ନୂଆଦିଲ୍ଲୀ ୦୬/୦୪: ଆମେରିକୀୟ ଅରବପତି ଜେଫ୍ ବେଜୋସଙ୍କ କମ୍ପାନି ବ୍ଲୁ ଅରିଜିନ୍ର ଅଲ୍ ୱିମେନ କ୍ରୁ ମିଶନକୁ ନେଇ ଚର୍ଚ୍ଚା । ଏଥିରେ ଲୋକପ୍ରିୟ ହଲିଉଡ୍ ଗାୟିକା କେଟି ପେରୀଙ୍କ ସମେତ ମୋଟ୍ ୬ ହାଇପ୍ରୋଫାଇଲ ମହିଳା ମହାକାଶ ଯିବେ । ଏମାନଙ୍କ ମଧ୍ୟରେ ସାମ୍ବାଦିକା ଗେଲ କିଙ୍ଗ୍, ନାସାର ପୂର୍ବତନ ରକେଟ୍ ବୈଜ୍ଞାନିକ ଆୟଶା ବୋୱେ, ବାୟୋଆଷ୍ଟ୍ରୋନଟିକ୍ସ ରିସର୍ଚ୍ଚ ସାଇଣ୍ଟିଷ୍ଟ୍ ଓ ନାଗରିକ ଅଧିକାର କର୍ମକର୍ତ୍ତା ଆମାଣ୍ଡା ନ୍ୟୁଗେନ୍, ଫିଲ୍ମମେକର କେରିୟନ୍ ଫ୍ଲିନ୍ ଏବଂ ସାମ୍ବାଦିକ ଓ ହେଲିକପ୍ଟର ପାଇଲଟ୍ ଲରେନ୍ ସାଂଚେଜ ଅଛନ୍ତି । ଲରେନ୍ ହେଉଛନ୍ତି ଜେଫ୍ ବେଜୋସଙ୍କ ଭାବୀ ପତ୍ନୀ ।
ବ୍ଲୁ ଅରିଜିନ୍ ଅନୁସାରେ, ମହାକାଶ ଯାତ୍ରା କରୁଥିବା ଏହି ଅଲ୍ ୱିମେନ୍ କ୍ରୁ ମିଶନ ବ୍ଲୁ ଅରିଜିନ୍ର ୧୧ତମ ମାନବ ମହାକାଶ ମିଶନ ହେବ । ୧୯୬୩ ପରେ ପ୍ରଥମ ଥର ମହିଳାଙ୍କ ମିଶନ ମହାକାଶ ଯିବ । ଆସନ୍ତା ୧୪ ତାରିଖ ମହାକାଶଯାନ ଉତ୍କ୍ଷେପଣର କିଛି ଦିନ ପୂର୍ବରୁ ଏହି ମହିଳା ଟିମ୍ ଟେକ୍ସାସର ଭାନ୍ ହର୍ନ ସ୍ଥିତ ଉତ୍କ୍ଷେପଣ ସ୍ଥଳୀରେ ଅନ୍ତିମ ତାଲିମ ଅଧିବେଶନ ପାଇଁ ଏକତ୍ର ହେବେ । ବ୍ଲୁ ଅରିଜିନ୍ର ଏହି ସ୍ପେସ୍ ମିଶନର ନାଁ ଏନ୍ଏସ୍-୩୧ ।
କେଟି ପେରୀ ଏହି ମିଶନକୁ ନେଇ କହିଛନ୍ତି, ଆଶା କରୁଛି ମୋର ଯାତ୍ରା ମୋ ଝିଅ ଓ ଅନ୍ୟମାନଙ୍କୁ ମଧ୍ୟ ମହାକାଶ ଯିବା ପାଇଁ ପ୍ରେରିତ କରିବ । ବେଜୋସ୍ଙ୍କ ଭାବୀ ପତ୍ନୀ ଲରେନ୍ ମିଶନର ନେତୃତ୍ୱ ନେବେ । ଏହି ମହିଳା ଟିମ୍କୁ ଏକତ୍ର କରିବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛନ୍ତି । ଆସନ୍ତା ୧୪ ତାରିଖ ସକାଳ ୭ଟାରେ ନ୍ୟୁ ଶେପାର୍ଡ ମହାକାଶଯାନ ମହାକାଶକୁ ଯାତ୍ରା କରିବ । ୧୦୦ କିମି ଉଚ୍ଚ କାରମାନ ଲାଇନ୍ରେ ଏହା ପହଞ୍ଚିବ । ଶୀର୍ଷ ଉଚ୍ଚତାରେ ପହଞ୍ଚିବା ପରେ କ୍ୟାପ୍ସୁଲ ରକେଟ୍ଠୁ ଅଲଗା ହେବ । ଏହା ଫଳରେ ଯାତ୍ରୀ କିଛି ମିନିଟ୍ ମାଧ୍ୟାକର୍ଷଣ ଶୂନ୍ୟତାର ଅନୁଭବ କରିବେ । ଏହି ସମୟରେ ୬ ଯାତ୍ରୀ କ୍ୟାପ୍ସୁଲର ୬ ବିଶାଳ ଝରକା ମାଧ୍ୟମରେ ପୃଥିବୀର ମନୋରମ ଦୃଶ୍ୟକୁ ଉପଭୋଗ କରିବେ । କ୍ୟାପ୍ସୁଲର ୧୫ କ୍ୟୁବିକ୍ ମିଟର ଆଭ୍ୟନ୍ତର ସ୍ଥାନ ଯାତ୍ରୀଙ୍କୁ ଚତୁଃପାଶ୍ୱର୍ ଦୃଶ୍ୟର ଆନନ୍ଦ ପ୍ରଦାନ କରିବ । ସର୍ବୋଚ୍ଚ ପଏଣ୍ଟ୍ ଆପୋଜିରେ ପହଞ୍ଚିବା ପରେ କ୍ୟାପ୍ସୁଲ ତଳକୁ ଖସିବା ଆରମ୍ଭ କରିବ । ଅବତରଣକୁ ଧିମା କରିବା ଲାଗି ୩ କ୍ୟାପ୍ସୁଲରେ ପାରାଚୁଟ୍ ମୁତୟନ କରାଯାଇଛି । ଏହା ପରେ ରକେଟ୍ ସ୍ୱତଃ ପୃଥିବୀକୁ ଫେରିବ ।
