ଭୁବନେଶ୍ୱର, ୨୯/୦୩: ପିପିଲିରେ ଭୟଙ୍କର ଅଗ୍ନିକାଣ୍ଡ । ନିଆଁ ଲାଗି ଜଳିଗଲା ପାଞ୍ଚ ବଖରା ଛାତ ଘର । ଅଗ୍ନିକାଣ୍ଡରେ ୧୫ ରୁ ୨୦ ବାଇକ ଜଳି ପାଉଁଶ ହୋଇଯାଇଥିବା ବେଳେ ଦୁଇଜଣ ଗୁରୁତର ଏବଂ ପାଞ୍ଚ ଜଣ ଆହତ ହୋଇଛନ୍ତି । ସମସ୍ତଙ୍କୁ ମେଡିକାଲ ସ୍ଥାନାନ୍ତର କରାଯାଇଛି । ଏହି ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ସର୍ଟ ସର୍କିଟ ଯୋଗୁଁ ନିଆଁ ଲାଗିଥାଇପାରେ ବୋଲି ଅନୁମାନ କରାଯାଉଛି । ପୁରୀ ଜିଲ୍ଲା ପିପିଲି ପୌରାଞ୍ଚଳର ୫ନମ୍ବର ୱାର୍ଡ ଭବାନୀପୁର ଗାଁରେ ଏହି ଅଗ୍ନିକାଣ୍ଡ ଘଟିଛି ।
ସୂଚନା ମୁତାବକ, ପିପିଲି ପୌରାଞ୍ଚଳର ୫ନମ୍ବର ୱାର୍ଡ ଭବାନୀପୁର ଅଞ୍ଚଳରେ କିଛି ଲୋକ ଗାଁ ଗାଁ ବୁଲି କପଡା ବ୍ୟବସାୟ କରୁଥିଲେ । ସେମାନେ ଏକ ଭଡ଼ା ଘରେ ରହୁଥିବା ବେଳେ ଶୁକ୍ରବାର ବିଳମ୍ୱିତ ରାତିରେ ଏହି ଅଗ୍ନିକାଣ୍ଡ ଘଟିଥିଲା । ସମସ୍ତେ ଶୋଇଥିବା ବେଳେ ହଠାତ ଘରେ ନିଆଁ ଲାଗିଯାଇଥିଲା । ଘରେ କପଡ଼ା ରଖାଯାଇଥିବାରୁ ନିଆଁ ଖୁବ୍ ଶୀଘ୍ର ବ୍ୟାପି ଯାଇଥିଲା । ଅଗ୍ନିକାଣ୍ଡର ପ୍ରଚଣ୍ଡ ଶବ୍ଦରେ ଥରି ଉଠିଥିଲା ଗାଁ । ଘରେ ଥିବା ଲୋକେ କବାଟ, ଝରକା ଭାଙ୍ଗି ଘର ଭିତରୁ ବାହାରିଥିଲେ । ନିଆଁ ଅଣାୟତ୍ତ ହେବାରୁ ୫ ବଖରା ଘର ସହ ୧୫ ରୁ ୨୦ଟି ବାଇକ୍ ମଧ୍ୟ ପୋଡ଼ି ଯାଇଛି । ଦୁର୍ଘଟଣାରେ ୨ଜଣ ଗୁରୁତର ହୋଇଥିବାବେଳେ ୫ ଜଣ ଆହତ ହୋଇଛନ୍ତି । ଏହି ଅଗ୍ନିକାଣ୍ଡ ଏତେ ଭୟଙ୍କର ହୋଇଥିଲା ଯେ ପିପିଲି, କଣାସ ଓ ସତ୍ୟବାଦୀରୁ ଅଗ୍ନିଶମ ବାହିନୀ ଆସି ନିଆକୁ ଆୟତ୍ତ କରିଥିଲେ । ତେବେ ଏହି ଅଗ୍ନିକାଣ୍ଡର କାରଣ ସର୍ଟ ସର୍କିଟ ହୋଇଥାଇ ପାରେ ବୋଲି ଅନୁମାନ କରାଯାଉଛି ।
