ନୂଆଦିଲ୍ଲୀ, ୦୭/୦୪ : ଭାରତର ଚିକେନ୍ ନେକ୍ ନିକଟରେ ଡ୍ରାଗନର ମାଷ୍ଟର ପ୍ଲାନ୍। ବାଂଲାଦେଶ ଲାଲମୋନିରହାଟ ଜିଲ୍ଲାରେ ଏୟାରଫିଲ୍ଡ ତିଆରି କରିବ ଚୀନ୍। ସବୁଜ ସଙ୍କେତ ଦେଲା ବାଙ୍ଗଲାଦେଶ। ଭାରତ ସରକାରଙ୍କ ବଢିଲା ଟେନସନ୍। ସୀମା ସୁରକ୍ଷାକୁ ନେଇ ଉଠିଲା ପ୍ରଶ୍ନ।
ଜାତୀୟ ଗଣମାଧ୍ୟମ ସୂଚନା ଅନୁଯାୟୀ, ବାଂଲାଦେଶର ଲାଲମୋନିରହାଟ ଜିଲ୍ଲାରେ ଚୀନ ଏୟାରଫିଲ୍ଡ ସ୍ଥାପନ କରିବ। ମହମ୍ମଦ ୟୁନୁସଙ୍କ ଚୀନ ଗସ୍ତ ସମୟରେ ଦୁଇ ଦେଶ ମଧ୍ୟରେ ଏନେଇ ଆଲୋଚନା ହୋଇଛି। ତେବେ ଔପଚାରିକ ଭାବେ ଦୁଇ ଦେଶ ପକ୍ଷରୁ କୌଣସି ସୂଚନା ଦିଆଯାଇ ନାହିଁ। ଏହି ଖବର ମିଳିବା ପରେ ଭାରତ ସରକାରଙ୍କ ଟେନସନ୍ ବଢିଛି। କାରଣ ଦୀର୍ଘ ଦିନ ହେବ ଭାରତର ଚିକେନ ନେକ୍ ଉପରେ ଚୀନ, ପାକିସ୍ତାନ ଭଳି ଦେଶ ଗୁଡ଼ିକର ଲୋଲୁପ ଦୃଷ୍ଟି ରହିଛି। ଗତ କିଛି ଦଶନ୍ଧି ମଧ୍ୟରେ ଏହି ଅଞ୍ଚଳରେ ଜନସଂଖ୍ୟା ସନ୍ତୁଳନ ମଧ୍ୟ ବିଗିଡ଼ିଛି।
ସେପଟେ ଭୌଗୋଳିକ ଦୃଷ୍ଟିରୁ ମଧ୍ୟ ଚିକେନ୍ ନେକ୍ ଭାରତ ପାଇଁ ଖୁବ୍ ସମ୍ଵେଦନଶୀଳ ସ୍ଥାନ। କାରଣ ପୂର୍ବୋତ୍ତର ରାଜ୍ୟ ଗୁଡ଼ିକୁ ଯୋଡ଼ୁଛି ଚିକେନ୍ ନେକ୍। ଯାହାକି ପଶ୍ଚିମବଙ୍ଗରେ ଅବସ୍ଥିତ। ଏହାକୁ ଲାଗିଛି ନେପାଳ, ବାଂଲାଦେଶ, ଭୂଟାନ ଏବଂ ଚୀନ। ସେପଟେ ପଶ୍ଚିମବଙ୍ଗର କୂଚବିହାର ଏବଂ ଜଲପାଇଗୁଡ଼ିକୁ ଲାଗିଛି ବାଂଲାଦେଶର ଲାଲମୋନିରହାଟ ଜିଲ୍ଲା। ପ୍ରତିରକ୍ଷା ଦୃଷ୍ଟିରୁ ବି ଖୁବ୍ ସମ୍ଵେଦନଶୀଳ ଏହି ସ୍ଥାନ। ଏଠାରେ ସର୍ବଦା ହାଇ ଆଲର୍ଟରେ ରୁହନ୍ତି ଭାରତୀୟ ସେନା। ତେଣୁ ଚିକେନ୍ ନେକ୍ ନିକଟରେ ଯଦି ଚୀନ୍ ଏୟାରଫିଲ୍ଡ ସ୍ଥାପନ କରେ ତାହେଲେ ଆଗାମୀ ଦିନରେ ଭାରତର ସୀମା ସୁରକ୍ଷା ପ୍ରତି ପ୍ରଶ୍ନବାଚୀ ସୃଷ୍ଟି ହେବ। ବିଶେଷ କରି ପଶ୍ଚିମବଙ୍ଗ ଏବଂ ସିକ୍କିମ ପାଇଁ ବିପଦ ସୃଷ୍ଟି ହେବ।
ଏହି ଖବରଟିକୁ ପଢନ୍ତୁ-ଟ୍ରମ୍ପଙ୍କ ଟାରିଫ୍ରେ ବିଶ୍ୱ ବଜାରରେ ଭୂକମ୍ପ; ସେୟାର ବଜାର ଡାଉନ୍,୫ ମିନିଟ୍ରେ ୧୯୦୦୦ କୋଟି ସ୍ୱାହା
