ଭୁବନେଶ୍ବର, ୨୪।୨ : ଶେଉଳ ମାଛ ଧରିବା ପାଇଁ ପୋଖରୀରେ ପିଲାମାନେ ପକାଇଥିଲେ ବନଶୀ। ଏହି ବନଶୀ କଣ୍ଟା ଏକ ତମ୍ପ ସାପ ତଣ୍ଟିରେ ଲାଗିଯାଇଥିଲା। ଛଟପଟ ହୋଇଥିଲା ସାପ। ତେବେ ସାପଟିକୁ ଉଦ୍ଧାର କରି ଓୟୁଏଟିରେ ଅସ୍ତ୍ରୋପଚାର ପରେ ବନଶୀ କଣ୍ଟା ପାଟିରୁ ବାହାର କରାଯାଇଛି।
ଯାଜପୁର ରୋଡ଼ ଅନ୍ତର୍ଗତ କଇଆଁ ଗ୍ରାମରେ ପିଲାମାନେ ଶେଉଳ ଧରିବା ପାଇଁ ରବିବାର ରାତିରେ ବନଶୀ ପକେଇ ଥିଲେ । ସୋମବାର ସକାଳୁ ସେଇ ବନଶୀରେ ଏକ ତମ୍ପ ସାପ ଫସି ଛଟପଟ ହେଉଥିବା ଦେଖିବାକୁ ମିଳିଲା । ସାହସ କରି ଗାଆଁ ପିଲା ମାନେ ବନଶୀ ସହିତ ସାପକୁ ପାଣି ଭିତରୁ ଉପରକୁ ଟାଣି ଆଣିଥିଲେ । ଅନ୍ୟ ବାଟ ନପାଇ ଗ୍ରାମବାସୀଙ୍କ ତରଫରୁ ସ୍ନେକ ହେଲ୍ପ ଲାଇନକୁ ଖବର ଦିଆଯାଇଥିଲା। ସ୍ନେକ ହେଲ୍ପ ଲାଇନ ସଦସ୍ୟ ମାନସ ରଞ୍ଜନ ମହାନ୍ତି ଓ ମଣିଭଦ୍ର ମଲ୍ଲିକ ଘଟଣାସ୍ଥଳରେ ପହଞ୍ଚିବା ବେଳକୁ ସାପଟି ଭିଡି ମୋଡି ହୋଇ ସେହି ଡୋରକୁ ଛିଣ୍ଡେଇ ପାଖରେ ଏକ ଗାତ ଭିତରେ ପଶି ଯାଇଥିଲା । କିନ୍ତୁ ବନଶୀ କଣ୍ଟାଟି ସାପର ତଳ ପାଟି ଫୁଟେଇ ବାହାରକୁ ଦେଖା ଯାଉଥିଲା । ସାପଟିକୁ ଉଦ୍ଧାର କରି ଯାଜପୁର ରୋଡ଼ ରେଞ୍ଜ ଅଧିକାରୀଙ୍କ କାର୍ଯ୍ୟାଳୟକୁ ନେଇଥିଲେ । ଯାଜପୁର ରୋଡ଼ ରେଞ୍ଜ ଅଧିକାରୀଙ୍କ ନିର୍ଦ୍ଦେଶରେ ଫରେଷ୍ଟର ଆନନ୍ଦ ଚନ୍ଦ୍ର ପାତ୍ର ସ୍ନେକ ହେଲ୍ପ ଲାଇନ ସଦସ୍ୟ ମାନସ ଏବଂ ମଣିଭଦ୍ରଙ୍କ ସହିତ ଭୁବନେଶ୍ୱର ଓୟୁଏଟି ସ୍ଥିତ ଭେଟେରିନାରୀ କଲେଜକୁ ଚିକିତ୍ସା ପାଇଁ ଆଣିଥିଲେ ।
ଭେଟେରିନାରୀ ସର୍ଜରି ବିଭାଗର ଆସିଷ୍ଟାଣ୍ଟ ପ୍ରଫେସର ଡାକ୍ତର ସିଦ୍ଧାର୍ଥ ଶଙ୍କର ବେହେରା ପ୍ରଥମେ ଏକ୍ସରେ କରି ବନଶୀ କଣ୍ଟା ପାଟି ଭିତରେ କେଉଁ ସ୍ଥାନରେ ଅଛି ବା କେଉଁ ଅଙ୍ଗକୁ କ୍ଷତି କରିଛି ତାହାର ବିଶ୍ଳେଷଣ କରିଥିଲେ । ଏହାପରେ କଠିନ ଲୁହାରେ ନିର୍ମିତ ବନଶୀ କଣ୍ଟାକୁ ମେଟାଲ କଟର ସାହାଯ୍ୟରେ ଦୁଇ ଖଣ୍ଡ କରିବା ପରେ ଡାକ୍ତର ସିଦ୍ଧାର୍ଥ କଣ୍ଟାକୁ ସାପ ପାଟିରୁ ବାହାର କରିଥିଲେ । ଅପରେସନ ବେଳେ ସର୍ଜରି ବିଭାଗର ପିଜି ଏବଂ ପିଏଚଡି ଛାତ୍ରମାନେ ମଧ୍ୟ ସହାୟତା କରିଥିଲେ । ଡାକ୍ତର ସିଦ୍ଧାର୍ଥ କହିଛନ୍ତି , ଆମେ ସାପଟିକୁ ପେନ୍ କିଲର ଏବଂ ଆଣ୍ଟି ବାୟୋଟିକ୍ସ ଦେଇଛୁ । ତାର ବିଶେଷ କ୍ଷତ ହୋଇ ନଥିବାରୁ ସାପଟିକୁ ତାର ବନ୍ୟ ପରିବେଶରେ ଆଜି ହିଁ ଛାଡି ଦେଇ ପାରିବେ ।
ସାପକୁ ବିନା ନିଶ୍ଚେତକ ଦେଇ ବନଶୀ କଣ୍ଟା ବାହାର କରିବା ବିପଦ ପୂର୍ଣ୍ଣ ଥିଲା । ପୁରା ଅପରେସନ ଶେଷ ହେବା ଯାଏଁ, ବିଷଧର ତମ୍ପ ସାପର ମୁଣ୍ଡକୁ ଧରିବା ଏବଂ ଡାକ୍ତର ମାନଙ୍କ ମନରେ ଆତ୍ମବିଶ୍ଵାସ ବଜାୟ ରଖିବା କାମ କରିଥିଲେ ସ୍ନେକ ହେଲ୍ପ ଲାଇନର ସାଧାରଣ ଶୁଭେନ୍ଦୁ ମଲ୍ଲିକ । ସାପଟିକୁ ଏକ ପ୍ରାକୃତିକ ଆବାସ ସ୍ଥଳୀରେ ଛାଡି ଦିଆଯାଇଛି ।
