ରାଉରକେଲା,୦୮/୦୭: ସ୍ଵତନ୍ତ୍ର ଆଇନ ଦାବିରେ ଓଡ଼ିଶା ଡ୍ରାଇଭର ମହାସଂଘ ଷ୍ଟିୟରିଂ ଛାଡ଼ ଆନ୍ଦୋଳନ ଡାକରା ଦେଇଛି । ଡ୍ରାଇଭର ସଂଘ ବିଭିନ୍ନ ଦାବି ନେଇ ପୂର୍ବରୁ ରାଜ୍ୟ ସରକାରଙ୍କୁ ଦାବିପତ୍ର ଦେଇଥିଲେ ସୁଦ୍ଧା ସରକାରଙ୍କ ତରଫରୁ କୌଣସି ଆଲୋଚନା କି ନିଷ୍ପତ୍ତି ନ ନିଆଯାଇନାହିଁ। ଯାହାକୁ ନେଇ ଡ୍ରାଇଭର ସଂଘ ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇଛି । ଯାହାର ପ୍ରଭାବ ଆଜି ଷ୍ଟିଲ ସିଟି ରାଉରକେଲାରେ ମଧ୍ୟ ଦେଖିବାକୁ ମିଳିଛି ।
ସକାଳ ୬ଟାରୁ ଜିଲ୍ଲା ଡ୍ରାଇଭର ମହାସଂଘ ସହରର ବିଭିନ୍ନ ଛକରେ ଆନ୍ଦୋଳନ କରିଥିବା ଦେଖିବାକୁ ମିଳିଥିଲା। ଫଳରେ ବିର୍ସାମୁଣ୍ଡା ବସଷ୍ଟାଣ୍ଡ, ସେକ୍ଟର -୨ ଛକ ସ୍ଥିତ ବସଷ୍ଟାଣ୍ଡରେ କୌଣସି ଯାତ୍ରୀବାହୀ ବସ୍ ବାହାରି ନ ଥିଲା। ଏପରିକି ଡ୍ରାଇଭର ସଂଘ ସଦସ୍ୟମାନେ ଏକାଠି ହୋଇ ବିର୍ସାମୁଣ୍ଡା ଛକରେ ବିକ୍ଷୋଭ ପ୍ରଦର୍ଶନ କରି କାର୍, ଚାରି ଚକିଆ ଯାନଗୁଡିକୁ ଅଟକାଇ ଆଗକୁ ଯିବାକୁ ଦେଇନଥିଲେ। ସହରରେ କୌଣସି ଯାତ୍ରୀବାହୀ ବସ୍, ଅଟୋ କିମ୍ବା କାର ଚାଲିନଥିବାରୁ ଯାତ୍ରୀମାନେ ହନ୍ତସନ୍ତ ହେଉଥିବାର ଦେଖିବାକୁ ମିଳିଛି। ବିଭିନ୍ନ ବସଷ୍ଟାଣ୍ଡ, ଛକଗୁଡ଼ିକରେ ବସ୍, ଅଟୋକୁ ନପାଇ ନିରାଶ ଫେରୁଛନ୍ତି । ଅନ୍ୟପଟେ ବୁଧବାର ଦେଶବ୍ୟାପୀ ସାଧାରଣ ଧର୍ମଘଟ ଡାକରା ଦେଇଛି ଶ୍ରମିକ ସଂଗଠନ। ସେହିପରି ବୁଧବାର ଯୁକ୍ତ ୨ ପିଲାଙ୍କ ନାମଲେଖା ଓ ଯୁକ୍ତ ୩ ଛାତ୍ରଛାତ୍ରୀଙ୍କ ପରୀକ୍ଷା ମଧ୍ୟ ରହିଛି। ଯାହାକୁ ନେଇ ଅଭିଭାବକ ଓ ଯାତ୍ରୀମାନେ ଏକ ପ୍ରକାର ଚିନ୍ତାରେ ପଡିଯାଇଛନ୍ତି।
