ରାଉରକେଲା, ୦୪/୧୧: କୋଏଲ ନଦୀରେ ବାରମ୍ବାର ଘଟୁଛି ଅଘଟଣ । ଯାଉଛି ଜୀବନ । ରବିବାର ଅପରାହ୍ନରେ ନଦୀରେ ବୁଡି ନିଖୋଜ ହୋଇଥିବା ୧୩ ବର୍ଷର ନାବାଳକ ପ୍ରତୀକ ବଡ଼ାଇକଙ୍କ ଏବେ ଶୁଦ୍ଧ ପତ୍ତା ମିଳିନି । ତେଣୁ ସୋମବାର ପୁଣି ଥରେ ଆରମ୍ଭ ହୋଇଛି ସର୍ଚ୍ଚ ଅପରେସନ ।
ସୂଚନା ମୁତାବକ, ରବିବାର ୪ ଜଣ ନାବାଳକ ସାଙ୍ଗ ସେକ୍ଟର ୧୯ ହମୀରପୁର କୋଏଲ ଘାଟିକୁ ଗାଧୋଇବାକୁ ଯାଇଥିଲେ । ଗାଧୋଇବା ବେଳେ ନଦୀର ଗଭୀର ପାଣିରେ ୨ ସାଙ୍ଗ ବୁଡି ଯାଇଥିଲେ । ଏହା ଦେଖି ସ୍ଥାନୀୟ ଲୋକେ ତୁରନ୍ତ ଅଗ୍ନିଶମ ବାହିନୀ ଏବଂ ପୋଲିସକୁ ଖବର ଦେଇଥିଲେ । ଏହାରି ଭିତରେ ଲୋକେ ଜଣଙ୍କୁ ଉଦ୍ଧାର କରିଥିବା ବେଳେ ପ୍ରତୀକଙ୍କ କୌଣସି ପତ୍ତା ମିଳି ନାହିଁ । ଖବର ପାଇ ପୋଲିସ ଏବଂ ଅଗ୍ନିଶମ ବାହିନୀର ଏକ ଟିମ୍ ଘଟଣାସ୍ଥଳରେ ପହଞ୍ଚି ସର୍ଚ୍ଚ ଅପରେସନ୍ ଆରମ୍ଭ କରିଥିଲେ । କିନ୍ତୁ ସନ୍ଧ୍ୟା ହେବାରୁ ସର୍ଚ୍ଚ ବନ୍ଦ କରାଯାଇଥିଲା । ପରେ ସୋମବାର ସକାଳୁ ପୁଣି ଆରମ୍ଭ ହୋଇଛି ସର୍ଚ୍ଚ ଅପରେସନ୍ ।
