କଟକ, ୨୪।୨ : ପଦ୍ମଶ୍ରୀ ପୁରସ୍କାର ବିବାଦ ମାମଲା ଉପରେ ସୋମବାର ହାଇକୋର୍ଟରେ ନିଜର ପକ୍ଷ ରଖିଛନ୍ତି ଆବେଦନକାରୀ ଅନ୍ତର୍ଯ୍ୟାମୀ ମିଶ୍ର। ମାମଲାର ପ୍ରତିପକ୍ଷ ତଥା ୨୦୨୩ ରେ ପଦ୍ମ ପୁରସ୍କାର ପାଇଥିବା ଢେଙ୍କାନାଳର ଅନ୍ତର୍ଯ୍ୟାମୀ ମିଶ୍ର କୋର୍ଟରେ ହାଜର ହୋଇ ନାହାନ୍ତି। ସ୍ଵାସ୍ଥ୍ୟଗତ ସମସ୍ୟା ଦର୍ଶାଇ ସେ ହାଜର ହୋଇନାହାଁନ୍ତି ଏବଂ ତଥ୍ୟ ରଖିବାକୁ ୪ ସପ୍ତାହର ମହଲତ ଲୋଡିଛନ୍ତି। ତେଣୁ ମାମଲାର ପରବର୍ତ୍ତି ଶୁଣାଣି ମାର୍ଚ୍ଚ ୧୮ ତାରିଖକୁ ଧାର୍ଯ୍ୟ କରାଯାଇଛି।
ସମାନ ନାଁ ଯୋଗୁଁ ପଦ୍ମଶ୍ରୀ ପୁରସ୍କାରକୁ ନେଇ ବିବାଦ ମୁଣ୍ଡ ଟେକିଛି। ଜଣେ ବ୍ୟକ୍ତିଙ୍କ ବଦଳରେ ଆଉ ଜଣେ ବ୍ୟକ୍ତିଙ୍କୁ ୨୦୨୩ରେ ପଦ୍ମଶ୍ରୀ ପୁରସ୍କାର ମିଳିଛି ବୋଲି ଅଭିଯୋଗ ହୋଇଛି। ଯାହାକୁ ଚ୍ୟାଲେଞ୍ଜ କରି ଭୁବନେଶ୍ଵର ବ୍ରାହ୍ମେଶ୍ବର ପାଟଣା ନିବାସୀ ଅନ୍ତର୍ଯ୍ୟାମୀ ମିଶ୍ର ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି। ପୂର୍ବ ନିର୍ଦେଶ ମୁତାବକ ସୋମବାର ଆବେଦନକାରୀ ହାଇକୋର୍ଟରେ ହାଜର ହୋଇଥିଲେ। ନିଜ ସ୍ବରଚିତ ୨୯ ଟି ପୁସ୍ତକ ଗୁଡିକୁ ଆଜି ସେ ପ୍ରମାଣ ସ୍ୱରୂପ କୋର୍ଟରେ ଦେଖାଇଛନ୍ତି। ମାମଲାର ଉଭୟ ପକ୍ଷଙ୍କୁ ବ୍ୟକ୍ତିଗତ ଭାବେ ହଜାର ହେବା ଲାଗି ହାଇକୋର୍ଟରୁ ନିର୍ଦେଶ ଦିଆଯାଇଥିଲା।
