ମୁମ୍ବାଇ,୭/୫ :  ପହଲଗାମ ଆତଙ୍କୀ ଆକ୍ରମଣର ଜବାବ ଦେଇଛି ଭାରତ । ଭାରତ ‘ଅପରେସନ ସିନ୍ଦୂର’ ମାଧ୍ୟମରେ ପାକିସ୍ତାନ ଏବଂ ପିଓକେରେ ଥିବା ପ୍ରମୁଖ ଆତଙ୍କବାଦୀ ଶିବିର ଉପରେ ଆକ୍ରମଣ କରିଛି । ଏହା ପରେ ପାକିସ୍ତାନରେ ହଇଚଇ ସୃଷ୍ଟି ହୋଇଛି। ଆତଙ୍କବାଦର ମୂଳ ଉପାଡ଼ିବା ପାଇଁ ମଧ୍ୟରାତ୍ରିରେ ଆରମ୍ଭ ହୋଇଥିବା 'ଅପରେସନ୍ ସିନ୍ଦୂର' ପାକିସ୍ତାନକୁ ବିଶ୍ୱ ମଞ୍ଚରେ ସ୍ପଷ୍ଟୀକରଣ ଦେବାକୁ ବାଧ୍ୟ କରିଛି । ପାକିସ୍ତାନ ନିଜ ବୟାନ ଦ୍ୱାରା ଖୋଲାଖୋଲି ଭାବେ ପଦାକୁ ଆସିଛି।

ଏହି ଘଟଣା ପରେ, ପାକିସ୍ତାନର ସୂଚନା ମନ୍ତ୍ରୀ ଆତାଉଲ୍ଲାହ ତାରାର ବିଦେଶୀ ଚ୍ୟାନେଲଗୁଡ଼ିକୁ ଗୋଟିଏ ପରେ ଗୋଟିଏ ସାକ୍ଷାତକାର ଦେବା ଆରମ୍ଭ କରିଥିଲେ । କିନ୍ତୁ, ଏକ ସାକ୍ଷାତକାରରେ ତାଙ୍କର ନିଜସ୍ୱ ବକ୍ତବ୍ୟ ପାକିସ୍ତାନକୁ ପର୍ଦ୍ଦାଫାଶ କରି ଦେଇଛି । ସ୍କାଏ ନ୍ୟୁଜ ଯାହାକି ଏକ ବ୍ରିଟିଶର ଫ୍ରି-ଟୁ-ଏୟର ଟେଲିଭିଜନ ନ୍ୟୁଜ୍ ଚ୍ୟାନେଲ । ଏଠାରେ ଦିଆଯାଇଥିବା ଏକ ସାକ୍ଷାତକାର ସମୟରେ ଏକ ଘଟଣା ଘଟିଥିଲା ଯାହା ମନ୍ତ୍ରୀଙ୍କୁ ଭାଇରାଲ କରିଛି।

ସାକ୍ଷାତକାର ସମୟରେ ସ୍କାଏ ନ୍ୟୁଜ୍ ଆଙ୍କର ପାକିସ୍ତାନ ଉପରେ ହୋଇଥିବା ବିମାନ ଆକ୍ରମଣର ପ୍ରସଙ୍ଗ ଉଠାଇଥିଲେ। ଆଙ୍କର ପଚାରିଥିଲେ ଯେ ଭାରତ ଦାବି କରୁଛି ଯେ ଆକ୍ରମଣ ୯ଟି ଆତଙ୍କବାଦୀ ଆଡ୍ଡା ଉପରେ କରାଯାଇଥିଲା ଏବଂ କୌଣସି ସାମରିକ ପ୍ରତିଷ୍ଠାନକୁ ସ୍ପର୍ଶ କରାଯାଇ ନଥିଲା। ଏହା ଉପରେ ପାକିସ୍ତାନୀ ମନ୍ତ୍ରୀ କହିଥିଲେ ଯେ ପାକିସ୍ତାନରେ କୌଣସି ଆତଙ୍କବାଦୀ ଶିବିର ନାହିଁ। ଆମେ ଆତଙ୍କବାଦର ସବୁଠାରୁ ବଡ଼ ଶିକାର।

ଜବାବରେ ଆଙ୍କର ତାଙ୍କୁ ପାକିସ୍ତାନର ନିଜ ନେତାମାନଙ୍କର ପୁରୁଣା ବକ୍ତବ୍ୟ ମନେ ପକାଇ ଦେଇଥିଲେ ଯେତେବେଳେ ପୂର୍ବତନ ରାଷ୍ଟ୍ରପତି ପରଭେଜ ମୁଶାରଫ, ପୂର୍ବତନ ପ୍ରଧାନମନ୍ତ୍ରୀ ବେନଜୀର ଭୁଟ୍ଟୋ ଏବଂ ବର୍ତ୍ତମାନର ମନ୍ତ୍ରୀ ଖୱାଜା ଆସିଫ ଖୋଲା ମଞ୍ଚରେ ସ୍ୱୀକାର କରିଥିଲେ ଯେ ପାକିସ୍ତାନ ଦଶନ୍ଧି ଧରି ଆତଙ୍କବାଦୀ ସଂଗଠନଗୁଡ଼ିକୁ ପୋଷଣ କରିଆସୁଛି। 

୨୦୧୮ ମସିହାରେ ମଧ୍ୟ ଆମେରିକା ପାକିସ୍ତାନକୁ ସାମରିକ ସହାୟତା ବନ୍ଦ କରିଦେଇଥିଲା। କାରଣ ଏହାକୁ ଆତଙ୍କବାଦୀଙ୍କ ପାଇଁ ଏକ ଆଶ୍ରୟସ୍ଥଳ ବୋଲି ବିବେଚନା କରାଯାଉଥିଲା। ପାକିସ୍ତାନର ସୂଚନା ମନ୍ତ୍ରୀଙ୍କ ସାକ୍ଷାତକାର ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି। ଲୋକମାନେ ନିଜ ନିଜ ପ୍ରତିକ୍ରିୟା ଦେଉଛନ୍ତି।