ପୁରୀ,୩୧/୦୩: ଦିନ କେତେଟା ପରେ ସାହିଯାତ । ବୀରବାଦ୍ୟରେ କମ୍ପିବ ସାହି ଗଳିକନ୍ଦି । ସାହିଯାତରେ ବାହାରିବାକୁ ଥିବା କଳାକାରମାନେ ଦୀର୍ଘଦିନରୁ ଏଥିପାଇଁ ନୃତ୍ୟ ପ୍ରସ୍ତୁତି ଆରମ୍ଭ କରିଦେଲେଣି । ନିଷ୍ଠାର ସହ ଖାଦ୍ୟପେୟ ଗ୍ରହଣ କରିବା ସହ ତାଟିମେଢ଼ ପିନ୍ଧି ସେମାନେ ଜାଗା ଆଖଡ଼ାରେ ନୃତ୍ୟ ଅଭ୍ୟାସ କରୁଛନ୍ତି । ସାହିଯାତ ବେଳେ କଳାକାରମାନେ ଖାଲି ପାଦରେ ପୁରୀର ବିଭିନ୍ନ ସାହି ଗଳିକନ୍ଦି ବୁଲିବାର ନିୟମ ରହିଛି । ହେଲେ ଏବେ ସୁଦ୍ଧା କଳାକାରଙ୍କୁ ସ୍ୱାଗତ କରିବାକୁ ସାହି ଗଳି ପ୍ରସ୍ତୁତ ହୋଇପାରିନାହିଁ । ମନ୍ଦିର ଆଖପାଖ ଗଳିକନ୍ଦି ଖାଲଖମାରେ ଭରି ରହିଛି । କେତେକ ସ୍ଥାନରେ ଏବେ ବି ବିଦ୍ୟୁତ ତାର ତଳକୁ ଝୁଲି ରହିଛି । ଯାହାଦ୍ୱାରା ନିଝାମ, ବନାଟି, ବାଡ଼ି ଖେଳ, ମୁଦ୍ଗର ଚାଳନା ଭଳି ଦୁଃସାହସିକ କ୍ରୀଡ଼ା ପ୍ରଦର୍ଶନ ସମୟରେ ସମସ୍ୟା ଉପୁଜିବ ।
ସାହିଯାତରେ ବାଲିସାହିରୁ ସର୍ବାଧିକ କଳାକାର ବାହାରିଥାନ୍ତି । ଏହି ସାହିର ଅବସ୍ଥା ଅତ୍ୟନ୍ତ କଦର୍ଯ୍ୟ ରହିଛି । କାକୁଡ଼ିଖାଇ ଛକରେ ବିରାଟ ଖାଲଖମା ରହିଥିବାରୁ ଏଠାରେ ସବୁବେଳେ ପାଣି ଜମୁଛି । ଏହା ସହ ବାଲି ସାହିର ଉଭୟ ପାଶ୍ୱର୍ରେ ଅନେକ ଛୋଟ ବଡ଼ କ୍ୟାବିନ ରଖାଯାଇଥିବାରୁ ରାସ୍ତା ସଙ୍କୀର୍ଣ୍ଣ ହୋଇଯାଇଛି । ଯାହା ଫଳରେ ମେଢ଼ ପ୍ରବେଶ କରି ନୃତ୍ୟ ପ୍ରଦର୍ଶନ କରିବା କଷ୍ଟକର ହେବ । ଦକ୍ଷିଣକାଳି ମନ୍ଦିର ନିକଟସ୍ଥ ରାସ୍ତାରେ କୁଢ଼କୁଢ଼ ଆବର୍ଜନା ଜମିଥିବାରୁ ଏଠାରେ ମଧ୍ୟ ରାସ୍ତା ସଙ୍କୀର୍ଣ୍ଣ ହୋଇଯାଇଛି । ସେହିଭଳି କୁଣ୍ଢେଇବେଣ୍ଟ ସାହି ଅଧୀନରେ ଆସୁଥିବା ଜାଡୁଆଣୀ ଲାଇବ୍ରେରୀ ଛକଠାରୁ ମାର୍କେଟ ଛକ ପର୍ଯ୍ୟନ୍ତ ରାସ୍ତାର ସ୍ଥିତି ମଧ୍ୟ ଭଲନାହିଁ । ମନ୍ଦିରଠାରୁ କିଛି ମିଟର ଦୂରରେ ଥିବା ମରିକର୍ଣ୍ଣିକା ଛକ ଲୋକନାଥ ରୋଡରେ ମଧ୍ୟ ନଳା ପାଣି ଭାସୁଥିବା ଦେଖିବାକୁ ମିଳିଛି ।
ସାହିଯାତରେ ଦୋଳମଣ୍ଡପ ସାହିର ପ୍ରମୁଖ ଭୂମିକା ରହିଥାଏ । ହେଲେ ଦୋଳମଣ୍ଡପ ସାହିରେ ମଧ୍ୟ ଅନେକ ଖାଲଖମା ଭରି ରହିଛି । ଲୋକ ବାରମ୍ବାର ଅଭିଯୋଗ କରିବା ପରେ ଯେଉଁ କେତେକ ସ୍ଥାନରେ କାମଚଳା ଭାବେ ରାସ୍ତା ମରାମତି କରାଯାଇଥିଲା, ତାହା ମଧ୍ୟ ଉଠିଗଲାଣି । ଶ୍ରୀମନ୍ଦିରରୁ ସମୁଦ୍ରକୁ ସଂଯୋଗ କରୁଥିବା ଏହି ପ୍ରମୁଖ ରାସ୍ତାରେ ସବୁବେଳେ ଗାଡ଼ିମଟରର ଗହଳି ଲାଗି ରହିଥାଏ । ରାସ୍ତାର ସ୍ଥିତି ଭଲ ନଥିବାରୁ ସବୁବେଳେ ଦୋଳମଣ୍ଡପ ସାହିରେ ଟ୍ରାଫିକ ଜାମ୍ ଦେଖିବାକୁ ମିଳୁଛି । ମୋଚି ସାହି ଛକର ଅବସ୍ଥା ମଧ୍ୟ ସଙ୍ଗୀନ ରହିଛି। ଏହି ଛକରେ ରାସ୍ତା ମରଣଜନ୍ତା ପାଲଟିଛି । ଏଠାରେ ସବୁବେଳେ ଗାଡ଼ି ମଟର ଦୁର୍ଘଟଣାଗ୍ରସ୍ତ ହେଉଛି । ନରେନ୍ଦ୍ର କୋଣଠାରୁ ମାର୍କେଟ ଛକ ପର୍ଯ୍ୟନ୍ତ ରାସ୍ତାର ସ୍ଥିତି ମଧ୍ୟ ଅତ୍ୟନ୍ତ ଦୁର୍ବିସହ ହୋଇପଡ଼ିଛି ।
