ରାଉରକେଲା,୨୮/୩ (ବ୍ୟୁରୋ): ସୁଧୁରୁନାହାନ୍ତି ଦୁର୍ବୃତ । ବଦଳୁନି ମାନସିକତା। ଗତ ୨୬ ତାରିଖରେ ପୁରୀରୁ ରାଉରକେଲା ଆସୁଥିବା ‘ବନ୍ଦେ ଭାରତ ଏକ୍ସପ୍ରେସ୍’ ଉପରକୁ ହୋଇଥିବା ପଥର ମାଡ଼କୁ ନେଇ ଚର୍ଚ୍ଚା ଥମି ନ ଥିବାବେଳେ ଶୁକ୍ରବାର ଏହାର ପୁନରାବୃତ୍ତି ହୋଇଛି । ଦୁର୍ଗରୁ ଆରା ଅଭିମୁଖେ ଯାଉଥିବା ‘ସାଉଥ୍ ବିହାର ଏକ୍ସପ୍ରେସ୍’ ଟ୍ରେନ୍କୁ ସନ୍ଧ୍ୟାରେ ପଥରମାଡ଼ ହୋଇଛି। ରାଉରକେଲାରୁ ବନ୍ଧମୁଣ୍ଡା ମଧ୍ୟରେ ଦୁର୍ବୃତ୍ତ ମାନେ ଏଭଳି କାଣ୍ଡ ଘଟାଇଛନ୍ତି। ଏ ନେଇ ଆର୍ପିଏଫ୍ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଦୁର୍ଗରୁ-ଆରା ଯାଉଥିବା ‘ସାଉଥ୍ ବିହାର ଏକ୍ସପ୍ରେସ୍’ ରାଉରକେଲା ଷ୍ଟେସନରେ ସନ୍ଧ୍ୟା ସାଢ଼େ ୫ଟାରେ ପହଞ୍ଚିଥିଲା । ୫ଟା ୪୦ରେ ଟ୍ରେନ୍ଟି ଗନ୍ତବ୍ୟ ସ୍ଥଳ ଅଭିମୁଖେ ବାହାରିଥିଲା। ରାଉରକେଲା ଓ ବନ୍ଧମୁଣ୍ଡା ମଝିରେ ଟ୍ରେନ୍ର ଏସି ବଗି ଉପରକୁ ପଥର ମାଡ଼ ହୋଇଥିଲା। ଏଥିରେ କାଚ କ୍ଷତିଗ୍ରସ୍ତ ହୋଇଛି । ହେଲେ ଯାତ୍ରୀ ସୁରକ୍ଷିତ ଅଛନ୍ତି। ରାଉରକେଲାରେ ବାରମ୍ବାର ଟ୍ରେନ୍ ଉପରକୁ ପଥରମାଡ଼ ଆର୍ପିଏଫର ଚିନ୍ତା ବଢ଼ାଇଛି ।
