ନୂଆଦିଲ୍ଲୀ: ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (IRGC)ର ମୁଖ୍ୟ ଜେନେରାଲ ହୁସେନ ସଲାମୀ ଇସ୍ରାଏଲ ଏବଂ ଆମେରିକାକୁ ଚେତାବନୀ ଦେଇଛନ୍ତି। ସଲାମୀ କହିଛନ୍ତି ଯେ, ଇରାନ ଯୁଦ୍ଧ ଚାହୁଁନାହିଁ ଏବଂ କାହା ସହିତ ଯୁଦ୍ଧ ଆରମ୍ଭ କରିବ ନାହିଁ । କିନ୍ତୁ ଏହାକୁ ଭୟ ଭାବରେ ଧରାଯିବା ଉଚିତ୍ ନୁହେଁ । ଇରାନ ତା'ର ଶତ୍ରୁମାନଙ୍କୁ ଭୟ କରେ ନାହିଁ ଏବଂ ଯେକୌଣସି ଯୁଦ୍ଧ ପାଇଁ ସମ୍ପୂର୍ଣ୍ଣ ପ୍ରସ୍ତୁତ । ଇରାନ ତାର ଶତ୍ରୁମାନଙ୍କୁ କିପରି ପରାସ୍ତ କରିବାକୁ ହୁଏ ତାହା ଜାଣେ ଏବଂ ଯୁଦ୍ଧରେ ଗୋଟିଏ ଇଞ୍ଚ ମଧ୍ୟ ପଛକୁ ହଟିବ ନାହିଁ । ଇରାନ ପରମାଣୁ କାର୍ଯ୍ୟକ୍ରମ ଏବଂ ହୁତି ବିଦ୍ରୋହୀଙ୍କୁ ସମର୍ଥନ ପ୍ରସଙ୍ଗରେ ଆମେରିକା ଏବଂ ଇସ୍ରାଏଲ ସହିତ ତେହରାନର ବିବାଦ ମଧ୍ୟରେ ସଲାମୀଙ୍କ ଏହି ମନ୍ତବ୍ୟ ଚର୍ଚ୍ଚାର ପ୍ରସଙ୍ଗ ପାଲଟିଛି । 

ଇରାନୀ ଗଣମାଧ୍ୟମ ଅନୁସାରେ, ଜେନେରାଲ ହୁସେନ ସଲାମୀ କହିଛନ୍ତି ଯେ ଯଦି ଇରାନ ଯୁଦ୍ଧ ଆରମ୍ଭ କରିବ ନାହିଁ, ତେବେ ଏହାର ଅର୍ଥ ନୁହେଁ ଯେ ସେ ଯୁଦ୍ଧକୁ ଭୟ କରୁଛି। ସାମରିକ ଆକ୍ରମଣ ହେଉ କିମ୍ବା ମନସ୍ତାତ୍ତ୍ୱିକ ଯୁଦ୍ଧ, ଇରାନ ଉଭୟ ପାଇଁ ସମ୍ପୂର୍ଣ୍ଣ ପ୍ରସ୍ତୁତ। ଇରାନ ତା'ର ଶତ୍ରୁମାନଙ୍କୁ କିପରି ପରାସ୍ତ କରିବ ତାହା ଭଲ ଭାବରେ ଜାଣେ । କୌଣସି ପ୍ରକାରର ଯୁଦ୍ଧ ହେଲେ ତେହେରାନ ପଛକୁ ହଟିବ ନାହିଁ। ଏପରି ପରିସ୍ଥିତିରେ, ଶତ୍ରୁ ଆମକୁ ଧମକ ଦେଇ ଭୟଭୀତ କରିବାକୁ ଚେଷ୍ଟା କରିବା ବନ୍ଦ କରିବା ଉଚିତ ବୋଲି ସେ କହିଛନ୍ତି ।

ସଲାମୀ ଇସ୍ରାଏଲକୁ ଟାର୍ଗେଟ କରି କହିଛନ୍ତି ଯେ, ଇହୁଦୀ ଦେଶ ରାଜନୈତିକ ଏବଂ ଆର୍ଥିକ ଦୃଷ୍ଟିରୁ ଅସ୍ଥିର ହୋଇଗଲାଣି। ଏପରି ପରିସ୍ଥିତିରେ, ଇସ୍ରାଏଲ ସରକାର ଏବଂ ସେନା ପାଗଳ ହୋଇଗଲେଣି । ନିରୀହ ଲୋକଙ୍କୁ ହତ୍ୟା କରୁଛନ୍ତି। ବର୍ତ୍ତମାନ ଇରାନ ଏକ ନିରାଶ ଶତ୍ରୁର ସମ୍ମୁଖୀନ ହେଉଛି ।  ସେ ଏକ ନିରସ୍ତ୍ର ରାଷ୍ଟ୍ର ପାଲେଷ୍ଟାଇନକୁ ପରାସ୍ତ କରିବାକୁ ମଧ୍ୟ ସକ୍ଷମ ନୁହଁନ୍ତି । 

ସଲାମୀ କହିଛନ୍ତି ଯେ, ଯଦି ଆମେରିକା ଇସ୍ରାଏଲ ଉପରୁ ତା'ର ହାତ ଦୂରେଇ ନିଏ, ତେବେ ଏହା ତୁରନ୍ତ ଭୁଶୁଡ଼ି ପଡ଼ିବ । ଇରାନ ତା'ର ଶତ୍ରୁର ଦୁର୍ବଳତା ବିଷୟରେ ଜାଣିଛି । ଇରାନ ଶତ୍ରୁକୁ ପରାସ୍ତ କରିବାର କ୍ଷମତା ରଖିଛି। ଇରାନ ଏପରି ଏକ ଦେଶ ଯାହା ପୂର୍ବରୁ ବଡ଼ ଶକ୍ତି ସହିତ ସଂଘର୍ଷ କରିଛି । ଇରାନୀ ଲୋକମାନେ ଭୟଭୀତ ହେବା ଜାଣନ୍ତି ନାହିଁ ।

ଇରାନର ସାମରିକ କ୍ଷମତା ଅଛି ଏବଂ ସଠିକ୍ ସମୟ ଆସିଲେ ଏହାକୁ ପ୍ରଦର୍ଶନ କରାଯିବ। ଇରାନ ପୂର୍ବରୁ ନିଜର ଶକ୍ତି ଦେଖାଇ ସାରିଛି। ଇସ୍ରାଏଲର ଏକ ଉତ୍କୃଷ୍ଟ ବାୟୁ ପ୍ରତିରକ୍ଷା ପ୍ରଣାଳୀ ଅଛି। ଏହା ସତ୍ତ୍ୱେ, ଗତ ବର୍ଷ ଇରାନର କ୍ଷେପଣାସ୍ତ୍ର ଏହାର ପ୍ରତିରକ୍ଷା ଭେଦ କରିବାରେ ସଫଳ ହୋଇଥିଲା । ଭବିଷ୍ୟତରେ ମଧ୍ୟ ଇରାନ ନିଜର ଶକ୍ତି ପ୍ରଦର୍ଶନ କରିବାକୁ ସଂକୋଚ କରିବ ନାହିଁ ବୋଲି IRGCର ମୁଖ୍ୟ ଜେନେରାଲ ହୁସେନ ସଲାମୀ କହିଛନ୍ତି ।