟ ଦାଖଲ କରିଥିଲେ । ସେମାନେ ବର୍ତ୍ତମାନ ସେମାନଙ୍କ ପ୍ରସ୍ତାବ ଉପରେ ରାଜ୍ୟର ପ୍ରତିକ୍ରିୟାକୁ ଅପେକ୍ଷା କରିଛନ୍ତି । ତେବେ ଧାରଣା ଓ ବିକ୍ଷୋଭ ବନ୍ଦ ହେଲେ ବି ଅଭୟା ନ୍ୟାୟ ପାଇବା ଯାଏଁ ଆନ୍ଦୋଳନ ଜାରି ରହିବ ବୋଲି ଡାକ୍ତର ସଂଘ କହିଛି । ପଶ୍ଚିମବଙ୍ଗର ବନ୍ୟା ପ୍ରଭାବିତ ଅଞ୍ଚଳରେ ଅଭୟା କ୍ୟାମ୍ପ୍ ନାଁରେ ଏକ କ୍ୟାମ୍ପ କରି ଆନ୍ଦୋଳନକୁ ଆଗକୁ ନେବାକୁ ସଂଘ ନିଷ୍ପତ୍ତି ନେଇଛି ।