ଅନୁଗୁଳ,୨୪/୦୮: ଦୁଇ ମାସ ତଳେ ଅନୁଗୁଳ ସହରର ମଦନମୋହନପଡ଼ାରେ ଠାବ ହୋଇଥିବା ସେକ୍ସ  ର‌୍ୟାକେଟ୍‌ର ମାଷ୍ଟରମାଇଣ୍ଡ୍‌କୁ ଗିରଫ କରିଛି ପୁଲିସ୍‌ । ଗିରଫ ଅଭିଯୁକ୍ତ ମଦନମୋହନପଡ଼ାର ମିନତି ଓରଫ୍‌  ସବନମ୍‌ ବେଗମ୍‌ । ପୂର୍ବରୁ ପୁଲିସ୍‌ ଏହି ମାମଲାରେ ୪ଜଣଙ୍କୁ  ଗିରଫ କରିଥିବା ବେଳେ ସବନମ୍‌ ପୁଲିସ୍‌କୁ ଚକ୍‌ମା ଦେଇ ଫେରାର୍‌  ହୋଇଯାଇଥିଲା । ସେ ଅନୁଗୁଳ  ସହରରେ ବୁଲୁଥିବା ଖବର ପାଇ ପୁଲିସ୍‌  ଚଢ଼ଉ କରି ତା’ଙ୍କୁ  ଗିରଫ କରିବାରେ ସଫଳ ହୋଇଛି ।

ସୂଚନା ମୁତାବକ,  ଜୁନ୍‌ ୨୯ ତାରିଖ ଦିନ ଏହି ଚଢ଼ାଉ କରିଥିଲା ପୁଲିସ୍‌ । ବ୍ରାଉନ୍‌ସୁଗର କାରବାର ନେଇ ପୁଲିସ୍‌କୁ ପକ୍କା  ସୂଚନା ମିଳିଥିଲା। ସେହିଦିନ ଅପରାହ୍ଣରେ ପୁଲିସ୍‌  ସଦଳବଳ ଅତର୍କିତ ଚଢ଼ାଉ କରି ବ୍ରାଉନ୍‌ସୁଗର ଖୋଜିବା ବେଳକୁ ସେକ୍ସ ର‌୍ୟାକେଟ୍‌ ଚାଲିଥିବା ଦେଖିଥିଲା ପୁଲିସ୍‌ । ପୁଲିସ୍‌ ୨ ଜଣ ଦେହଜୀବୀଙ୍କୁ  ଉଦ୍ଧାର କରିବା ସହିତ ଦୁଇ ଜଣ ଗ୍ରାହକଙ୍କ ସମେତ ୪  ଜଣଙ୍କୁ ଗିରଫ କରିଥିଲା । ଗିରଫ ଅଭିଯୁକ୍ତଙ୍କ ମଧ୍ୟରେ  ମାଷ୍ଟରମାଇଣ୍ଡ୍‌ ସବନମ୍‌ର ସ୍ୱାମୀ ଓ ପୁଅ ମଧ୍ୟ ସାମିଲ୍‌  ଥିଲେ । ଉଭୟ ଅନୁଗୁଳ ଓ ଢେଙ୍କାନାଳ ଅଞ୍ଚଳରୁ ଝିଅ ଯୋଗାଇବା ସହିତ ସେକ୍ସ କାରବାରରେ ସହଯୋଗ  କରୁଥିଲେ । ପୁଲିସ୍‌ ଘଟଣା ଦିନ ଚାରି ଜଣଙ୍କୁ ଗିରଫ  କରିଥିବା ବେଳେ ସବନମ୍‌ ଫେରାର୍‌ ହୋଇଯାଇଥିଲା ।