ନୂଆଦିଲ୍ଲୀ: ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରୀଫ ଭାରତର 'ଅପରେସନ ସିନ୍ଦୁର' ଅଧୀନରେ ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀର (PoK) ରେ ଥିବା ଆତଙ୍କବାଦୀ ଶିବିର ଉପରେ କରାଯାଇଥିବା ମିସାଇଲ ଆକ୍ରମଣକୁ 'ଯୁଦ୍ଧର କାର୍ଯ୍ୟ' ବୋଲି ଅଭିହିତ କରିଛନ୍ତି। ଏହି ଆକ୍ରମଣ ଏପ୍ରିଲ ୨୨ ତାରିଖରେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିଶୋଧ ସ୍ୱରୂପ କରାଯାଇଥିଲା। 

ଶରୀଫ ଏକ ବିବୃତି ଜାରି କରି କହିଛନ୍ତି ଯେ, "ଭାରତ ଦ୍ୱାରା ଲଦି ଦିଆ ଯାଇଥିବା ଏହି ଯୁଦ୍ଧର କାର୍ଯ୍ୟକୁ ପାକିସ୍ତାନ ପୂର୍ଣ୍ଣ ଶକ୍ତିରେ ପ୍ରତିଉତ୍ତର ଦେବାର ଅଧିକାର ରଖିଛି ଏବଂ ବହୁ ଜଲଦି ଏକ ଦୃଢ଼ ପ୍ରତିକ୍ରିୟା ନିଆଯିବ।" ସେ ଏହାକୁ 'କାପୁରୁଷପଣିଆ ଆକ୍ରମଣ' ବୋଲି ମଧ୍ୟ ଅଭିହିତ କରିଛନ୍ତି। ପାକିସ୍ତାନ ସେନା ମୁଖ୍ୟପାତ୍ର ଲେଫ୍ଟନାଣ୍ଟ ଜେନେରାଲ ଆହମଦ ଶରୀଫ ଚୌଧୁରୀ ଦାବି କରିଛନ୍ତି ଯେ ଭାରତ କୋଟଲି, ବାହାଓ୍ୱାଲପୁର ଏବଂ ମୁଜାଫରାବାଦରେ ମିସାଇଲ ଆକ୍ରମଣ କରିଛି। 

ଭାରତୀୟ ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ, 'ଅପରେସନ ସିନ୍ଦୁର' ଏକ ସୁନିୟନ୍ତ୍ରିତ ଏବଂ ଅଣ-ଉତ୍ତେଜକ କାର୍ଯ୍ୟାନୁଷ୍ଠାନ ଥିଲା। ଯେଉଁଥିରେ କେବଳ ଆତଙ୍କବାଦୀ ଶିବିରକୁ ଟାର୍ଗେଟ କରିଥିଲା ଏବଂ ପାକିସ୍ତାନର ସାମରିକ କିମ୍ବା ନାଗରିକ ପୂର୍ଣ୍ଣ ସ୍ଥାନକୁ ଏଡାଇ ଦିଆଯାଇଥିଲା। ଭାରତୀୟ ସେନା ଏହା ମଧ୍ୟ କହିଛି ଯେ ଏହି କାର୍ଯ୍ୟାନୁଷ୍ଠାନ ପହଲଗାମ ଆକ୍ରମଣକାରୀମାନଙ୍କୁ ଦଣ୍ଡ ଦେବା ପାଇଁ ଉଦ୍ଧିଷ୍ଟ ଥିଲା। 

ବୁଧବାର ମଧ୍ୟରାତ୍ର ପ୍ରାୟ 12ଟା 35 ସମୟରେ ଭାରତର ତିନି ସେନା ମିଳିତ ଭାବେ 'ଅପରେସନ ସିନ୍ଦୁର' ଅଧିନରେ ପାକିସ୍ତାନ ଉପରେ ଏକ ଏୟାରଷ୍ଟ୍ରାଇକ କରିଥିଲା। ଏହି ଘଟଣା ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ପାକିସ୍ତାନ ଏୟାର ଫୋର୍ସ ରାଜୌରୀ ସେକ୍ଟରରେ ପ୍ରତିଶୋଧମୂଳକ ଆକ୍ରମଣ କରିଥିବା ନେଇ ଖବର ମିଳିଛି। ତେବେ ଏନେଇ ଏଯାଏ କୌଣସି ଆଧିକାରିକ ସ୍ତରରେ ସୂଚନା ଜାରି ହୋଇନାହିଁ। 

ଜାତିସଂଘ ଏବଂ ଆମେରିକା ସମେତ ଅନ୍ୟାନ୍ୟ ଆନ୍ତର୍ଜାତୀୟ ଶକ୍ତି ଉଭୟ ଦେଶକୁ ସଂଯମ ଅବଲମ୍ବନ କରିବାକୁ ଅନୁରୋଧ କରିଛନ୍ତି। ଆମେରିକାର ଜାତୀୟ ସୁରକ୍ଷା ଉପଦେଷ୍ଟା ଏବଂ ବୈଦେଶିକତ ରାଷ୍ଟ୍ର ସଚିବ ମାର୍କୋ ରୁବିଓ ଭାରତୀୟ ଜାତୀୟ ସୁରକ୍ଷା ଉପଦେଷ୍ଟା ଅଜିତ ଡୋଭାଲଙ୍କ ସହ କଥାବାର୍ତ୍ତା କରି ଭାରତର ଏହି ଅପରେସନକୁ ସମର୍ଥନ କରିଛନ୍ତି। ଏହା ସହ ଏହି ଆକ୍ରମଣକୁ ସୁନିୟନ୍ତ୍ରିତ ଓ ଅଣ-ଉତ୍ତେଜକ ବୋଲି କହିଛନ୍ତି। 

ପହଲଗାମ ଆକ୍ରମଣର ଦାୟିତ୍ୱ ପାକିସ୍ତାନ ଆଧାରିତ ଲସ୍କର-ଏ-ତୋଇବାର ଏକ ଶାଖା ଦ ରେସିଷ୍ଟାନ୍ସ ଫ୍ରଣ୍ଟ (TRF) ନେଇଥିଲା। ଯଦିଓ ପରେ ସେମାନେ ଏହି ଦାବି ପ୍ରତ୍ୟାହାର କରି ନେଇଥିଲେ। ଭାରତ ଏହି ଆକ୍ରମଣ ପାଇଁ ପାକିସ୍ତାନକୁ ପରୋକ୍ଷ ଭାବେ ଦାୟୀ କରିଛି ଏବଂ ଆନ୍ତର୍ଜାତୀୟ ସମୁଦାୟ ସାମ୍ନାରେ ଏହାର ସୀମାପାର ଆତଙ୍କବାଦ ବିଷୟରେ ଅବଗତ କରାଇଛି। 

ଏହି ଘଟଣାକ୍ରମ ଦୁଇ ପରମାଣୁ ଶକ୍ତିଧର ଦେଶ ମଧ୍ୟରେ ଏକ ବୃହତ୍ତର ସଂଘର୍ଷର ଆଶଙ୍କା ସୃଷ୍ଟି କରିଛି। ବିଶ୍ୱ ସମୁଦାୟ ଏହି ପରିସ୍ଥିତି ଉପରେ ନଜର ରଖିଛି, ଏବଂ ଉଭୟ ପକ୍ଷକୁ ଶାନ୍ତିପୂର୍ଣ୍ଣ ଆଲୋଚନା ମାଧ୍ୟମରେ ଉତ୍ତେଜନା ହ୍ରାସ କରିବାକୁ ଆହ୍ୱାନ କରିଛି।