ଚଣ୍ଡିଗଡ଼,୧୨/୦୯: ହରିଆଣାର ହିସାର ଆସନରୁ ବିଜେପି ଟିକଟ ନ ମିଳିବା ଯୋଗୁ ଅସନ୍ତୁଷ୍ଟ ଥିବା ଦେଶର ସବୁଠୁ ଧନୀ ମହିଳା ସାବିତ୍ରୀ ଜିନ୍ଦଲ କଂଗ୍ରେସରେ ସାମିଲ ହୋଇପାରନ୍ତି । ବିଜେପି ଟିକଟ ନ ମିଳିବାରୁ ସେ ପ୍ରଥମେ ସ୍ୱାଧୀନ ଭାବେ ଲଢ଼ିବେ ବୋଲି ଘୋଷଣା କରିଥିଲେ । ପରେ ଦିଲ୍ଲୀ ଯାଇ କଂଗ୍ରେସ ସହିତ ଯୋଗାଯୋଗରେ ଆସିଥିବା ସୂଚନା ମିଳିଛି । କଂଗ୍ରେସର ଟିକଟ ତାଲିକା ବିଳମ୍ବ ହେବା ପଛରେ ଏହା ମଧ୍ୟ ଏକ କାରଣ ବୋଲି ମନେ କରାଯାଉଛି । ସାବିତ୍ରୀଙ୍କୁ ହିସାରରୁ କଂଗ୍ରେସ ପକ୍ଷରୁ ଟିକଟ ମିଳିପାରେ । ଏପରିହେଲେ ତାଙ୍କର ମୁକାବିଲା ବିଜେପିର କମଲ ଗୁପ୍ତାଙ୍କ ସହିତ ହେବ ।
ହରିଆଣା ବିଧାନସଭା ନିର୍ବାଚନ ଲାଗି କଂଗ୍ରେସ ୪୬ ଜଣିଆ ପ୍ରାର୍ଥୀଙ୍କ ତାଲିକା ପ୍ରସ୍ତୁତ କରିଛି । ଦଳୀୟ ସୂତ୍ର ମୁତାବକ ହୁଡ୍ଡାଙ୍କ ଗୋଷ୍ଠୀ ସେଥିମଧ୍ୟରୁ ୨୯ ସମ୍ଭାବିତ ପ୍ରାର୍ଥୀଙ୍କୁ କଂଗ୍ରେସ ମୁଖ୍ୟାଳୟକୁ ଡକାଇଛନ୍ତି । ଗୁରୁବାର ନାମାଙ୍କନପତ୍ର ଦାଖଲର ଅନ୍ତିମ ଦିନ । ସେହିପରି ସୋସିଆଲ୍ ମିଡିଆରେ କଂଗ୍ରେସର ସମ୍ଭାବିତ ପ୍ରାର୍ଥୀ ତାଲିକା ମଧ୍ୟ ଭାଇରାଲ୍ ହେଉଛି।