ପୁରୀ,୨୯।୩ : ଖୋଲିବ ଶ୍ରୀମନ୍ଦିର ୟୁଟୁବ୍ ଚ୍ୟାନେଲ । ପଣା ସଂକ୍ରାନ୍ତି କିମ୍ବା ଅକ୍ଷୟ ତୃତୀୟାରୁ ଆରମ୍ଭ ହେବ ଶ୍ରୀମନ୍ଦିର ୟୁଟୁବ୍ ଚ୍ୟାନେଲ । ସେହିପରି ଗୁଣ୍ଡିଚା ମନ୍ଦିର ସମ୍ମୁଖରେ ହେବ ଆଉ ଏକ ସୂଚନା କେନ୍ଦ୍ର । ଶ୍ରୀମନ୍ଦିର ପ୍ରଶାସକ ଅରବିନ୍ଦ ପାଢୀ ଏହି ସୂଚନା ଦେଇଛନ୍ତି।
ଶ୍ରୀମନ୍ଦିର କାର୍ଯ୍ୟାଳୟରେ ମୁଖ୍ୟ ପ୍ରଶାସକ ଅରବିନ୍ଦ ପାଢୀଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା। ଚଳିତ ବର୍ଷ ରଥଯାତ୍ରା କିଭଳି ଶୃଙ୍ଖଳିତ ଭାବେ ଆୟୋଜନ ହୋଇପାରିବ ସେ ନେଇ ବୈଠକରେ ଆଲୋଚନା ହୋଇଛି। ତେବେ ଶ୍ରୀମନ୍ଦିରରେ ରତ୍ନଭଣ୍ଡାର ମରାମତି ଅଗ୍ରଗତି ଉପରେ ମଧ୍ୟ ଆଲୋଚନା ହୋଇଥିଲା। ବାହାର ଓ ଭିତର ରତ୍ନଭଣ୍ଡାର ମଝିରେ ପାଞ୍ଚୋଟି ବିମ୍ ଲାଗିଥିଲା। ସେଥିରେ କଳଙ୍କ ଲାଗି ଖରାପ ହୋଇଯାଇଛି। ଏଣୁ ଲୁହା ବିମ୍ ବଦଳରେ ଷ୍ଟେନ ଲେସ୍ ଷ୍ଟିଲ୍ ବିମ୍ ୫ଟି ଖଞ୍ଜା ଯାଇଛି। ନଷ୍ଟ ହୋଇଯାଇଥିବା ପଥର ଗୁଡ଼ିକ ମଧ୍ୟ ବଦଳାଯାଉଛି। କେମିକାଲ ଓ୍ବାସିଂ ଚାଲିଥିବା ବେଳେ ବାହାର ରତ୍ନଭଣ୍ଡାରକୁ ଡିପ୍ଲାଷ୍ଟରିଂ କରାଯାଉଥିବା ସମୟରେ ପଥର ଖରାପ ବାହାରୁଛି। ଅକ୍ଷୟ ତୃତୀୟା ବେଳକୁ ମରାମତି ଓ ସଂରକ୍ଷଣ ଶେଷ ହୋଇପାରେ ବୋଲି ଆଶା ରଖିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ।
ଶ୍ରୀମନ୍ଦିର ଉପରେ ଡ୍ରୋନ୍ ଉଡାଣ ଓ ଫଟୋ , ଭିଡିଓ ଭାଇରାଲ୍ ସହ ମୋବାଇଲ ଫୋନ୍ ଉପରେ ମଧ୍ୟ ପ୍ରତିକ୍ରିୟା ରଖିଛନ୍ତି ମୁଖ୍ୟ ପ୍ରଶାସକ। ଯେଉଁ ଦଣ୍ଡବିଧାନ ରହିଛି ତାହା ପର୍ଯ୍ୟାପ୍ତ ନୁହେଁ। ଏଥିପାଇଁ କଠୋର ଆଇନ୍ ଆବଶ୍ୟକ। ଏଣୁ ଶ୍ରୀଜଗନ୍ନାଥ ଟେମ୍ପୁଲ୍ ଆକ୍ଟ ଅନୁଯାୟୀ ଦଣ୍ଡବିଧାନ ହେବ। ପଣା ସଂକ୍ରାନ୍ତିରେ ଓଡିଆ ନବବର୍ଷର କ୍ୟାଲେଣ୍ଡର ଶ୍ରୀମନ୍ଦିର ପ୍ରଶାସନ କରୁଛି। ପ୍ରଥମେ ମହାପ୍ରଭୁଙ୍କ ପାଖରେ ଲାଗି ହେବ। ପଣା ସଂକ୍ରାନ୍ତି କିମ୍ବା ଅକ୍ଷୟ ତୃତୀୟା ଠାରୁ ଆରମ୍ଭ ହେବ ଶ୍ରୀମନ୍ଦିରର ନୂଆ ୟୁଟୁବ୍ ଚ୍ୟାନେଲ। ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ହୋଇଛି। କୋଠ ଭୋଗରେ ଅମୃତ ଅନ୍ନ ଜୈବିକ ପଦ୍ଧତିରେ ବ୍ୟବହାର ହେବ । ଗୁଣ୍ଡିଚା ମନ୍ଦିର ସମ୍ମୁଖରେ ଆଉ ଏକ ସୂଚନା କେନ୍ଦ୍ର ହେବା ସହ ଏଲଇଡି ଡିସପ୍ଲେ ରହିବ। ୟୁନିଫର୍ମ ପଲିସି ପରିଚାଳନା କମିଟିରେ ପାସ୍ ହୋଇଛି। ରାଜ୍ୟ ସରକାରଙ୍କ ଅନୁମୋଦନ ହେବାପରେ ଲାଗୁ ହେବ ନୂଆ ୟୁନିଫର୍ମ ପଲିସି। ନାଟମଣ୍ଡପରେ ଶୀତତାପ ନିୟନ୍ତ୍ରିତ ବ୍ୟବସ୍ଥା ଉପରେ ବିସ୍ତୃତ ଆଲୋଚନା ହୋଇଛି। ଡାଇଗ୍ରାମ ଦେଖାଇଛନ୍ତି ଏକ୍ସପର୍ଟ ମାନେ। ନୀତିକାନ୍ତ ଉପରେ କୌଣସି ପ୍ରଭାବ ପଡିବ ନାହିଁ। ବୈଠକ ଶେଷ ହେବା ପରେ ଏନେଇ ପ୍ରତିକ୍ରିୟା ରଖିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ। ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ବୈଠକରେ ଜିଲ୍ଲାପାଳ, ନୀତି ଓ ଉନ୍ନୟନ ପ୍ରଶାସକଙ୍କ ସହିତ ସୁଆର ମହାସୁଆର ନିଯୋଗ ସମ୍ପାଦକ ଉପସ୍ଥିତ ଥିଲେ।
