ନୂଆଦିଲ୍ଲୀ,୨୯/୧୨: ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) କୁ ଆଇନଗତ ଗ୍ୟାରେଣ୍ଟି ଓ ଅନ୍ୟାନ୍ୟ ଦାବିରେ ପଞ୍ଜାବ-ହରିୟାଣା ସୀମାନ୍ତବର୍ତ୍ତୀ ଖନୌରୀ ଠାରେ ଗତ ୩୩ ଦିନ ହେଲା ଆମରଣ ଅନଶନରେ ବସିଛନ୍ତି ଚାଷୀ । ତେବେ ଅନଶନରେ ବସିଥିବା ଚାଷୀନେତା ଜଗଜୀତ ସିଂହ ଡଲେୱାଲଙ୍କ ସ୍ୱାସ୍ଥ୍ୟାବସ୍ଥା ବିଗିଡିଥିବା ବେଳେ ଯାହାକୁ ନେଇ ସୁପ୍ରିମକୋର୍ଟ ପଞ୍ଜାବ ସରକାରଙ୍କ ଉପରେ ଜୋର୍ଦାର ବର୍ଷିଛନ୍ତି । କହିଛନ୍ତି ପ୍ରଥମେ ଆପଣ ସମସ୍ୟା ସୃଷ୍ଟି କରୁଛନ୍ତି । ପରେ କହୁଛନ୍ତି କଣ କି କିଛି କରିପାରିବେ ନାହିଁ । ଆସନ୍ତା ୩୧ ତାରିଖ ସୁଦ୍ଧା କେନ୍ଦ୍ର ସରକାରଙ୍କ ସହାୟତାରେ ଡଲେୱାଲଙ୍କୁ କୌଣସି ହସ୍ପିଟାଲକୁ ସ୍ଥାନାନ୍ତର କରିବା ଲାଗି ସର୍ବୋଚ୍ଚ ଅଦାଲତ ପଞ୍ଜାବ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ଗତକାଲି ଶୁଣାଣି ବେଳେ କୋର୍ଟ ଡଲେୱାଲଙ୍କ ଚିକିତ୍ସା ବ୍ୟବସ୍ଥା ଓ ତାଙ୍କୁ ହସ୍ପିଟାଲ ନେବାର ବ୍ୟବସ୍ଥା ସମ୍ପର୍କିତ ସବିଶେଷ ତଥ୍ୟ ଦେବାକୁ ପଞ୍ଜାବ ସରକାରଙ୍କୁ ନିର୍ଦ୍ଦେଶ ଦେଇଥିଲେ ।
ପଞ୍ଜାବର ଆଡଭୋକେଟ ଜେନେରାଲ ଗୁରମିନ୍ଦର ସିଂହ ସରକାରଙ୍କ ପକ୍ଷରୁ ଜବାବ ଦାଖଲ କରିଥିଲେ । ସେହିଭଳି ପଞ୍ଜାବ ମୁଖ୍ୟ ସଚିବ ଓ ପୁଲିସ ଡିଜିଙ୍କ ବିରୋଧରେ ଆଗତ ଅଦାଲତ ଅବମାନନା ମାମଲାର ଶୁଣାଣି ଆସନ୍ତା ୩୧ରେ କରିବାକୁ ସୁପ୍ରିମକୋର୍ଟ କହିଛନ୍ତି । ବିଚାରପତି ସୂର୍ଯ୍ୟକାନ୍ତ ଓ ବିଚାରପତି ସୁଧାଂଶୁ ଧୁଲିଆଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରୁଛନ୍ତି । ଅନ୍ୟପକ୍ଷରେ ଡଲେୱାଲଙ୍କୁ ହସ୍ପିଟାଲ ସ୍ଥାନାନ୍ତରଣକୁ ବିରୋଧ କରୁଥିବା ଚାଷୀନେତାଙ୍କୁ ମଧ୍ୟ ସର୍ବୋଚ୍ଚ ଅଦାଲତ ତୀବ୍ର ସମାଲୋଚନା କରିଛନ୍ତି । କହିଛନ୍ତି ଅସୁସ୍ଥଙ୍କୁ ହସ୍ପିଟାଲକୁ ନେବା ଲାଗି ରୋକାଯିବା ଭଳି ଆନ୍ଦୋଳନ ପୂର୍ବରୁ କେବେ ଶୁଣାଯାଇନାହିଁ । ଏହା ଆତ୍ମହତ୍ୟା କରିବା ଲାଗି ଉସୁକାଇବା ସହ ସମାନ । ଆପଣମାନେ କିଭଳି ଚାଷୀନେତା ଯାହାକି ଡଲେୱାଲ ମରିଯାନ୍ତୁ ବୋଲି ଚାହୁଁଛନ୍ତି । ଡଲେୱାଲଙ୍କ ଉପରେ ଚାପ ପକାଯାଉଛି । ଯେଉଁମାନେ ତାଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ବିରୋଧ କରୁଛନ୍ତି ସେମାନେ ଡଲେୱାଲଙ୍କ ଶୁଭଚିନ୍ତକ ନୁହନ୍ତି । ସେ ହସ୍ପିଟାଲରେ ଚିକିତ୍ସିତ ହୋଇ ମଧ୍ୟ ନିଜର ଅନଶନ ଜାରି ରଖିପାରିବେ ।
